Job 5 - Biblia en Guaraní - ?anderuete ?e’? Por? 2015

1Esapukái katu, oĩnepa nembohováitava. Ha mba’eichagua ángel heko porãvare piko rejejokose.

2Añetehápe pe ipy’a tarováva omano ipy’aro rupi ha pe ipy’arasývape imba’epota asy ojuka ichupe.

3Che ahecha peteĩ ivýrova oñembohapo porã ohóvo, upepete voi amaldeci hekove.

4Ita’yrakuéra ndohupityiva’erã ñepytyvõ porã ha ñembojovakehápe oñemyangekõi ichupekuéra, ha ndaiporiva’erã avave oguenohẽva ichupekuéra ijejopy vaígui.

5Umi iñembyahýiva ho’upáta iñemitỹngue, ñuatĩ kupégui jepe, ha umi ijy’uhéiva omboy’upáta imba’erepyeta.

6Pe jepy’apy asy nosẽi yvy timbógui, ha pe jehasa asy naheñóiri yvýgui.

7Ha’e ku tata pirirícha ovevéva tatapỹigui, péicha kuimba’e ha kuñakuéra ou yvy apére ohasa asy hag̃ua.

8Añetehápe che apyta rire ne rendaguépe aporanduva’erãmo’ã Ñanderuetépe ko chéve ojehúva rehe ha amoĩva’erãmo’ã opaite mba’e ipópe.

9Ha’e ojapo tembiapo tuichaitereíva ikatu’ỹva ojekuaapa, ha hembiapo techapyrãva (milagrokuéra) ndojepapakuaái.

10Ha’e ombou ama yvy ári ha omohe’õ porã ko yvy kóvape.

11Ha’e omopu’ã umi oñemomirĩvape, ha umi imba’embyasývape, Ha’e ombovy’a jevy ichupekuéra oiko hag̃ua py’aguapýpe.

12Ñanderuete ombyai heko vaíva pensamientokuéra, ani hag̃ua ipokuéra ojapótei tembiapo vai.

13Ñanderuete voi oity umi ipy’aróva heko vaípe, ha ombyai umi iñañáva rembiapo vai.

14Araitépe oñepysãnga hikuái iñypytũrõ guáicha, ha asaje pytépe opovyvy hikuái ku pyharérõ guáicha.

15Péicha Ñanderuete oguenohẽ imboriahúvape umi mba’evai apoha jurúgui, pe imbaretéva pógui ha ikyse pukúgui.

16Péicha ikangýva oha’ãrõ ou hag̃ua iñepytyvõ ha Ñanderuete voi omboty umi iñañáva juru.

17Eikuaa porãke, ovy’aite pe kuimba’e Ñanderuete oja’o ha ohekombo’évape, upévagui anítei ndepochy Ha’e ndeja’o ha nerekombo’ese ramo.

18Ha’e ningo oporokutu ha Ha’e voi ojokua jevy oikytĩ haguépe, Ha’e ombohasy ha ipokuéra omonguera jevy.

19 Seis jehasa asýgui Ha’e neguenohẽta ha pe jehasa asy 7-ha nanderupitymo’ãvéima.

20Nde neremanomo’ãi ñembyahyiguasu oútavape ha Ha’e oñangarekóta nderehe ani hag̃ua pe kyse puku nderupity ñorãirõguasúpe.

21Ha’e nemo’ãta ñe’ẽ vaígui ha nderekyhyjemo’ãi ou vove pe ñehundiha ára.

22Ñehundi ha ñembyahýire repukáta, ha nderekyhyjemo’ãi mymba ñarõ ñu rupiguágui.

23Umi ita kokue rupigua reheve jepe reñembopy’apeteĩ, ha umi mymba ñarõ ñu rupigua nderayhu.

24Nde rogapýpe oĩta py’aguapy, ha nde reikohápe mba’eve nokañymo’ãi.

25Upéicha rehecháta avei ne ñemoñarenguéra oñembohetátava, ha nde ra’ykuéra oñemosarambipáta ku ñana yvy ape ariguáicha.

26Ndetuja porã rire reikéta nde tyvýpe, ku trígo apesã oñemono’õ háicha hi’aju porãmba rire.

27Ema’ẽ porãke ko’ã mba’e rehe, umía ore roheka ha rojohu oĩha upeichaite, upévagui neñe’ẽrendúke Ñanderuetépe oho porãmba hag̃ua ndéve opaite mba’e.