Amos 1 - Biblia en Guaraní - ?anderuete ?e’? Por? 2015

1Ko’ã mba’e Amos ohecha ha ohenduva’ekue, ha’e oiko ramoguare ovecha rerekua ramo Técoa ypýpe, ha’e oprofetiza umi mba’e oikótava Israel retãyguakuérape, Uzías, Juda retã ruvicha árape ha Jeroboam, Joas ra’y, Israel retã ruvicha árape, mokõi áño pe yvy ryrýi guasu mboyve.

2Ha he’iuka: Ñanderuete oñe’ẽtaha Sion guive, ha osapukáita Jerusalen guive, ha umi ovecha rerekua ñu megua oñembyasyete, ha pe Carmel cérro ru’ã ipirupáta.

Siriaygua rehe

3Péicha he’i pende Ruete: Mbohapy Damásco angaipaguasu rupi, ha opoi rãngue hembiapo vaígui, ojapo vaive ohóvo pe irundyha avei, omongu’i Galaad jepokuapyhakuérape imba’e ra’ỹi jokaha (trilladéra) rupi, upévare Che naperdonamo’ãi ichupekuéra.

4Ajatapýta Hazael róga rehe, okaipa hag̃ua Ben-adad rogaguasukuéra.

5Ajokapáta Damásco rokẽ ñembotyha ha ahundipáta umi Aven cerrokuéra pa’ũ rupi oikóvape, ha umi Bet-eden retã ruvichakuérape, ha Síria retãygua ojegueraháta Kírpe, he’i pende Ruete.

Filisteaygua rehe

6Péicha he’i pende Ruete: Mbohapy Gáza angaipaguasu rupi, ha opoi rãngue hembiapo vaígui ojapove uvei pe irundyha, upévare Che naperdonamo’ãi ichupekuéra, ome’ẽva’ekue hikuái pirapire rehe che retãyguakuéra ojegueraha hag̃ua Edom retãme.

7Ambojáta tata Gáza korapyjere yvate rehe, ahapy hag̃ua hogaguasukuéra.

8Ha ahundipáta umi Asdodguápe, ha péicha avei umi Ascalon ruvicha, ha ahupíta che po Ecron rehe, ha umi Filisteaygua hembymíva omanóta, he’i pende Ruete, pe Jaraitéva.

Tiroygua rehe

9Péicha he’i pende Ruete: Mbohapy Tíro angaipaguasu rupi, ha opoi rãngue hembiapo vaígui ojapove uvei pe irundyha, upévagui Che naperdonamo’ãi ichupekuéra ovende rehe che retãyguakuérape ojegueraha hag̃ua tembiguái ramo Edom retãme.

10Upévare ambojáta tata Tíro táva tápia rehe, ahapy hag̃ua hogaguasukuéra.

Edom retã rehe

11Péicha he’i pende Ruete: Mbohapy Edom angaipaguasu rupi, ha opoi rãngue hembiapo vaígui ojapove uvei pe irundyha, upévare Che naperdonamo’ãi ichupekuéra, omuña hikuái kyse puku reheve ipehẽngue Israelguakuérape ha ndoiporiahuverekosevéi ichupekuéra, ipochy rendy reheve omonda meme ichugui ha opaite ára ipy’aro hendivekuéra.

12Ajatapýta Teman rehe, ha pe tata ombokusuguepáta Bósra rogaguasukuéra.

Amon retã rehe

13Péicha he’i pende Ruete: Mbohapy Amon ñemoñare angaipaguasu rupi, ha opoi rãngue hembiapo vaígui ojapove uvei pe irundyha, upévare Che naperdonamo’ãi ichupekuéra, ha’ekuéra ombovo umi Galaad kuña hyeguasúva rye.

14Ambojáta tata Raba táva tápia yvate rehe, ha ahapýta hogaguasukuéra ñorãirõ ryapuguasu reheve, oipeju jave pe yvytu hatãitéva.

15Hetã ruvicha ojegueraháta ñeñapytĩháme ha hendive avei ambue mburuvichakuéra, he’i pende Ruete.