1 Profecía Babilónia rehe, ojehechaukava’ekue Isaías, Amos ra’ýpe.
2Pemopu’ã poyviveve peteĩ cérro perõ ári. Pesapukái ichupekuéra, pemopu’ã pende po, oike hag̃ua hikuái mburuvichakuéra rokẽ rupi.
3Che voi ambyatyuka umi heko potĩva aiporavova’ekuépe ha ahenói ipy’aguasúvape ahavira hag̃ua ichupekuéra, osapukái jave torypópe.
4Pejapysaka pe atyguasu ryapu oñehendúva cérro rehe, ñorãirõhára atyguasúicha, Ñanderuete oma’ẽ ñorãirõhára atyguasúre oñembosako’íva ñorãirõrãme g̃uarã.
5Oúta hikuái tetã mombyrygua, ára apýra guive og̃uahẽ hikuái, Ñanderuete oúta ipochy rembiporu reheve ohundi hag̃ua ko yvy.
6Pejahe’óke, hi’ag̃uietéma Ñanderuete ára, oúta pe Ipu’akapáva ombyai hag̃ua.
7Upévare mayma kuimba’e po ikangypa ha ipy’amanomba hikuái.
8Ha oñemondyieterei, jepy’apy ha mba’asy oñu’ãta ichupekuéra ha oñeñandúta hikuái ku kuña imembymbotávaicha; ipy’andýi joaite om’ẽvo iñirũ rova rehe; hovakuéra hendy tata rendýicha.
9Cháke, Ñanderuete ára ouhína, kyhyje, ñeko’õi ha pochy reheve, ombyai hag̃ua ko yvy tuichakue ha ohundi hag̃ua angaipavorakuérape.
10Upévare umi mbyja ha umi mbyja aty ndohesapemo’ãvéi; ha pe kuarahy osẽngue vovénte iñypytũta, ha jasy ndohesapemo’ãvéi avei.
11Che voi ahaviráta tetãnguérape yvy tuichakuépe iñaña haguére, ha avei umi oñemoĩva cherehe hembiapo vai rupi; ha amboguéta umi ha’entesévape ha aitýta umi oñembotuichávape.
12Amopokãvéta kuimba’ekuérape óro porãgui ha amombovyvéta yvyariguakuérape óro Ofir peguágui.
13Upévare amosusũta umi yvága, ha amongu’éta pe yvy hendágui, Che, yvága atykuéra Jára, Che ha’éma ko’ã mba’e ko’ãva ojehuva’erãha chepochyha árape, Che chepochýgui.
14Ha’ete ku guasu kuña oñemuñarõ guáicha, ha ku ovecha aty isarambívaicha avave ndaikatúiva ombyaty, peteĩteĩ ojeréta hetã gotýo, okañy hag̃ua ijyvyteépe.
15Oimeraẽ ojejohúva guive ojekutuva’erã yvyra puku akuápe; ha oimeraẽ ho’áva ipopekuéra ojejukava’erã kyse pukúpe.
16Ita’yrakuéra ojejapeteva’erã itaguasu rehe hesakuéra renondépe; hogakuéragui oñemondapava’erã, ha orãirõmbava’erã hembirekokuérape.
17Peikuaa porãke, amombáyta umi Mediaygua opu’ã hag̃ua hesekuéra, ha’ekuéra ndojepy’apýi plátare ha ndohayhúi óro.
18Iguyrapakuéra oityva’erã umi mitãrusúre, ha ndoiporiahuverekomo’ãi umi kuña hyeguasúvape, ha hesa ndoheja reimo’ãi umi mitãme jepe.
19Upéicha Babilónia, oikovahína tetãnguéra jeguaka ramo, ha Caldéa iverapy ramo, opytáta ku Sodóma ha Gomórraicha, Ñanderuete ohundipava’ekue.
20Yvyariguakuéra ndoikomo’ãvéi ipype heta añokuéra; ha upépe umi Arabiaygua nomopu’ãmo’ãi hóga rymba pirekueguigua, ha umi ovecha rerekua ndoguerahamo’ãvéi upépe ijovecha aty;
21upépe katu okéta umi mymba ñarõ ñu megua, ha hogakuéra henyhẽmbáta urukure’águi; oikóta avei umi ñanduguasu, ha opopo joáta umi kavara saite.
22Hogaguasukuépe ojevy’a haguépe oguahu joáta aguaraguasu ha jaguarundi; hi’ára og̃uahẽmbotáma, ha nahembymo’ãvéi heta ára ojehupa peve opaite ko’ã mba’e.
Who We AreWhat We EelieveWhat We Do
2025 by iamachristian.org,Inc All rights reserved.
