1Che ha’emava’ekue: Pehendúke, peẽ, Jacóbo karaiguasukuéra ha Israel ruvichakuéra. Ndaijái piko peẽme peikuaa porã hag̃ua mba’épa he’ise justícia.
2Peẽ ndapehayhúi mba’eporãva, mba’evaínte pehayhu, peipire’óva ha peipe’áva ho’o ikanguégui.
3Peẽ pe’u che retãygua ro’o, peipe’a ipire hetégui, pemopẽ ikãnguekuéra ha hete ro’o peikytĩ oñekytĩ háicha so’o ojeitýva óllape ojy hag̃ua.
4Og̃uahẽta katuete pe ára pehenoitaha pende Ruetépe, Ha’e katu nopenamo’ãi penderehe, upe ára upévape omokañýta hova pendehegui, pejapo haguére heta tembiapo ivaietéva.
5Péicha Ñanderuete he’i umi proféta (gua’u) rehe, ombotavýva che retãyguakuérape: Ha’ekuéra omoherakuã mba’eporã umi omongaru porãvape proféta gua’ukuérape, umi omongaruse’ỹvape ichupekuéra katu omoherakuã mba’evai.
6Upévare iñypytũmbáta peẽme ha ndojehechaukamo’ãvéi mba’eve, pe kuarahy okañýta profetakuéragui ha pe ára sakã rãngue oikóta pyhare ramo.
7Ha oñemotĩta umi proféta japu ha umi imba’ekuaáva, ha’ekuéra ombotýta ijuru, Ñanderuete noñe’ẽmo’ãvéigui ichupekuéra.
8Che katu, cherenyhẽ Ñanderuete Pytu Porãitéva ha ipu’akágui, amombe’u hag̃ua justícia ha pu’aka, ha ahechauka hag̃ua Jacóbo ñemoñarenguéra reko iñañaha, ha Israelguakuéra rembiapo ivaiteha.
9Pehendúke, peẽ pemyakãva Jacóbo rogaguasukuéra ha peẽ Israel retã ruvichakuéra, peẽ pemboyke pe justícia ha pemokarẽ pe añetegua.
10Tuguy reheve pemopu’ãva’ekue Sion, ha justicia’ỹre pemopu’ãva’ekue Jerusalen.
11Huvichakuéra ombojovake pirapire ñemiha megua reheve ha pa’ikuéra ombojovakesénte oñembopopegua ramo ichupekuéra, ha iproféta pirapire rupínte ombohasase imarandu ha he’i hikuái Ñanderuete oĩha ñanendive, mba’eve ivaíva ndojehumo’ãi, Ñanderuete oĩgui ñande apytépe.
12Peẽ peiko vai haguére Sion yvy oñembovóta kokuéicha ha Jerusaléngui oikóta tapere atýra, ha che rogaguasu oñemopu’ã haguépe oikóta ka’aguyguasu.
Who We AreWhat We EelieveWhat We Do
2025 by iamachristian.org,Inc All rights reserved.
