2 Corintoyguakuérape 6 - Biblia en Guaraní - ?anderuete ?e’? Por? 2015

1Ore poavisase Hesu Crísto rembiguái ramo, ani hag̃ua peipyhy rei Ñanderuete poriahuvereko.

2Ñanderuete kuatiañe’ẽme he’i voi: Pe ára iporãvehápe che rohendu, ha pe salvacion árape che roipytyvõ. Eikuaa porãke ko’ág̃a og̃uahẽma pe ára iporãveha, ko’ág̃a oúma pe salvacion ára, (Isaías 49, 8).

3Ore noromoĩri mba’eve romoñepysãnga hag̃ua avavépe, ani hag̃ua oñe’ẽvai ore rembiapóre.

4Tapia ningo ore rojehechauka Ñanderuete rembiguái añeteguáva ramo, taha’e paciénciape térã jejopy vaípe, taha’e temikotevẽme térã angekõipe,

5taha’e ñenupãme térã cárcelpe, taha’e ñorãirõme térã tembiapo pohýipe, taha’e kera’ỹme térã ñembyahýipe,

6roiko teko potĩme ha arandúpe, ñemomirĩme ha py’aporãme, Pytu Porãmbáva ha mborayhu añeteguáva poguýpe,

7roñe’ẽ pe añetegua Ñanderuete pu’aka rupi, ha roiporu pe ñorãirõ Pytu Porãmba rehegua rembiporu heko peguávante, ore akatúape roiporu Ñanderuete kuatiañe’ẽ ha ore asúpe ore jerovia Hesu Crísto rehe (Efesoyguakuérape 6,7),

8roiko katu Hesu Crísto rembiguái añeteguáva ramo, ambuekuéra orembotuicha ramo térã oremotĩ ramo, oñe’ẽvai térã oñe’ẽ porã ramo orerehe, he’i ramo hikuái ore pombotavysenteha ro’e ramojepe pe añetegua,

9ha rojeguereko ojekuaa’ỹvarõguáicha, rojekuaa porã ramojepe; romanombotávaicha, jepémo roikoveroína; roñenupã ramojepe, noromanói gueteri,

10roñembyasy ramoguáicha, rovy’a tapia ramojepe; ore mboriahúvaicha ramo, roguereko heta ramojepe; ndoroguerekói ramoguáicha mba’eve, roguerekopa ramojepe.

11Ore juru ha ore py’apy ningo ojepe’a porã peẽ Corintoyguakuérape g̃uarã.

12Ore py’apýpe peẽ pejohúma pene rendag̃ua, ore katu ndorojohúi gueteri pende py’apýpe ore rendag̃uateéva.

13Che añe’ẽ penendive añe’ẽrõguáicha pe túva imitãkuérape, upévare peipe’ave pende py’apy rojohu hag̃ua avei ore rendag̃uateéva pende rekovépe.

14Aníke pemenda ojerovia’ỹva rehe peteĩ cangálla guýpe; mba’éicha piko pe heko peguáva oñemoirũta heko pegua’ỹva ndive, ha mba’éicha piko tesape oñemoirũta ypytũ ndive.

15Mba’éicha piko Hesu Crísto oiko porãkuaáta mba’epochy (Satana) ndive. Térã mba’éicha piko Hesu Crísto iglésia oiko porãta Satana iglésia ndive.

16Mba’éicha piko Ñanderuete iglésia oñembopy’apeteĩkuaáta jára ra’ãnga ñemomba’eguasu reheve. Ñande ningo Ñandejára Hesu Crísto iglésia, Ñanderuete kuatiañe’ẽme he’i háicha: Che aiko ha añembohogava’erã che retã apytépe, ha Che ha’éta Ijára, ha ha’ekuéra che retãtee, (Levítico 26,11-12).

17Upévare pesẽ ijapytégui ha pejei ichuguikuéra, he’i pende Ruete, ha ani pepoko mba’e ky’a rehe, upéicharamo Che poguerohorýta.

18Che ningo pende Ru, ha peẽ peikóta che ra’ykuéra ha che rajykuéra ramo, he’i ningo pende Jára Ipu’akapáva.