1David ha iñirũnguéra ou jevy ramo pe ára mbohapyhápe Siclágpe, umi Amalecgua oikéra’e pe tava’ípe ha pe yvy ijerekuévo oĩvape, ha omonandi hikuái Siclag ha upéi ombojepotara’e hese tata.
2Ha ogueraha hembiguái ramo hembirekokuéra ha mayma upépe oĩvape, michĩvéva guive tuichavéva peve; ndojukái katu avavépe, oguerahapánte ichupekuéra ohokuévo.
3David ha iñirũnguéra og̃uahẽvo pe tava’ípe ojohu okaipa hague; hembirekokuéra, ita’ýra ha itajyrakuéra katu ojererahapára’e tembiguái ramo.
4Upémaramo David ha iñirũnguéra ojahe’o sapukaipópe, ha hasẽ hikuái ndaikatuveiha peve.
5Mokõive David rembireko, Ahinoam, pe Jisreelgua, ha Abigail, Nabal, pe Carmelgua rembirekore, ojegueraha avei tembiguái ramo.
6Ha David ojepy’apyeterei; hetãyguakuéra katu ojukase ichupe, oñembyasyetereígui ita’ýra ha itajyrakuéra rehe, David katu oñemombarete Ñanderuete, Ijaratee ndive.
7Ha David he’i pa’i Abiatar, Ahimélec ra’ýpe: Ajerure ndéve, eru chéve ao jeguaka pa’i omondéva. Ha Abiatar ogueru pe ao David rendápe.
8Ha David omba’eporandu Ñanderuetépe he’ívo: Ahátapa ko’ã ouva’ekue omonda hag̃ua rapykuéri. Ikatútapa ahupity. Ha Ha’e he’i ichupe: Tereho katu ha emuña, añetehápe rehupitýta ichupekuéra, ha reguerupáta umi ojeguerahava’ekuépe tembiguái ramo.
9Ha David ha umi 600 kuimba’e hendive oĩva, oho ha og̃uahẽ Besor ysyry peve, ha upépe opyta 200 kuimba’e ijapytégui.
10Ha David oho tenonderã gotýo, 400 kuimba’e ndive; umi ambue 200 opyta, ikane’õitereígui ndaikatuvéi ohasa Besor ysyry mboypýri.
11Ha pe ñu rehe ohug̃uaitĩ hikuái peteĩ kuimba’e Egiptoygua ha ogueru David rendápe, ha ome’ẽ ichupe pan ho’u hag̃ua ha omboy’u avei ichupe.
12Ha ome’ẽ avei ichupe peteĩ pan he’ẽ pehẽngue higoguiguáva ha mokõi parral apesã ikãmbyréva. Ha okarupa rire oñemokyre’ỹ; ndo’uvéigui pan ni ndoy’uvéigui mbohapy ára ha pyhare.
13Ha David he’i ichupe: Mávapa nde jára, ha mamoguápa nde. Ha pe karia’y Egiptoygua he’i: Che ningo peteĩ Amalecgua rembiguái, che jára chereja cherasýgui, ko’ág̃a ojapóma mbohapy ára.
14Rohókuri rojeity umi Ceretgua ári ha Juda retã yvy gotyomi, ha Siclag rehe romyendy tata.
15Ha David he’i ichupe: Ndépa ikatu chereraha pe aty pévape. Ha ha’e he’i: Reme’ẽ ramo chéve ne ñe’ẽ Ñandejára rérape ndachejukamo’ãiha, ha ndacherejamo’ãiha che jára pópe, upéicha ramo che rogueraháta ijatyhápe.
16Ha og̃uahẽvo icampaméntope ojohu ojapajereipa hikuái yvy ári, okaru ha oka’u joa ha oĩ vy’aguasúpe, oguerúgui Filisteaygua ha Judaygua retãnguéragui heta mba’e.
17Ha David ojuka ichupekuéra ambue pyharevete guive ka’aru peve; ichuguikuéra katu okañy 400 karia’y ojupiva’ekue icamellokuéra ári.
18Upéicha David oipe’apa jevy opaite mba’e Amalecguakuéra ojapyhyva’ekue ha oipe’a jevy avei ichuguikuéra mokõive hembireko.
19H a avei opaite umi ojeguerahava’ekue umi mba’eita apytépe, michĩ ha tuicháva, ita’ýra ha itajyrakuéra, oguerupa jevy hikuái Siclágpe.
20David ogueraha avei opaite ovecha ha mayma hymba tuicháva ha umi kuimba’e oguerúva he’i joa: Ko’ã mba’e ningo ko’ág̃a David mba’e.
21Ha David og̃uahẽvo Besor ysyrýpe, oheja haguépe umi 200 kuimba’e, ikane’õitereígui hikuái ndaikatuveiva’ekue oho David ndive, ha’ekuéra osẽ joa ojejohu hag̃ua David ha opaite iñirũnguéra ndive. Ha David og̃uahẽvo hapichakuéra rendápe, omomaitei ichupekuéra py’aguapýpe.
22Upéramo umi iñaña ha ipy’aróva ohova’ekue David ndive he’i hikuái: Ko’ãva ndohói haguére orendive, noñeme’ẽmo’ãi ichupekuéra mba’eve roguerúvagui, rome’ẽtante ichupekuéra hembireko ha ita’yrakuéra, upévante toñeme’ẽ ha toho hikuái.
23David katu he’i: Che ryke’ykuéra, Ñanderuete voi ome’ẽmba jevy ñandéve ñane mba’éva. Ha’e oñangarekógui ñanderehe, ha omoĩve ñande pópe jaguerekova’ekuégui, upévare anítei péicha pejapo.
24Avave nde’imo’ãi iporãha pene ñe’ẽ. Umi ohóva ñorãirõháme ha umi opytáva oñangareko hag̃ua ñane mba’ekuéra rehe; mokõivéva atýpe oñeme’ẽ jojava’erã jaguerúva guive.
25Péva opyta tembiapoukapy ramo pe ára guive Israel retãme.
26Ha David og̃uahẽvo Siclágpe oguerahauka umi mba’e ogueruva’ekuégui Juda karai ancianokuérape, he’ívo: Péina ápe jopói peẽme g̃uarã umi mba’e ojepe’ava’ekue Ñanderuete rehe ija’e’ỹva pógui.
27Upéicha David oguerahauka umi jopói Betélpe, Ramot oĩva Négevpe, Jatírpe.
28Aroérpe, Sifmótpe, Estemoápe,
29Racálpe, umi Jerameel tavakuérape ha Cengua tavakuérape,
30Hormápe, Corasánpe, Atácpe,
31Hebrónpe ha opaite tendápe David oiko hague rupi iñirũnguéra ndive.
Who We AreWhat We EelieveWhat We Do
2025 by iamachristian.org,Inc All rights reserved.
