Tiágo 1 - Biblia en Guaraní - ?anderuete ?e’? Por? 2015

Ñemomaitei

1Che, Tiágo (Jacóbo), Ñanderuete ha Hesu Crísto rembiguái, amomaitei umi 12 Israel tríbu oñemosarambiva’ekuépe ko yvy apére.

Pe arandu añetegua ou Ñanderuetégui

2Pevy’ákena che hermanokuéra, pehasa ramo opaichagua jepy’ara’ã rupi,

3ko’ãva omoañete ha oha’ã (oaprova) pende jerovia, ha pe jerovia añeteguáva hi’a paciéncia.

4Pe paciéncia katu okakuaaveva’erã ohóvo, upévare pepyta kirirĩháme pe jepy’ara’ã poguýpe Ñanderuete penemoambue porãvégui ohóvo Hesu Crísto rekópe, ani hag̃ua peẽ pe’a angaipápe ha anítei ofalta mba’eve pende jeroviápe.

5Ha oime ramo pende apytépe peteĩ iñarandu’ỹva, tojerure Ñanderuetépe, Ha’e katuete ome’ẽta arandu oimeraẽ ojerurévape, ha nombotovemo’ãi.

6Tojerure katu jerovia reheve ha py’a mokõi’ỹre; pe ipy’a mokõiva ojogua y pochýpe, pe yvytu ogueraha reíva ágotyo pégotyo.

7Anítei upe kuimba’e térã kuña upéva oimo’ã ohupitytaha peteĩ mba’e Ñanderuetégui.

8Pe ipy’a mokõiva ningo ndaheko pytái opaite hapépe.

9Pe hermáno imboriahúva tovy’a katu, Hesu Crísto omokãrapu’ãma ichupe (Lúcas 6,20),

10ha pe hermáno heta mba’e oguerekóva tovy’a Ñanderuete omomirĩ haguére ichupe. Ha’e oikuaámare imba’eita ojoguaha kapi’i potýpe, pya’e opa reiva’erãva.

11Osẽvo kuarahy ha haku porã rire ipirupa pe kapi’i, ipoty ho’a ha iporãngue opa rei, upéicha avei upe heta mba’e oguerekóva opa reíta ojerovia ramo imba’e heta rehe.

Jepy’ara’ã

12Ovy’aite pe kuimba’e ogueropu’akáva kirirĩháme ijepy’ara’ã, osẽ porã rire ohupitýta pe tekove opa’ỹva, Ñanderuete ome’ẽtava oimeraẽvape ohayhúva guive ichupe.

13Pejepy’ara’ã ramo, anítei peje Ñanderuete pendepy’ara’ãha, avave ndaikatúi oipy’ara’ã Ñanderuetépe ojapo hag̃ua mba’evai, ha Ha’e voi ndoipy’ara’ãmo’ãi avavépe (ojapo hag̃ua mba’evai).

14Pe kuimba’e ha kuña py’apy rembipota vai uvei ojopy ichupekuéra ha ogueraha ichupekuéra ojapo hag̃ua pe tembiapo vai.

15Pe yvyarigua py’apy rembipota vai heñói ramo, onacéta tembiapo vai; ha pe angaipa okakuaapa rire, hi’áta ñemano.

16Che hermanokuéra pohayhuetéva, anítei peẽ voi peñembotavy pendejupe.

17Opaite me’ẽmby iporãva ha opaite jopói hekoite peguáva ou yvatégui, Ñanderuetégui; Ha’e ningo pe tesape Ru, Ha’e noñemoambuéi ha hendive ndaipóri ypytũ.

18Hembipota ha iñe’ẽ añetegua rupi Ha’e ñanemoingove jaiko hag̃ua hi’a tenondegua ramo iñemoñarenguéra apytépe.

Jajapova’erã Ñanderuete rembipota

19Upévare, che hermanokuéra ahayhúva, opavave ta’ipya’e ohendu hag̃ua, ta’imbegue katu oñe’ẽ hag̃ua, ha ta’imbegueve ipochy hag̃ua.

20Pe kuimba’e ipochýva ndojapói mba’e iporãva Ñanderuete renondépe.

21Upévare pepoi opaite mba’e ky’a ha ivaívagui, peñemomirĩ ha peñemomba’e Ñanderuete ñe’ẽre osalvátava pene angakuérape.

22Pejapo katu Ñanderuete ñe’ẽ, anítei pehendúnte; ani hag̃ua peẽ voi peñembotavy pendejupe.

23Upe ohendúnteva Ñanderuete ñe’ẽ ha ndojapóiva, ha’ete ku oma’ẽva hovatee rehe, peteĩ espéjope.

24Ha’e oma’ẽ ramojepe ijehe, oho rire, pya’e hesarái mba’eichaitépa ra’e hova.

25Upe oma’ẽ porãva pe tembiapoukapy hekoite peguáva ñanemosãsóvare ha oñeha’ãmbaite ojapo hag̃ua ko tembiapoukapy kóva he’i háicha, upéva ndaha’éi peteĩ ohendúnteva ha uperire hesarái jevýva; upéva ningo peteĩ ovy’aitéva hembiapo porã rupi.

26Oimérõ peteĩ he’íva ijehe ha’e ojerovia porãha Ñanderuete rehe ha ndojokói ijuru, ha’e oñembotavy ijupe voi ha icúlto (ijerovia) výro rei.

27Pe ñemomba’eguasu (cúlto) ipotĩva, Ñandejára Ñanderuete ohayhúva ningo kóva: Ñaipytyvõ umi ityre’ỹvape ha imenave’ỹvape hemikotevẽme, ha ñañemboyke opaichagua teko vaígui.