2 Crónicas 25 - Biblia en Guaraní - ?anderuete ?e’? Por? 2015

Amasías oiko mburuvichaguasu ramo

1Amasías oguereko 25 áño oñepyrũvo oisãmbyhy ha 29 áño oisãmbyhy Jerusalénpe; isy réra Joadan, peteĩ Jerusalengua.

2Ha’e ojapo iporãva Ñanderuete resa renondépe, ndaha’éi ramojepe ipy’aite guive.

3Oñemoĩ hatã porã riréma hetãme, ojuka avei umi tembiguáipe, ojukava’ekue tetã ruvicha, itúvape.

4Ndojukái katu ita’yrakuérape, ojehai háicha Moises kuatiañe’ẽ rembiapoukapýpe, Ñanderuete he’irõguare: Nomanoiva’erã tuvakuéra ita’yrakuéra rehe, ni ta’yrakuéra nomanoiva’erãha ituvakuéra rehe; peteĩteĩva omanova’erã hi’angaipa rehe.

5Upéi Amasías ombyaty Judayguakuérape, ha omohenda ichupekuéra hogaguasu rupi ha omoĩ hi’arikuéra mburuvicha 1.000 arigua ha 100 arigua ruvicha, opaite Juda ha Benjamingua ndive. Upéi ohai kuatia rehe umi téra ombotýmava guive 20 áño, ha ojejohu oĩha 300.000 kuimba’e jeporavopyréva osẽ hag̃uáicha ñorãirõme, oguerekóva yvyra puku akua ha soldádo retemo’ãha.

6Ha oiporavo 100.000 kuimba’e ipy’aguasúva Israélgui, 3.350 kílo pláta rehe.

7Ñanderuete rembiguái katu ou hendápe ha he’i ichupe: Tetã ruvicha, aníke ohótei nendive ko Israelgua soldádo aty; Ñanderuete noĩrigui Israel ndive, ha noĩri avei Efrain ñemoñarenguéra ndive.

8Tereho nde añónte (Israelguakuera’ỹre) ha eñeha’ã eñorãirõ hag̃ua, ha nde naneñe’ẽrendúi ramo Ñanderuete ndereitýta nderehe ija’e’ỹa pópe; Ñanderueténte ipu’aka oporopytyvõ hag̃ua térã oporoity hag̃ua.

9Ha Amasías he’i Ñanderuete rembiguáipe: Ha mba’éiko oikóta umi 3.350 kílo plátagui ame’ẽmava’ekue Israel soldádo atýpe. Ha Ñanderuete rembiguái he’i ichupe: Ñanderuete ikatu ome’ẽ hetave ndéve pévagui.

10Upémaramo Amasías omboyke pe soldádo aty ouva’ekue hendápe Efraíngui, ha omondo jevy hogakuérape; ha’ekuéra katu ipochyeterei Juda ndive, ha pochy reheve ohopa jevy hogakuérape.

11Upémaramo Amasías oñeha’ãmbaite ha oguerahánte hetãyguakuérape, pe jukyty vállepe ha ojuka Seir ñemoñarenguéra apytégui 10.000 kuimba’e.

12Ha umi Juda ñemoñare oapresa avei ambue 10.000 Seirguápe, ha ogueraha ichupekuéra yvyty ru’ãme, ha upeguive oity yvýpe oñepehẽ’amba hag̃ua.

13Ha umi soldádo Amasías omondo jevyva’ekue isoldádo atýgui, ani hag̃ua osẽ hendive ñorãirõme, oho hikuái ha ojasuru Juda tavakuéra rupi, Samária guive Bet-horon peve, ha ojuka hikuái 3.000-pe ha ogueraha heta mba’erepy.

14Amasías ou jevývo Edomgua jukahágui, ogueru avei hendive Seirguakuéra ñemoñare jára, ha omoĩ henondépe ijára ramo, ha omomba’eguasu ichupe, ha ohapy ichupe g̃uarã mba’e ryakuã porã.

15Ko’ã mba’e rupi Ñanderuete ipochy Amasías ndive, ha ombou hendápe peteĩ proféta, he’i hag̃ua ichupe: Mba’érehe piko rehekára’e umi tetã ambue járape, ndosalvaiva’ekue hetãme nde pógui.

16Pe proféta he’ívo ko’ã mba’e ichupe, ha’e ombohovái ichupe: Reñemoĩ piko ra’e tetã ruvicha rekombo’eha ramo. Ejehejána umi mba’égui. Mba’upéiko remanose. Ha ha’e oñe’ẽmbávo, pe proféta he’i jevy ichupe: Che aikuaa Ñanderuete he’íma hague Ha’e nehunditaha, rejapo haguére ko mba’e ha nerehendúigui che ha’éva ndéve.

17Ha Amasías, Juda retã ruvicha, ojepy’amongeta rire, he’iuka Joas, Joacaz ra’ýpe, Jehu ra’yrépe, Israel retã ruvichápe: Ejúna, ñañorãirõ hag̃ua.

18Upémaramo Joas, Israel retã ruvicha, he’iuka Amasías, Juda retã ruvichápe: Pe karaguata oĩva Líbanope he’iuka pe cédro Líbano peguápe: Eme’ẽ nde rajy che ra’y rembirekorã ramo. Ha péina umi mymba saite Líbano pegua katu ohasapa ha opyrũmba pe karaguata rehe.

19Nde rembopoguy haguére Edómpe nde py’a oñembotuicha. Epytánte nde rógape. Mba’upéiko reheka rei peteĩ mba’evai ndéve g̃uarã, ikatu re’a nde ha Judayguakuéra nendive.

20Amasías katu nohenduséi; Ñanderuete oipotágui péicha, Ha’e omoĩségui ichupe hese ija’e’ỹva pópe, ha’e omomba’eguasu haguére Edom jarakuérape.

21Ha ojupi Joas, Israel retã ruvicha, ha ojojohu Amasías, Juda retã ruvicha ndive Bet-sémespe, péva Juda rehegua, oñorãirõ hag̃ua.

22Ha Judayguakuéra ho’a Israel renondépe, ha peteĩteĩ okañy hogakuérape.

23Ha Joas, Israel retã ruvicha, oapresa Bet-sémespe Amasías, Juda retã ruvichápe, Joas ra’y, Joacaz ra’yrépe, ha ogueraha Jerusalénpe; ha oity pe Jerusalen tápia yvate Efrain rokẽ guive hugua rokẽ meve, 180 métro pukukue.

24Ogueraha opaite óro, pláta ha tembiporu oĩva Ñanderuete rógape opytáva Obed-edom poguýpe, ha opaite mba’erepy oĩva tetã ruvicha rógape, ogueraha avei umi mburuvicha ra’ykuérape, ha upéi oho jevy Samáriape.

25Ha Amasías, Joas ra’y, Juda retã ruvicha, oikove 15 áño, Joas, Joacaz ra’y, Israel retã ruvicha omano rire.

26Ambue Amasías rembiapokue, iñepyrũngue ha ipaha pegua, ojehaipa umi Juda ruvichakuéra rembiapokuéra kuatiañe’ẽme.

27Amasías oñemboykeha ára guive Ñanderuetégui, oñeha’ã hikuái opu’ã ñemi hese Jerusalénpe; ha ha’e okañýma ramo Laquíspe oñemondo hapykuerigua, ha ojuka ichupe hikuái upépe;

28ha ogueru hetekue cárrope, ha oñotỹ ichupe hikuái ituvakuéra ndive, David távape.