2 Samuel 22 - Biblia en Guaraní - ?anderuete ?e’? Por? 2015

David purahéi salvacion rehegua

1David opurahéi Ñanderuetépe ko purahéi kóva, Ha’e osalvapa riréma ichupe hese ija’e’ỹvakuéragui ha Saul pógui,

2upéicha he’i: Ñanderuete che mo’ãhára, Ha’e chemombaretéva, Ha’e ningo che salvador,

3che Jára rendápe akañy ajejopyete jave, Ha’e che retemo’ãha ha che kyse puku, hendivémante aĩ porã, hendivémante apytu’u porã, Ha’émante cheguenohẽ cherayhu’ỹva pógui.

4Ahenói Ñanderuete réra, hekoitépe ambotuichase ichupe, cheguenohẽ haguére cherehe ija’e’ỹva pógui.

5Pe ñemano aho’íma, añemondyietereíma,

6tyvy (sepultúra) sãnguéra cheñapytĩma ha chereitýma mano ñuhãme,

7che py’aite guive ahenói Ñanderuetépe, ha amba’ejerure che Jarateépe; ha Ha’e ohendu che ñe’ẽ hekoha guive, ha che ñe’ẽ asy og̃uahẽ ijapysápe.

8Upérõ pe yvy oku’e ha oryrýi, ha yvága rapo oku’epa Ha’e ipochyetereígui.

9Itĩgui ojupi tatatĩ, ha ijurúgui tata oporohundíva; Ha’e omyendy tatapỹi.

10Oipe’a pe yvága oguejy hag̃ua; ipy guýpe oĩ pytũ.

11Ha’e ojupi peteĩ querubin (ángel) ári, ha oveve; ojehecha ichupe yvytu pepo ári.

12Ijerekue rehe omoĩ pytũ, y iñypytũva ha arai iñanambusúva.

13Hova ojajaipávagui osẽ tata rendy omimbíva.

14Ha Ñanderute omosunu yvága guive, ha pe Ijyvatetéva oñe’ẽ hatã.

15Omondo ihu’ykuéra, ha omosarambipa; Ha’e opoi aratirígui oporohundietéva.

16Ha’e oñe’ẽ pohýi ipochyetégui, ojehecha yguasu rugua ha ojekuaa yvy rapo.

17Yvate guive oipyso ipo ha chejapyhy cherenohẽ hag̃ua y hetágui.

18Ha’e cheguenohẽ cherehe ija’e’ỹva mbaretégui, ha cherayhu’ỹvagui, ipu’akáva cherehe.

19Ojeity hikuái cheári che ajepy’apy jave, Ñanderuete katu chepytyvõ.

20Ha cherenohẽ tenda nandi tuichahápe; Ha’e chepe’a cherayhu’ỹva pógui, cherayhúgui.

21Ñanderuete omyengovia chéve che justícia ha che reko potĩ.

22Che aiko Ñanderuete rape rehe, nañemboykéi che Jarateégui.

23Ajapopa hembiapoukapy, ha ndajeíri iñe’ẽgui.

24Che amoĩ che rekove ipópe, añeñangareko opaichagua mba’evaígui.

25Upévagui Ha’e omyengovia chéve che justícia hesa renondépe che po ipotĩ háicha.

26Pe oporoporiahuverekóva Nde reiporiahuverekova’erã avei ichupe, ha Nde ndepy’aporã ipy’aporãva ndive.

27Heko potĩva ndive rehechauka avei nde rekoporã, Nde nereipytyvõi katu iñañávape.

28Nde ningo resalva tetãygua ojepy’apývape, ha nde resa oñemoĩ umi oñembotuicháva rehe, reity hag̃ua.

29Nde, ore Ruete, che rataindy, che Jára omyesakã chéve che renda iñypytũháme.

30Ndérupi amosarambi soldádo atykuérape ha che Jára ndive ajapyhara táva tápia ári.

31Ñanderuete rape iporãite, ha ore Ruete ñe’ẽ ipotĩete. Ha’e voi omo’ã opaite hese ojeroviávape.

32Ha mávaiko tetãguakuéra jára, ndaha’éi ramo Ñanderuete. Ha mávapa ñande itaguasu ñanemo’ãva, ndaha’éi ramo Ñanderuete.

33Ñanderueténte chembopu’aka porã, Ha’émante omopotĩ che raperã.

34Ha’e ombopya’e che py ku guasu oñani háicha, Ha’e chejoko hatã aime jave cérro ru’ãme.

35Ha’e voi ombokatupyry che po ñorãirõme, ikatu hag̃ua amokarapã guyrapa bronceguiguáva che pyapy rupi.

36Reme’ẽ avei chéve ne ñemo’ãha chesalva hag̃ua, ha nde rekoporã chembotuicha.

37Nde rembopuku puku che py rendag̃ua ani hag̃ua chepysyrỹi.

38Amuñáta cherehe ija’e’ỹvape ahundi hag̃ua ha ndajevymo’ãi ahundipa peve.

39Opavavépe aikutúta ikatuve’ỹ hag̃uáicha opu’ã; ha ho’apa hikuái che py guýpe.

40Nde chemombarete añorãirõ hag̃ua, remomirĩ cherehe ija’e’ỹvape che py guýpe.

41Ha ndérupi umi cherehe ija’e’ỹva amokañy, ahundi hag̃ua umi oñemoĩvape cherehe.

42Ojerure ramojepe hikuái pytyvõ rehe ndaipóri katu avave osalvaséva ichupekuéra, Ñanderuete voi ohundigui ichupekuéra.

43Ku yvy timbóicha amongu’i ichupekuéra ha apyrũ hesekuéra ku tymba repotícha oĩva táva cállere.

44Nde cheguenohẽ che retãyguakuéra ñorãirõgui; ha reñangareko cherehe aiko hag̃ua tetã ruvicha ramo heta tetã rehe, ha tetã ndaikuaaiva’ekue oikóma che rembiguái ramo.

45Tetã ambueygua ñemoñarenguéra oñemoĩ che poguýpe; ajokuái ramo ichupekuéra cheñe’ẽrendu porã.

46Umi tetã ambueygua ikangypa, ha osẽ ryryipópe hóga oñemombaretévagui.

47Toikove Ñanderuete ha toñemomba’eguasu che mo’ãhára, ha taituicha tuichave Ñanderuete, che salvador.

48Ñanderuete omyengovia cherehe oñemoĩvape, omoĩvo che poguýpe heta tetãme.

49Ha’e chesalva cherehe ija’e’ỹvagui ha chérupi cherayhu’ỹva ári. Nde cheguenohẽ pe kuimba’e iñarõva poguýgui.

50Upévarehe, che romoherakuãse opaite tríbu apytépe, che Ruete, aropurahéita nde réra.

51Nde reme’ẽ haguére ne retã ruvichápe pu’aka tuicháva ha reiporiahuvereko umi reiporavova’ekuépe, David ha iñemoñarenguérape opaite árape.