Hebreoyguakuérape 13 - Biblia en Guaraní - ?anderuete ?e’? Por? 2015

Mba’éichapa Hesu Crísto rehegua oikova’erã

1Che hermanokuéra jajohayhúke mborayhu añeteguáva reheve.

2Ani pemboty pende róga mbohupakuéragui. Umi oipe’ava’ekue hóga mbohupápe g̃uarã omog̃uahẽma imbohupa apytépe yvága rembiguáipe avei oikuaa’ỹre.

3Peñemomandu’áke umi oĩvare cárcelpe ojeroviaháre, peẽ peime rõguáicha hendivekuéra cárcelpe, ha umi ohasa asýva rehe, peẽ voi peikógui gueteri avei pende retépe ko yvy ape ári.

4Pemomba’e pene mendare reko, ha peẽ pemendáva ani peñemongy’a ambue ndive. Ñanderuete voi ombojovakéta umi oñemongy’áva ha umi omongy’ávape imendare reko.

5Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5).

6Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).

7Peñemomandu’ákena pende karai ancianokuéra rehe, penerekombo’eva’ekue Ñanderuete ñe’ẽ rehe, pema’ẽ hekove katupyry rehe, ha peñeha’ã pejerovia porã ha’ekuéra ojerovia porã haguéicha.

8Hesu Crísto ningo naiñambuéi, peteĩchánte kuehe, ko ára ha ára atyguasurãme g̃uarã (por los síglos).

9Ani pepiátei Ñanderuete kuatiañe’ẽ tekombo’égui, pejapyhývo tekombo’e iñambuéva térã Ñanderuete mba’e’ỹva (ajénova). Iporã ningo pene ñe’ã oñemombareteve ohóvo Ñanderuete mborayhu añetegua reheve ha ani peiko umi tembiapoukapy tembi’u rehegua rapykuérinte, ko’ãva ndaikatúi omboheko porãve avavépe.

10Ñande Israelgua ningo jaguereko peteĩ kuave’ẽmby renda, ichugui ndaikatúiva okaru umi omba’apóva pe óga jojohuhápe (Levítico 16,27).

11Umi tymba ruguykue Israel pa’iguasu oguerahava’ekue Ñanderuete rogaguasu kotyguasúpe, oipe’a hag̃ua Israelguakuéra ha ipa’iguasu angaipa; umi tymba retekue katu ojehapy Israel rekoha oka gotýo.

12Upéicha avei Hesu Crísto omano pe tavaguasu okárape omopotĩ hag̃ua huguytee rupi tetãyguakuérape.

13Upéicharamo ñasẽ Hesu Crísto rendápe, pe tavaguasu okárape, jahasa asy hag̃ua hendive,

14ko’ápe katu ndajaguerekói peichagua tavaguasu, upe jahekáva katu ouva’erã.

15Upéichakena Hesu Crísto rupi jaikuave’ẽ ñane kuave’ẽmby ñemomba’eguasu reheguáva ñande juru rupi Ñanderuetépe g̃uarã.

16Peipytyvõ ha pemboja’o pene mba’e pende rapichakuéra ndive, koichagua kuave’ẽmby rupi nde rerohory Ñanderuetépe.

17Peneñe’ẽrendúke pene ancianokuérape ha peñemoĩ ipoguypekuéra, ha’ekuéra ningo oñangarekohína pene ánga rehe. Peikuaa porãke ha’ekuéra ome’ẽva’erã cuénta penderehe Ñanderuete renondépe; ha’ekuéra ojapo hag̃ua ko tembiapo kóva torypápe, anítei pyahẽme térã jepy’apýpe. Upéicha naiporãiva’erãmo’ã peẽme g̃uarã.

18Peñembo’e orerehe, rojerovia ningo ore roguerekoha peteĩ py’apyñe’ẽ iporãva, ha hi’ã oréve roñeha’ãmba haguére roiko hekópe opaite mba’épe.

19Ajerure peẽme peiko hag̃ua avei péicha ha ojepoi hag̃ua chehegui, pya’eve aiko jevy hag̃ua penendive.

20Ñanderuete, pe py’aguapy Jára, omoingove jevymava’ekue Hesu Crístope omanóva apytégui, Hesu Crísto ningo pe ovecha rerekuaguasu ha huguytee rupi Ha’e ñanembopy’apeteĩ jevy Ñanderuete ndive,

21Hesu Crísto tapenembokatupyry opaite tembiapo porãme, pejapóvo hembipota, ha Ha’e toiporu ore rekove Ha’e oipota háicha. Toñemomba’eguasu Ñanderuetépe ára atyguasukuéra guive ára atyguasukuerarã meve, amen.

22Ajerure ningo peẽme che hermanokuéra peropu’aka hag̃ua ko tekombo’e kóva ahaíva peẽme, ko kuatiañe’ẽ kóva rupi che poavisa porãse.

23Peikuaa Timotéo ojepoíma hague, ha ha’e ou ramo, hendive che ahase pene rendápe.

24Pemomaitei opaite pende rerekua ha opaite ojeroviáva guivépe Hesu Crísto rehe. Italiayguakuéra penemomaiteiuka avei.

25Ñanderuete mborayhu añetegua toĩ opaite penendive.