2 Crónicas 6 - Biblia en Guaraní - ?anderuete ?e’? Por? 2015

Oñeme’ẽ Ñanderuete róga

1Upéramo Salomon he’i: Ñanderuete he’imava’ekue Ha’e oikova’erãha pytũháme.

2Che amopu’ã peteĩ óga reiko hag̃ua, ha peteĩ kotyguasu Nde reĩ hag̃ua opaite árape.

3Ha tetã ruvicha ojere ha ohovasa opaite Israelgua ijatývape ha oĩva henondépe ñembo’yhápe.

4Ha Salomon he’i: Toñemomba’eguasu Ñanderuete, Israel Járape, ipo ojapóma, ijuru he’imava’ekue guive che ru Davídpe, he’írõ guare:

5Aguenohẽha ára guive che retã Israélpe Egípto retãgui, ndaiporavói Israel tribukuéra apytégui peteĩ táva oñemopu’ã hag̃ua upépe peteĩ óga che rérape g̃uarã, ha ndaiporavói avavépe che retã Israel ruvicha ramo.

6Upéi katu aiporavo Jerusalénpe, che réra oĩ hag̃ua ipype, ha aiporavo Davídpe oiko hag̃ua Israel ruvicha ramo.

7Ha che ru David omopu’ãseva’ekue peteĩ ogaguasu Ñanderuete, Israel Járape g̃uarã.

8Ñanderuete katu he’i che ru Davídpe: Rejapo porãkuri remopu’ãsévo che rérape peteĩ ogaguasu.

9Nde katu neremopu’ãmo’ãi pe óga, nde ra’y, osẽtava ndehegui uvei, ha’e omopu’ãta peteĩ óga che rérape.

10Ha Ñanderuete ojapopa he’i hagueichaite, che ningo apyta che ru David rendaguépe, ha aguapy Israel retã ruvicha guapyhaguasúpe, Ñanderuete he’i haguéicha, ha amopu’ãma peteĩ óga Ñanderuete, Israel Jára rérape g̃uarã.

11Ha ipype amohenda Ñanderuete karameg̃ua, ha ipype oĩ pe ñembopy’apeteĩ, Ha’e ojapova’ekue Israel ñemoñarenguéra ndive.

12Upéi Salomon oñemoĩ Ñanderuete kuave’ẽmby renda rovái, opaite Israelgua ijatýva renondépe ha omopu’ã ipo.

13Salomon ojapógui peteĩ pyenda bróncegui ipukúva 2,18 métro ha ipýva 2,18 métro ha ijyvate 1,20 métro ha pe pyenda omohenda pe korapy mbytépe; ha ojupi hi’ári, ha oñesũ mayma Israelgua ijatýva rovake ha omopu’ã ipo yvága gotýo, ha oñembo’e:

14Ore Ruete, Israel Jára, ndaipóri ambue Jára ndejoguaha yvága ni yvýpe; Nde rejapo ne ñe’ẽ ere haguéicha ha reiporiahuvereko ne rembiguaikuérape, oikóva guive ipy’aite guive ne renondépe.

15Rejapopa ereva’ekue ne rembiguái, che ru Davídpe; opaite mba’e Nde eréva nde juru rupi, nde po ojapo avei, ojehecha háicha ko ára kóvape.

16Ko’ág̃a, ore Ruete, Israel Jára, ejapo umi mba’e Nde ereva’ekue ne rembiguái, che ru Davídpe: Tapiaite oĩta peteĩ kuimba’e David ñemoñare apytégui che renondépe ha oguapýtava Israel retã ruvicha guapyhaguasúpe, oñangarekóva che ra’ykuéra rehe, oguata guive che rapére ha ojapo guive hekoitépe che rembiapoukapykuéra, nde reiko haguéicha che renondépe.

17Ko’ág̃a, ore Ruete, Israel Jára, toiko pe ñe’ẽ ereva’ekue ne rembiguái Davídpe.

18Añete piko ore Ruete oikóta yvyariguakuéra ndive yvy apére. Péina ápe, umi yvagakuéra ndaikatúi nderereko; ko’ytevépa ikatúne ko óga che amopu’ãva’ekue ndéve g̃uarã.

19Ejapysakamína ne rembiguái ñembo’e rehe ha imba’ejerure rehe, ha che Ruete, che Jára, ehendu ne rembiguái mba’ejerure asy ha pe ñembo’e ha’éva ne renondépe.

20Nde resa toñangareko ko óga kóva rehe ára ha pyharépe, ko óga Nde ereva’ekue rehe: Che réra oĩta ipype; ehendumína pe ñembo’e ne rembiguái ojapóva ko’águi.

21Upéicha ehendumína avei ne rembiguái mba’ejerure asy ha ne retã Israel ñembo’e ojapóva ko’ápe, Nde rehendútava yvága guive, nde reikohápe; ehendu ha eperdona.

22Oimeraẽva oñemoangaipáva hapicha rehe, ha ojopy ichupe ome’ẽ hag̃ua iñe’ẽ ha ou ramo ome’ẽ hag̃ua iñe’ẽ ne kuave’ẽmby renda renondépe ko óga kóvape,

23upérõ ehendumína ichupe yvága guive, ha embojovake ne rembiguaikuérape, ha emyengovia iñañáva rembiapo, ha eity jevy hembiapo vaikue iñakã ári, ha emyengovia heko potĩva rembiapo porã ijustícia rupi.

24Ha ne retã Israel oiko ramo sarambikuépe hese ija’e’ỹva renondépe oñemoangaipágui nendive, ha heko porã jevy ramo ha omomba’eguasu jevy ramo nde réra ha omba’ejerure asy ramo ne renondépe ko óga kóvape,

25upérõ ehendumína ichupe yvága guive, ha eperdona ne retã Israel angaipa, ha egueru jevy ichupekuéra pe yvy reme’ẽva’ekuépe ichupekuéra ha ituvakuérape.

26Ha pe yvága oñemboty ha ndokyvéi ramo, ha’ekuéra oñemoangaipágui ne renondépe, ha oñembo’e ramo ndéve ko oga kóvape, ha omomba’e añete porã ramo nde rérape, ha opoi jevy ramo hi’angaipakuéragui oñembyasýgui, hikuai,

27upérõ ehendu ichupekuéra yvága guive ha eperdonamína ne rembiguaikuérape ha ne retã Israel angaipa, ha ehechauka jevy ichupekuéra tape porã oiko hag̃ua ipype hikuái, ha emongymi jevýna ijyvy ári, Nde reme’ẽva’ekue ichupekuéra imba’ete ramo.

28Ha oĩ ramo ñembyahýi hetãme térã mba’asy iñasãiva, térã oĩ ramo ñemitỹnguéra rehe mba’asy, térã tuku, térã tig̃ua’ã, térã hese ija’e’ỹvakuéra omongora ramo itávape térã oimeraẽva mba’evai térã oime haichagua mba’asy,

29upérõ peteĩ kuimba’e térã opaite ne retã Israel, oñembo’e ramo oipysóvo ipo ko óga gotýo,

30ehendumína ichupe yvága guive, nde reikohápe, ha eperdona ichupekuéra, eme’ẽ jevy peteĩteĩvape oguata haguéicha nde rape rehe, Nde añoiténte reikuaa porã tetãyguakuéra py’apy ha oĩva guive ipype.

31Tokyhyje ndehegui ha toiko nde rape rehe, oikove aja pukukue ko yvy ári, Nde reme’ẽmava’ekue ore rukuérape.

32Ha tetã ambueygua ou ramo tetã mombyrýgui oñemoherakuã porãgui upépe nde réra ha ohendu haguére nde pu’akágui ha oñembo’e ramo ko óga kóvape,

33ehendumína ichupe yvága guive, Nde reikohápe, ha ejapo pe ha’e omba’ejerure asýva; ikatu hag̃uáicha opaite tetãnguéra yvy ape árigua oikuaa nde réra, ha tokyhyje avei ndehegui, ne retã Israel ojapo háicha, ha toikuaa hikuái nde réra oñehenoiha ko óga kóvape, che amopu’ãva’ekue nde rérape.

34Ha ne retã osẽ ramo ojeity hag̃ua hese ija’e’ỹvakuéra ári pe tape Nde remondoha rupi ichupekuéra, ha oñembo’e ramo ndéve ko táva kóvagui, Nde reiporavova’ekue ha che amopu’ãva’ekue nde rérape g̃uarã,

35upérõ ehendumína yvága guive iñembo’e, imba’ejerure asy ha eipytyvõ ichupekuéra.

36Ha oñemoangaipa ramo hikuái ne renondépe, eperdonami ndaipóri voi kuimba’e iñangaipa’ỹva, ha ndepochy ramo hendivekuéra, ha remoĩ ramo hese ija’e’ỹvakuéra pópe, ojereraha hag̃ua ñapytĩháme umi hese ija’e’ỹva retãme, tamombyry térã tahi’ag̃ui,

37ha pe tetã ojereraha haguépe ñapytĩháme omba’apo rei hag̃ua upépe ojevy jey ramo hape vaígui ha omba’ejerure asy ramo ndéve, ha he’i ramo hikuái: Ore roñemoangaipa ore reko ñaña rupi,

38ha ojevy ramo ndéve ipy’aite ha hi’angaite guive, ha oñembo’e ramo ko yvy reme’ẽva’ekuépe ituvakuérape, pe táva Nde reiporavomava’ekue, ha ko ógape che amopu’ãva’ekue nde rérape g̃uarã,

39upérõ ehendumína iñembo’e yvága guive, Nde reikohápe, ha ejapysakamína imba’ejerurekuéra rehe, ha eperdona ne retã oñemoangaipava’ekue ne renondépe.

40Ko’ág̃a, che Ruete ha che Jaratee ajerure ndéve, nde resa ha nde apysa toñangareko opaite ñembo’e rehe ojejapóva ko’águi ndéve g̃uarã.

41Che Ruete ha che Jára, epu’ãmína ko’ág̃a reiko hag̃ua ndepytu’uhápe, eju ne karameg̃ua oĩha nde pu’aka reheve; Che Ruete ha che Jaratee, nde pa’ikuéra toñemonde nde salvaciónpe, ha umi kuimba’e Nde remboheko potĩva tahory joa ndepy’a porãite rupi.

42Ore Jára ani remboykétei Nde reiporavova’ekuépe, ha nemandu’a pe poriahuvereko reguerekova’ekue rehe ne rembiguái David ndive.