Ezequiel 37 - Biblia en Guaraní - ?anderuete ?e’? Por? 2015

Oñemoingove jevýta Israel retãme

1Ñanderuete po ou cheári ha Ipytu Porãitéva chereraha ha chemboguejy peteĩ yvypépe henyhẽva kanguégui.

2Ha chembohasa ijerekuévo, ha péina ápe hetaiterei kangue oĩ pe ñu ape rehe ha ikãmbaite.

3Ha he’i chéve: Kuimba’e ra’y, oikove jevýnepa ko’ã kanguekuéra. Ha che ha’e: Che Jára, Ndémante reikuaa.

4Upérõ he’i chéve: Eñe’ẽ ko’ã kangue ko’ãva rehe, ha ereuka ichupekuéra: Kangue ikãmbambyréva, pehendúke pende Ruete ñe’ẽ,

5péicha he’iuka pende Ruete ko’ã kangue ko’ãvape: Pema’ẽ porãke, Che voi amoĩta pe Pytu Porã pendepype, peẽ peikove jevy hag̃ua.

6Ha amoĩta pendeári tajygue, ha amongakuaáta pendeári to’o ha pende apére amoĩta pire peneñu’ã hag̃ua, ha amoĩta pendepype Pytu Porã peikove hag̃ua, ha peikuaáta Che ha’eha pende Ruete.

7Uperire che amomarandu oje’e haguéicha chéve; ha oiko peteĩ tyapu che añe’ẽ jave, ha péina ápe oñemongu’epa hikuái; ha umi kangue ojoaju ojuehe, peteĩteĩ oñembojoaju iñirũtee rehe.

8Ha ama’ẽ, ha péina tajyguekuéra ha to’o okakuaa, ha pe pire oñuãmba umívape, ipypekuéra katu ndaipóri gueteri Pytu Porã.

9Ha he’i chéve: Kuimba’e ra’y, eprofetiza ha ere pe Pytu Porãme péicha pende Ruete he’i: Pytu Porã eju umi irundy yvy apýragui ha eipeju ko’ã ojejukava’ekue ári, oikovepa jevy hag̃ua.

10Ha amomarandu Ha’e he’i haguéicha chéve, ha pe Pytu Porã oike ipypekuéra, ha umi kanguekue oikovepa, ha oñembo’y joa hikuái peteĩ soldádo aty ndetuichaitévaicha.

11Upéi Ha’e he’i chéve: Kuimba’e ra’y, ko’ã kangue ningo Israel retãyguakuéra voi. Eikuaa porãke, ha’ekuéra péicha he’i: Ore kanguekuéra ikãmba ha ore jerovia opa rei, roñehundipapyréma ore,

12upévare, emomarandu, ha ere: Péicha he’i pende Ruete, peikuaa porãke, Che voi aipe’áta pende tyvy (sepultúra) ñembotyha, peẽ voi ningo che retã tee, ha Che pomopu’ãta pende tyvýgui pogueru jevy hag̃ua Israel retãme,

13peikuaa hag̃ua Che ha’eha pende Ruete, aipe’a vove pende tyvy poguenohẽ hag̃ua, peẽ voi ningo che retãtee.

14Ha amoĩta che Pytu Porãitéva pendepype peikove hag̃ua, ha Che pomboguapýta pende yvyteépe; ha peikuaáta Che, pende Ruete, añe’ẽma hague; ha ajapopáta ha’e haguéicha, he’i pende Ruete.

Juda ha Israel oiko jevýta oñondive peteĩ tetã ramo

15Ou chéve Ñanderuete ñe’ẽ ha he’i:

16Kuimba’e ra’y, ejapyhy ko’ág̃a peteĩ yvyra pehẽngue, ha ehai hi’ári: Juda ha iñirũ Israel ra’ykuérape g̃uarã. Upéi ejapyhy ambue yvyra pehẽngue, ha ehai: Jose, Efrain yvyra, ha opaite Israel tríbupe g̃uarã.

17Upéi eñapytĩ oñondive, toiko ichuguikuéra peteĩnte, ha peteĩnte ramo topyta nde pópe.

18Ha ne retãyguakuéra oporandu ramo ndéve he’ívo: Naorembo’emo’ãi piko mba’épa he’ise ko’ã mba’e.

19Upérõ eréta ichupekuéra: Péicha he’i pende Ruete: Peikuaa porãke, Che ajapyhy Jose yvyra pehẽngue oĩva Efrain pópe, ha iñirũnguéra, Israel tribukuérape, ha amoĩta Juda yvyra reheve, ha ajapóta ichuguikuéra peteĩ yvyra pehẽnguénte ha peteĩ tetã ramoguáichante opytáta che pópe.

20Ha umi yvyra pehẽngue rehaiva’ekue oĩva’erã nde pópe hesakuéra renondépe,

21ha eréta ichupekuéra: Péicha he’i pende Ruete, pema’ẽ porãke, Che ambyatýta umi Israel ra’ykuérape umi tetã ambuépe oho haguégui, agueru jevy hag̃ua ichupekuéra ijyvyteépe;

22ha ajapóta ichuguikuéra peteĩ tetãnte Israel cérrope, ha peteĩ tetã ruvicha añónte oisãmbyhyva’erã ichupekuéra; ha araka’eve ndoikomo’ãvéima mokõi tetã ramo ha araka’evéma noñemboja’oveiva’erã hikuái.

23Ha noñemongy’aveiva’erã ambue jára ñemomba’eguasu rupi ni hembiapo vai rupi ha Che amopotĩta ichupekuéra heko vaígui; ha oikóta hikuái che retã ramo, ha Che Ijaratee ramo.

24Che rembiguái David oikóta hetã ruvicha ha herekua ramo, upérõ iñe’ẽrendúta ha hekoitépe ojapopáta hikuái che rembiapoukapykuéra.

25Che rembiguái Jacóbope ame’ẽva’ekue ko yvy oiko hag̃ua ipype, pende rukuéra oiko haguépe avei; ipype oikóta ita’yrakuéra ha ita’yrakuéra ra’yre jevy jey opaite ára peve; ha che rembiguái David oikóta imburuvichaguasu ramo opaite árape.

26Ha ñañombopy’apeteĩ oiko hag̃ua hikuái tapia g̃uarã py’aguapýpe, amohenda porãta ichupekuéra, amoñemoñáta ichupekuéra, ha amoĩta che rogaguasu ijapytepekuéra opaite árape g̃uarã.

27Ijapytepekuéra oĩta che rogaguasu, ha aikóta Ijaratee ramo, ha ha’ekuéra oikóta chéve che retã ramo.

28Ha ambue tetãnguéra oikuaáta Cheha, Ijaratee, amboheko potĩmaha Israélpe, oĩgui che rogaguasu ijapytepekuéra opaite árape.