1Ani oremomba’eguasu, Nde, ore Ruete, aníkena oréve, nde rérante toñemomba’eguasu, Nde reko poriahuvereko ha ne ñe’ẽ añetegua rehehápe.
2Mba’érehe piko umi ojerovia’ỹva Ñanderuetére he’ikuaa: Mamópa oime ko’ág̃a Ijára.
3Ore Jára oĩ yvágape, ha opaite mba’e ojaposéva guive ojapóta avei katuete.
4Ijára gua’ukuéra katu kuimba’e rembiapokuénte, pláta térã órogui ojapova’ekue hikuái.
5Ijuru, noñe’ẽi; hesa, ndohechái;
6ijapysa, nohendúi; itĩ, nohetũi.
7Ipo ramojepe, ndopokói mba’eve rehe; ipy ramojepe ndoguatái, noñe’ẽi ijahy’o rupive.
8Upéicha avei ijapohare, ha oimeraẽ ojeroviáva guive hesekuéra.
9Nde, Israel retã, ejeroviána Ñanderuete rehe, Ha’émante nepytyvõta ha Ha’émante oñangarekóta nderehe.
10Aaron róga, pejeroviáke Ñanderuete rehe, Ha’ehína pene pytyvõhára ha pene mo’ãha.
11Peẽ pekyhyjéva Ñanderuetégui, pejerovia avei Ñanderuete rehe, Ha’égui pene pytyvõhára ha penemo’ãva.
12Ñanderuete imandu’a ñanderehe, Ha’e ñanderovasáta. Ohovasáta avei Israel róga, ohovasáta avei Aaron róga.
13Ha’e ohovasáta umi okyhyjéva guive ichugui, michĩva ha tuichávape.
14Ñanderuete penembohetáta, peẽme ha pende ra’ykuérape avei.
15Peẽ ningo Ñanderuete jehovasapyre, yvága ha yvy apohare.
16Umi yvága Ñanderuete mba’e, ha pe yvy Ha’e ome’ẽva’ekue yvyariguakuérape g̃uarã.
17Umi omanova’ekue nomomba’eguasumo’ãi Ñanderuetépe, ha avave umi oguejýva pe tenda kirirĩháme nomomba’eguasúi ichupe.
18Ñande katu ñamomba’eguasu Ñanderuetépe, ko’ag̃aite guive ha opaite ára peve. Alelúia, pemomba’eguasu Ñanderuetépe.
Who We AreWhat We EelieveWhat We Do
2025 by iamachristian.org,Inc All rights reserved.
