Isaías 1 - Biblia en Guaraní - ?anderuete ?e’? Por? 2015

Ñanderuete oavisa

Israel retãme

1Ko’ã mba’e Ñanderuete ohechaukava’ekue payetépe (vision rupi) Isaías, Amos ra’ýpe, Juda ha Jerusalen rehe, Uzías, Jotam, Acaz ha Ezequías, Juda retã ruvichakuéra arakuérape.

2Yvagakuéra pehendu ha yvyariguakuéra pejapysaka porãke Ñanderuete ñe’ẽ rehe: Amongakuaa ta’yrakuérape ha amopu’ã ichupekuéra, upeichavérõ oñemoĩ hikuái cherehe.

3Pe guéi oikuaa ijárape, ha pe búrro oikuaa ijára rymba karuha; Israel katu ndoikuáai Ijára rape, ha che retã ndohechakuaái mba’eve.

4Cháke, peẽ tekove mba’evai apoha, tetãyguakuéra henyhẽva ñaña rekógui, iñaña rekóva ñemoñarenguéra, ta’yrakuéra heko vaietereíva. Opoi hikuái pende Ruetégui, omboyke hikuái Israel Jára Iporãitévape, ohopa jevy hapykue gotýo.

5Mba’upéiko pejehaviraukaseve gueteri, peñemoĩvo cherehe. Opaite akã hasypa, ha peẽ pendepy’a kangypa.

6Pene pysã guive pene akã meve ndaipóri mba’eve hesãiva, ai, ñenupã pyahu ha ñehungámante oĩ; avave napenepohãnói, ndapejokuái ha ndapeipychýi acéitepe.

7Pende yvy iperõmbáma, pende resa renondépe ojejatapy pende táva rehe ha tetã ambueygua ho’upa pende koga’a, ha ombyaipa pende yvy Sodóma peguaréicha.

8Ha Jerusalen opyta ku ogaguy parralty peguáicha, ku tapỹi merõndy peguáicha ha ku táva oñemongorávaicha.

9Ha yvága atykuéra Jára nañanemohembýi rire mbovymi jepe, jajoguaiteva’erãmo’ã Sodóma ha Gomórrape.

Mba’éichapa ñamomba’eguasu Ñanderuetépe

10Mburuvichakuéra Sodóma pegua, pehendu Ñanderuete ñe’ẽ; pejapysaka peẽ Gomorraygua ore Jára rembiapoukapy rehe.

11Ma’erã piko iporãta chéve pene kuave’ẽmby hetaitéva, he’i pende Ruete. Umi ovecha mácho peẽ pehapypáva kuave’ẽmby ramo ha pene rymba kyrakuégui chemonguerái; ndaipotái tóro, ovecha ni kavara mácho ruguykue.

12Máva piko ojerure ko’ã mba’e pende pógui, ha máva piko oipota peẽ peñemboja che renondépe pepyrũmba rei hag̃ua che rogaguasu korapy rehe.

13Anive peguerútei chéve kuave’ẽmby tova mokõi reheve; pene mba’e ryakuã porã chembopy’aro; pende arete, jasyra’y ha sábado chemonguerái.

14Pende jasyra’y ha pende areteguasu ombojeguaru che ánga; ipohyieterei chéve g̃uarã; chekane’õma agueropu’akave hag̃ua ko’ã mba’e.

15Pemopu’ã jave pende pokuéra peñembo’e hag̃ua, che resa amboykéta pendehegui; ha peñembo’e heta hetave ramojepe, Che napohendumo’ãi; pende po henyhẽgui pende rapicha ruguykuégui.

16Pejejohéi ha peñemopotĩ, peipe’a che resa renondégui pene rembiapo vai; anive pejapótei mba’evai.

17Peñeha’ã uvei pejapo hag̃ua mba’eporã, pembojovake porã, pemopu’ã umi ojejopývape, peipytyvõ ityre’ỹvape, peñangareko imenave’ỹva rehe.

18Ha upéi ae peju, he’i pende Ruete, ñañombojovake hag̃ua ha pene rembiapo vai ramojepe ku ao pytãicha oñemomorotĩta ama rayvi rypy’áicha ha pytã ramo ku púrpuraicha (ao pytãite), oñemomorotĩta ovecha rague morotĩvaicha.

19Peneñe’ẽrenduse ramo, pe’upáta koga’a porãngue;

20napeneñe’ẽrenduséi ramo ha peñemoĩve ramo pehóvo pende Ruete rehe, peñehundipáta kyse puku rupi; pende Ruete juru he’i ko’ã mba’e pendeavisa hag̃ua.

Jerusalen ohupitýta justícia

jehavira rupi

21Mba’éicha rupípa nde Jerusalen repoi nde jeroviágui, reiko hag̃ua kuña reko vai ramoguáicha. Jerusalen ningo henyhẽva’ekue justíciagui ha justícia renda voiva’ekue; ko’ág̃a katu umi oporojukáva oiko ipype.

22Nde óro morotĩgui oiko hevorakue, nde víno ojehe’apa y reheve.

23Ne mburuvichakuéra opyrũ teko porã rehe ha oiko mondaha ramo; maymáva ohayhu pirapire ñemiha megua, ha oipotánte jopói; ityre’ỹvape noñepytyvõi, ha nombojovake porãi umi imenave’ỹvape.

24Upévare, he’i pende Ruete, yvága atykuéra Jára, pe ipu’akapáva Israel retãme: Cháke añembopy’arorýta cherehe ija’e’ỹva rehe amyengoviávo ichupekuéra hembiapo vaikuére.

25Che po amopu’ãta nderehe, amopotĩta nde rekove, nde nepotĩete hag̃ua aipe’apáta ne mba’e ky’akue.

26Umi ombojovakeva’ekue aru jevýta ne rekombo’e porã hag̃ua ymaguaréicha ha upéi reñembohéra jevýta: Táva oĩha justícia ha ojerovia porãva rendag̃ua.

27Jehavira rupi oñemopotĩta Jerusalénpe ha umi ojeroviáva Ñanderuete rehe ojesalváta imborayhu rupi.

28Ha umi oñemoĩva Ñanderuete rehe hembiapo vai rupi oñehundipáta ha umi opoíva guive Ñanderuetégui oñemongu’íta avei.

29Ha peñemotĩ joava’erã pehayhu ha pemomba’eguasu haguére umi yvyra tuicháva ha umi ka’avoty peiporavova’ekue rehe.

30Peikótagui ku yvyra encína rogue pirukuéicha ha ka’avoty hi’y’ỹváicha.

31Pe imbaretéva ojogua kapi’i pirúpe, ha hembiapokue tata pirirípe; ha mokõivéva okáita ha avave nomboguemo’ãi.