Números 32 - Biblia en Guaraní - ?anderuete ?e’? Por? 2015

Ruben ha Gad oñemohenda Jordángui kuarahyresẽ gotýo

1Ruben ha Gad tribukuéra hymba hetaitereígui oma’ẽ Jazer ha Galaad yvy rehe, ha ohecha iporãiteha hymba rendag̃ua;

2upévare Gad ha Ruben tribukuéra ou oñe’ẽ hag̃ua Moises, pa’i Eleazar ha ambue tríbu ruvichakuéra ndive, ha he’i:

3Atarot, Dibon, Jazer, Nimra, Hesbon, Eleale, Sebam, Nebo ha Beon yvy,

4Ñanderuete ome’ẽma Israelguakuérape, pe yvy porãite tymba rendag̃ua ha ne rembiguaikuéra heta hymba.

5Upévare ore, rojohu ramo py’aporã pende resa renondépe, peme’ẽ pe yvy péva pene rembiguaikuérape ijyvyrã ramo, ha ani orembohasátei pe Jordan mboypýri.

6Ha Moises he’i Gad ha Ruben tribukuérape: Pene pehẽnguekuéra oho joáta ñorãirõháme ha peẽ pepytase piko ko’ápe.

7Mba’upépa pemokangyse ambue Israel tribukuérape pehasa’ỹ rupi pe yvy Ñanderuete ome’ẽmava’ekuépe ñandéve g̃uarã.

8Upéicha ojapova’ekue pende rukuéra, amondo ramoguare ichupekuéra ohecha hag̃ua pe yvy, Cades-Barnéa guive.

9Ou hikuái Escol ysyry peve ha ohecha rire pe yvy, omongyhyje Israelguakuérape, ani hag̃ua oútei pe yvy Ñanderuete ome’ẽsévape ichupekuéra,

10ha upévare Ñanderuete ipochy ha ome’ẽ iñe’ẽ he’ívo:

11Umi kuimba’e osẽva’ekue Egíptogui ha ombotýmava guive 20 áño ndohechamo’ãi pe yvy Che ha’émava’ekue ame’ẽtaha ñe’ẽme’ẽ rupi Abraham, Isaac ha Jacóbope, ndaheko potĩrigui che renondépe.

12Caleb, Jefune ra’y, pe Cengua, ha Josue, Nun ra’ýmante, ha’ekuéra hekopotĩ porã pende Ruete renondépe.

13Ha Ñanderuete pochy hendy ho’a Israel rehe, ha omoinge rei ichupekuéra desiérto rehe 40 áño, opa peve umi oñemoĩva’ekue Ñanderuete rehe.

14Ha péina ápe, peẽ pepyta pende tuvakuéra rekovia, kuimba’e hi’angaipáva, pembojo’ave hag̃ua Ñanderuete pochy Israel ári.

15Pejevy ramo pene rembiapo vai rapykuéri, Ha’e pendereja jevýta desiértope, ha pehundipaitéta ko tetã kóvape.

16Upéramo ha’ekuéra he’i Moiséspe: Ndaupéichai, ore romopu’ãse ko’ápe ore rymbakuéra korapyrã, ha ore mitãkuérape g̃uarã umi táva oiko hag̃uánte;

17ha upéi pya’e pya’e ore rohóta ambue Israel tribukuéra renonderãme, ore ñorãirõ rembiporukuéra reheve, romoinge peve ichupekuéra hendag̃uáme; ha upeaja ore mitãkuéra opytáta táva oñemombaretévape ani hag̃ua okyhyje ko’ã tetãnguéragui.

18Ndorojevymo’ãi ore rogakuérape ambue Israel tribukuéra opyta peve avei ijyvyteépe.

19Ore ndorojapyhymo’ãigui ore yvy (lóte) ijapytepekuéra, Jordan mboypýri ha amo gotyove, roguerekoségui ore yvyrã ko Jordan asu ykére, kuarahyresẽ gotýo.

Israelguakuéra renonderãme

20Upéramo Moises he’i jevy ichupekuéra: Iporã, péicha pejapo ramo, ha peñemoĩse ramo ambue Israelguakuéra renonderãme,

21upévare pehasapa Jordan rupi pene ñorãirõ rembiporu reheve Ñanderuete renondépe, Ha’e omosẽmba peve ko’ã tetã ko’ãvape pene renonderãgui,

22ha ñambopoguypa rire ko’ã tetãme Ñanderuete pytyvõ rupi, peẽ peju jevykuaa, ha penesãsóta pene ñe’ẽ peme’ẽva’ekuégui Ñanderuete ha Israelguakuéra renondépe; ha pe yvy péva opytáta pene mba’erã ramo Ñanderuete renondépe.

23Ha ndapejapói ramo peje haguéicha, peñemoangaipáta Ñanderuete renondépe; ha peikuaa porãke pene angaipa penderupity jevyva’erãha.

24Ko’ág̃a tapeho pemopu’ã hag̃ua tavakuéra pene mitãkuérape g̃uarã, ha korapy pende ovechakuérape g̃uarã, ha upéi pejapopa pende juru he’iva’ekue guive.

25Ha Gad ha Ruben tribukuéra oñe’ẽ Moiséspe, ha he’i: Ne rembiguaikuéra ojapopáta ore jára he’i haguéicha.

26Ore mitãkuéra, ore kuñakuéra ha ore rymbakuéra opytapáta ko’ã Galaad tavaguasukuérape;

27ha ore, ne rembiguaikuéra ore ñorãirõ rembiporukuéra reheve, rojeityse Ñanderuete rérape ko’ã tetãnguéra ári ambue Israelgua renonderãme.

28Upémaramo Moises he’i pa’i Eleazar ha Josue, Nun ra’ýpe, ha umi Israel tríbu ruvichakuérape:

29Umi Gad ha Ruben tribukuéra ohasa ramo penendive ko Jordan iñorãirõ rembiporu reheve Ñanderuete rérape, ha oñembopoguypa ramo ko’ã tetãnguérape, peme’ẽta ichupekuéra Galaad yvy imba’eteerã ramo,

30ha ndohasái ramo iñorãirõ rembiporu reheve penepytyvõ hag̃ua, upéicha ramo ha’ekuéra oguerekóta avei ijyvyrã Canaan yvýpe, ipehẽnguekuéra apytépe.

31Ha Gad ha Ruben tribukuéra he’i jevy: Rojapopáta, Ñanderuete he’íva guive.

32Ore rohasáta pe Jordan ore ñorãirõ rembiporu reheve, Ñanderuete rérape rojeity hag̃ua Canaan retãnguéra ári, ha ore yvyrã opytáta Jordan asúpe, kuarahyresẽ gotýo.

33Péicha Moises ome’ẽ Gad, Ruben ha Manases tríbu mbyterépe pe yvy Sehon, Amorgua retã ruvicha oisãmbyhy haguépe ha Basan retã, Og oisãmbyhy haguépe, ha opaite itáva ha ijyvy reheve.

34Upéi Gad tribukuéra omopu’ã jevy Dibon, Atarot, Aroer,

35Atrotsofan, Jazer, Jogbeha,

36Betnimra ha Betaran, ha oñemongorapa ko’ã táva ha ojapo avei hikuái ijovecha ha kavara korapyrã.

37Ha Ruben tribukuéra omopu’ã jevy Hesbon, Eleale, Quiriataim,

38Nebo, Baal-meon (héra pyahu) ha Sibma; ha’ekuéra ome’ẽ téra pyahu umi táva omopu’ã jevyva’ekuépe.

39Ha Maquir ra’ykuéra, Manases remineno, oho Galaádpe, ha omoĩ ipoguýpe ha omosẽ umi Amorguakuérape oikóva ipype.

40Ha Moises ome’ẽ Maquir ra’ykuérape Galaad, oiko hag̃ua ipype.

41Upéi Jair, Manases ra’y, oho ha omoĩ Galaad tava’ikuéra ipoguýpe.

42Upéicha avei Noba, upéi omoĩ Kenat ha itava’ikuéra ipoguýpe. Upéi omoambue Noba réra: Jair táva.