1Upéi Samuel he’i Saúlpe: Ñanderuete voi chemondova’ekue roiporavo hag̃ua, romonávo acéitepe Israel retã ruvicha ramo, upévarehe ejapóke hekoitépe Ñanderuete ñe’ẽ.
2Péicha he’i Ñanderuete, yvága atykuéra Jára: Che ahaviráta Amalécpe hembiapo vaikue rehe, Israel osẽ ramo guare Egíptogui, ha’ekuéra ojeity haguére hesekuéra tape rehe.
3Tereho katu ha ehundi Amalécpe, ha ejukapa oikovéva guive, ani reiporiahuverekótei; ejuka kuimba’ekuéra, kuñakuéra, mitãkuéra ha okambúvape jepe, ha avei ivaka, ijovecha, icaméllo ha iburrokuérape.
4Saul ombyatyuka hetãyguakuérape Telaímpe ha oipapa 200.000 soldádo yvy rupiguáva, ha 10.000 kuimba’e Judayguáva.
5Ha Saul ou Amalec táva ypýpe ha omoĩ ñuhã umi cérro pa’ũme (vállepe).
6Ha Saul he’i umi Cenguápe, tapeho, pejei ha pesẽ Amalecguakuéra apytégui, anítei che pohundi hendivekuéra; peẽ peiporiahuvereko haguére Israelguakuérape, osẽ ramoguare Egíptogui. Ha umi Cengua ojehekýi Amalec ra’ykuéra apytégui.
7Ha Saul omotimbo Amalecguakuérape Havila guive Shur peve, péva opyta Egíptogui kuarahyresẽ gotýo.
8Ha Saul oapresa Agag, Amalec retã ruvichápe hekove reheve, ha mayma ambue tetãyguakuérape katu ojuka kyse rãimbépe.
9Saul ha hetãyguakuéra ndojukái katu Agágpe, ni umi ovecha iporãvéva, hymbakuéra tuicháva, hymba oñemongyrapyréva, umi ovecha mácho ha opaite hymba iporãva guive, nohundipaséi; umi ivaíva ha ojepota’ỹva guivénte ohundipa hikuái.
10Ha Ñanderuete ñe’ẽ ou Samuélpe, ha he’i ichupe:
11Ambyasy amoĩ haguére Saúlpe tetã ruvicha ramo, ojevýgui che rapykuérigui, ha ndojapói che ñe’ẽ. Ha Samuel ojepy’apyeterei, ha upe pyhare pukukue omba’ejerure asy Ñanderuetépe Saul rehe.
12Ko’ẽ mboyve Samuel opu’ã oho hag̃ua Saul rendápe, ha oñemombe’u Samuélpe, Saul ou hague Cármelpe, ha upépe omopu’ã ijupe g̃uarã itaguasu ñembo’y mandu’arã, ha upégui ojere, ha ohasa henonderã gotýo ha oguejy Gilgálpe.
13Samuel ojejohúvo Saul ndive, Saul he’i ichupe: Ñanderuete tanderovasa; che ajapopa Ñanderuete he’íva guive.
14Upéramo Samuel he’i: Mba’eichagua ovecha ha vaka rasẽ piko ahendu ko che apysa rupi.
15Ha Saul he’i: Amalécgui ogueru hikuái; tetãyguakuéra ndojukaséi umi iporãvéva ovecha ha vakakuéra apytégui, ohejase kuave’ẽmbyrã ramo Ñanderuetépe g̃uarã, ha mayma hembyre rohundipáma.
16Upémaramo Samuel he’i: Ehejána tamombe’u ndéve Ñanderuete he’iva’ekue chéve ange pyhare. Ha Saul he’i ichupe: Ere katu.
17Ha Samuel he’i: Jepémo nde voi reñemomirĩ aja, ndoikóipa ndehegui Israel retã ruvicha, ha Ñanderuete voi piko nandeporavoiraka’e.
18Ñanderuete nemondo jokuaipy reheve he’ívo: Tereho, ehundi Amalec angaipavorakuérape ha ejeity hi’ári rehundipaite peve.
19Mba’érehe piko, nerehendúira’e Ñanderuete ñe’ẽ, rejere pe mba’eita rehe regueruva’ekue ñorãirõgui, péicha ningo rejapo vaiete Ñanderuete renondépe.
20Ha Saul he’i jevy Samuélpe: Che ajapóma Ñanderuete ñe’ẽ, ha aha jokuaipyre ramo Ñanderuete chemondo haguépe, aguerúnte Agágpe, Amalec retã ruvicha, ambue Amalecguakuérape ahundipa.
21Tetãyguakuérante ojapyhy umi ovecha ha vaka iporãvéva, oikuave’ẽ hag̃ua nde Járape, Gilgálpe.
22Ha Samuel he’i: Horýnepa Ñanderuete kuave’ẽmby ojehapypapyréva rehe ha mymba ojejukava’ekue rehe, ku hory ramoguáicha ichupe ojejapo ramo iñe’ẽ. Añetehápe, pe ñe’ẽrendu iporãve kuave’ẽmbýgui, ha pejapysaka porã iporãve ovecha mácho kyrakuégui.
23Pe iñe’ẽrendu’ỹva hembiapo vai ku paje apohára rembiapóicha, ha pe tapicha ojaposéva hapicha rembipota teévante ojapo vai omomba’eguasúrõ guáicha jára gua’úpe. Nde remboyke haguéicha Ñanderuete ñe’ẽ, Ha’e nemboykéma avei, anivéma hag̃ua reiko tetã ruvicha ramo.
24Upémaramo Saul he’i Samuélpe: Che añemoangaipa, ha ndajapói Ñanderuete ñe’ẽ, ha ne ñe’ẽ avei, akyhyjégui che retãyguakuéragui, upevarehénte amoneĩ ichupekuéra. Cheperdona ko’ág̃a che angaipa.
25Cheperdona ko’ág̃a che angaipa ha eju jevýna chendive amomba’eguasu hag̃ua Ñanderuetépe.
26Ha Samuel he’i jevy ichupe: Nahániri, ndajevymo’ãi nendive, remboyke haguére Ñanderuete ñe’ẽ, Ha’e nandepotavéima tetã ruvicha ramo Israel retãme.
27Ha Samuel ojerévo oho hag̃uáicha, Saul ojopy ijahoja apỹigui, ha péva osoro.
28Upévo Samuel he’i ichupe: Ko ára kóvape Ñanderuete omondoro ndehegui Israel retã ruvicha reko, ha ome’ẽ peteĩ nde rapichápe heko porãvéva ndehegui.
29Ha Israel Reko Jajaipáva (Ñanderuete) ndaijapúi ha ndojevýi ijehe, ndaha’éigui kuimba’érõ guáicha ojevy hag̃ua ijehe.
30Ha Saul he’i jevy: Che añemoangaipa, ajeruréko ndéve chemomba’eguasu Israel karai ancianokuéra ha tetãyguakuéra renondépe ha ejevy chendive che amomba’eguasu hag̃ua nde Járape.
31Ha Samuel ojevy Saul rapykuéri, ha Saul omomba’eguasu Ñanderuetépe.
32Upéi he’i Samuel: Pegueru chéve Agag, Amalec retã ruvichápe. Ha Agag ou py’aguasupópe hendápe. Ha he’i añetehápe jepy’apy ñemano rehegua ohasáma chehegui.
33Ha Samuel he’i: Nde kyse puku oheja haguéicha kuñakuérape imemby’ỹre, péicha avei nde sy opytáta imemby’ỹre kuñakuéra apytépe, ha upévo Samuel oikytĩ ha omopehẽnguepa Agágpe, Ñanderuete renondépe, Gilgálpe.
34Uperire Samuel oho Rámape, ha Saul ojupi hogaitépe, oĩva Gibéape.
35Upéva rire Samuel araka’eve ndohechavéi Saúlpe, ha’e oikove aja pukukue. Samuel katu ojahe’o Saul rehe; ha Ñanderuete ombyasy omoĩ haguére Saúlpe Israel retã ruvicha ramo.
Who We AreWhat We EelieveWhat We Do
2025 by iamachristian.org,Inc All rights reserved.
