1 Pédro 2 - Biblia en Guaraní - ?anderuete ?e’? Por? 2015

1Upévare peñemboyke opaichagua teko ñaña, ñembotavy, tova mokõi, mba’epota vai ha ñe’ẽvaígui.

2Mitã kambúicha peheka kamby oñembojehe’a’ỹva, kóva ningo Ñanderuete ñe’ẽ oñembojehe’a’ỹva, ha Pytu Porãmbáva pu’aka rupi pende jerovia okakuaa porãve hag̃ua pejesalva peve.

Hesu Crísto pe itaguasu

3Peha’ã (peprova) rire ko Ñanderuete ñe’ẽ oñembojehe’a’ỹva, peikuaáta Ñanderuete ipy’aporãha.

4Peñemboja Hesu Crísto rehe, Ha’e voi ningo pe itaguasu oikovéva, tetãyguakuéra omboykemava’ekue ovale’ỹvaicha, Ñanderuete katu oiporavo ichupe (omopu’ã hag̃ua hi’ári ijiglésia).

5Ha peẽ avei peheja Ñanderuete toiporu pende rekove, ku ita oikovévaicha, oñemopu’ã hag̃ua ohóvo ijiglésia, Hesu Crísto pe itaguasu oikovéva ári, peẽ peiko hag̃ua ipa’i heko potĩva ramo peikuave’ẽ hag̃ua kuave’ẽmby pytu porã reheguáva Ñanderuetépe g̃uarã ita’ýra Hesu Crísto rupi.

6Upévare he’i avei Ñanderuete ñe’ẽ: Peikuaa porãke, Che voi amohendáma Jerusalénpe pe itaguasu tenondegua poravopyréva peteĩ itaguasu esquína pegua, ha hi’ári amopu’ã che iglésia ha upe ohejáva ojeporu hekove oñemopu’ã hag̃ua ko ita oikovéva ári, noñemotĩmo’ãi araka’eve, (Isaías 28,16).

7Upévare peẽ, pejeroviáva ko itaguasu oikovéva rehe, pehechakuaáma Hesu Cristoha pe ita vera hepyvéva ramoguáicha. Umi óga apohára ojerovia’ỹva omboyke ramojepe ko itaguasu, Ñanderuete katu oiporavo ko itaguasu oikovéva, omopu’ã hag̃ua ko itaguasu tenondeguáva ári ijiglésia.

8Ha pe itaguasu umi óga apohára omboykeva’ekue oiko ichupekuéra g̃uarã itaguasu ñepysãnga ha ñuhã ramo, naiñe’ẽrenduséigui Hesu Crísto ñe’ẽme, ha upevarã Ñanderuete omoingo ichupekuéra oñepysãnga hag̃ua.

Pe tetã Ñanderuete oiporavóma

9Peẽ katu pe tetã poravopyre, peteĩ tetã heko potĩmava, Ñanderuete ohenoimava’ekue pytũmbýgui peiko hag̃ua hesape porãitépe, pemyasãi hag̃ua ipa’ikuéra ramo Ñanderuete rembiapo tuichaitéva, (Éxodo 19,6).

10Yma peẽ ndaha’éi gueteri peteĩ tetã, ko’ág̃a katu peiko Ñanderuete retã ramo. Yma noñeme’ẽi peẽme iporiahuvereko peteĩ jopói ramo, ko’ág̃a katu oñeme’ẽma peẽme.

11Che rayhupára, peikóva tetã ambueygua ha mbohupa ramo, che poavisa porã ani hag̃ua pejejoko pende rete rembipota vaíre, oñemoĩvahína pene ánga rehe (pende pytu porã rehe).

12Peiko porã ha hekoitépe ambue tetãnguéra ojerovia’ỹva apytépe, ha oñe’ẽvai ramojepe hikuái penderehe mba’evai apohára ramo, ha’ekuéra ohechakuaáta pene rembiapo porã ha upévare omomba’eguasúta avei Ñanderuetépe upe ára Ha’e oútavape ñane’andu hag̃ua (Matéo 5,16).

13Hesu Crísto rehehápe peñemoĩ opaichagua mburuvicha poguýpe, taha’e jepe pe tetã ruvicha, oisãmbyhýva hetãyguakuérape ipu’aka rupi,

14taha’e pe departaménto ruvicha poguýpe, umía Ñanderuete voi ombou ohavira hag̃ua umi mba’evai apohárape ha omboete hag̃ua hembiapo porãvape.

15Upéicha ningo Ñanderuete rembipota voi, pene rembiapo porã rupi tapemokirirĩ umi kuimba’e térã kuña tavy ha iñarandu’ỹvape.

16Peiko hermanokuéra oñemosãso añeteguávaicha, ha ani peiporu vai pene sãso (libertad), pejapo jevy hag̃ua pende rete rembiapo vaikue, peiko uvei Ñanderuete rembiguaietéva ramo.

17Pemomba’e opavavépe, pehayhu Hesu Crísto ra’ykuéra ha itajyrakuérape, pekyhyje Ñanderuetégui, pemomba’e tetã ruvichápe.

18Peẽ tembiguaikuéra (esclávo) peñemoĩ kyhyjepópe pende jára (patron) poguýpe, ndaha’éi umi ipy’a porãva ndivénte, umi ipy’a hatãva ndive avei.

19Peteĩ ojeroviáva Hesu Crísto rehe ha ohasa asy, ndojapói ramojepe mba’eve ivaíva, noñemoĩrivo ijára rehe, ogueropu’aka uvei kirirĩháme opaichagua jehasa asy, péva ningo peteĩ jopói poriahuvereko reheguáva Ñanderuetégui.

20Oimérõ peñenupã pejapo vai haguére ha pegueropu’aka kirirĩháme, péva ndoguerumo’ãi peẽme terakuã porã. Pehasa asy ramo uvei, pejapo’ỹre mba’eve ivaíva, ha pegueropu’aka kirirĩháme, péva ningo oguerúta peẽme terakuã porã ha ombohory avei Ñanderuetépe.

21Upevarã ningo Ñanderuete penerenoiva’ekue, ha Hesu Crísto ohasa asýgui penderehe, ohechaukava’ekue hekove rupi mba’éichapa peẽ peguatava’erã ipyporépe, (Juan 13,13).

22Ha’e ndojapói mba’eveichagua tembiapo vai, ha japu ndojejohuiva’ekue ijurúpe.

23Oñeñe’ẽ pohýi ramo ichupe, okirirĩ; ombohasa asy ramo ichupe, noñe’ẽvaíri avavépe, ombohasapánte uvei Ñanderuetépe, pe mbojovakehára hekoite peguávape.

24Hesu Crísto oguerahava’ekue hetére ñane rembiapo vai kurusúre, ñande ñamano hag̃ua tembiapo vaípe g̃uarã ha jaiko justíciape g̃uarã. Ijekutukue rupi ningo peẽ pekuera.

25Peẽ peikova’ekue ku ovecha kañymbyréicha, ko’ág̃a katu pejevýma pende rerekua rendápe, Ha’e oñangareko hag̃ua pene ánga rehe.