Salmokuéra 31 - Biblia en Guaraní - ?anderuete ?e’? Por? 2015

David ojerovia Ñanderuete rehe

1Nderehe che Ruete ajerovia aikóvo, anítei chereja añemotĩ, cheguenohẽmína uvei che jehasa asýgui nde justícia rupi.

2Cherendumína añetehápe che Ruete, ha pya’éna ejumi chepytyvõ hag̃ua, eiko chéve g̃uarã peteĩ itaguasu imbaretéva ramo, térã peteĩ táva oñemombaretéva ramo che aiko hag̃ua py’aguapýpe.

3Nde ha’égui che itaguasu (mo’ãha) ha che róga oñemombaretéva, Nde réra rehehápe chesãmbyhy ha chemboguata nde rapére.

4Chepe’amína pe ñuhãgui oñemoĩmava’ekue chéve g̃uarã, Nde ha’égui che mo’ãha.

5Nde pópe amoĩ che pytu reñangareko hag̃ua hese, Nde, che Ruete, ha’égui che pytyvõhára, Nde che rerekua añeteguáva tapia g̃uarã.

6Umi ojeroviáva ambue jára rehe ndéve nembojeguaru, che katu ajerovia nderehe aikóvo.

7Avy’aite ha chepy’aroryete nde poriahuvereko reheve, rehecha haguére che jepy’apy asy, ha rehechakuaa che ánga ohasa asyha.

8Nachemoĩri cherehe ija’e’ỹva pópe, remoĩ uvei che pykuéra yvy hatãvape.

9Cheporiahuverekomína, Nde, che Ruete, aime vaietégui, che resa, che rete ha che ánga ikane’õ mba’embyasýgui.

10Che aikovemíntema, ahasa asyeterei ha chepyahẽ asýgui, che pu’aka opa ohóvo, che rembiapo vai rehe che kanguekuéra hasypa.

11Opaite cherayhu’ỹva opuka cherehe, ha opaite che róga ypy pegua oñembohory cherehe, ha umi chekuaáva okyhyjepa chehegui, ha umi oka rupi cherecháva okañymba chehegui.

12Ku omanóvaicha hesarái chehegui, che aiko ku kambuchi ojeporu’ỹvaicha.

13Ahendu heta oñe’ẽ reíva cherehe, pe kyhyje oko’i cherehe opa rupígui, oñomongeta vai hikuái cherehe ha oñeha’ãmba chejuka hag̃ua.

14Che katu ajerovia nderehe, che Ruete, che ningo ha’e: Nde, che Jára.

15Nde pópe oĩmba che arakuéra, cheguenohẽmína umi cherehe ija’e’ỹva ha chemuñáva pógui.

16Nde rova tohesape ne rembiguái ári, cheguenohẽmína che jehasa asýgui nde poriahuvereko rupi.

17Anítei che añemotĩ, Nde, che Ruete, che rohenóima, toñemotĩ katu umi iñañáva, kirirĩháme toguejy omanómava retãme.

18Tokirirĩ umi juru ijapúva, umi oñemoĩva ha oñembohorýva umi heko potĩva rehe.

19Tuichaite ningo ne mborayhu reguerekóva umi ndehegui okyhyjévape g̃uarã, ha rehechaukáva umi nderehe ojeroviávape opavave renondépe.

20Nde remo’ãta ichupekuéra umi iñañávagui, oñemoĩva ñemiháme hesekuéra; Nde reñongatúta ichupekuéra nde rogaguýpe, remo’ã hag̃ua ñe’ẽvaígui.

21Toñemomba’eguasu Ñanderuetépe ohechauka haguére chéve iporiahuvereko, chemoingévo peteĩ táva oñemombaretévape.

22Ajejopy vai jave che ha’e: Ñande Ruete chemboykéma hesa renondégui, Nde katu rehendúra’e che mba’ejerure asy.

23Pehayhúke Ñanderuetépe, opavave peẽ hekopotĩva, Ñanderuete oñangareko porã umi hese ojeroviávare, omyengovia uvei umi oñembotuichaséva rembiapo vai.

24Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.