1 Réyes 2 - Biblia en Guaraní - ?anderuete ?e’? Por? 2015

David he’i Salomónpe hembiaporã

1Og̃uahẽvo David ára paha, he’i ita’ýra Salomónpe opaite mba’e ojapova’erãva.

2Che ahava’erã katuete opaite yvyariguakuéra ohova’erãha tape rehe, ha nde karia’yete,

3eñangarekóke Ñanderuete ñe’ẽ rehe, reikóvo hape rehe, ha ejapopa Ha’e he’iva’ekue guive Moises juru rupi, ikatu hag̃uáicha resẽ porã opaite ne rembiapópe.

4Ñanderuete omoañete hag̃ua iñe’ẽ he’iva’ekue chéve: Nde ra’ykuéra oguata ramo che rape rehe, ha ojapo ramo che rembiapoukapy, ipy’a ha hi’angaite guive, katuete ne ñemoñarenguéra opytava’erã Israel retã guapyhápe.

5Nde reikuaa porã voi Joab, Sarvia memby, ojapova’ekue cherehe ojukávo mokõi Israel soldádo ruvicha oĩ aja py’aguapy, ha’e oñohẽ Abner, Ner ra’y, ha Amasa, Jeter ra’y ruguy, upéicha ha’e omyengovia ityvýra ruguy oñeñohẽva’ekue ñorãirõme ha upévarupi omongy’a iku’a jopyha ha isapatukuéra (ha cheári ho’a ko’ã jejuka).

6Eiporu katu ne arandu ha ani reheja ha’e oguejy py’aguapýpe ha hi’áva morotĩ reheve ityvýpe (isepultúrape).

7Barzilái, Galaadgua ra’ykuéra katu eiporiahuvereko, ha’ekuéra tokaru ne mesápe; ha’ekuéra chemongaruva’ekue ahasa asyete aja akañy ramoguare aikóvo nde ryke’y Absalóngui.

8Nendive oĩ avei Simei, Gera ra’y, peteĩ Benjamin ñemoñaréva, peteĩ Bahurimgua, péva chemaldeciva’ekue pe ára aha ramoguare kañyháme Mahanáimpe. Ha aju jevývo Jerusalen gotýo ha’e cheruvaitĩ Jordánpe, ha che ame’ẽ ichupe che ñe’ẽ Ñanderuete rérape, ha’évo: Che ndorojukamo’ãi kyse pukúpe.

9Ko’ág̃a katu ndereheja reimo’ãi ichupe; nde kuimba’e arandúgui voi, reikuaáta mba’épa rejapóta hese; emboguejy hi’áva morotĩ huguy reheve ityvýpe.

David ñemano

10Ha David omano rire oñeñotỹ ichupe ituvakuéra távape.

11Ha David oisãmbyhy Israel retã 40 áño; 7 áño oisãmbyhy Hebrónpe, ha 33 áño oisãmbyhy Jerusalénpe.

12Upéicha Salomón oguapy itúva guapyhápe, ha ipu’aka oñemombareteveteve ohóvo.

Salomón omombarete hetã verapy

13Upémaramo Adonías, Hagit memby, ou Betsabe, Salomon sy rendápe; ha Betsabe he’i ichupe: Rejúpa py’aguapy reheve. Ha Adonías he’i: Upéicha, py’aguapy reheve aju.

14Upéi he’i: Peteĩ ñe’ẽmínte ha’ese ndéve. Ha Betsabe he’i: Ere katu.

15Ha ha’e he’i: Nde reikuaa porã tetã Israel ruvicha guapyha chemba’enteha voi, ha opaite Israelgua oha’ãrõ joa che aisãmbyhy hag̃ua, pe guapyha katu oñeme’ẽma ambuépe, ha oiko che ryvy Salomón mba’e ramo, Ñanderuete oipotágui.

16Ko’ág̃a ajerure peteĩ mba’emínte; aníkena rembotovétei chehegui. Ha ha’e he’i: Eñe’ẽ.

17Upéramo Adonías he’i: Ajerure ndéve ere hag̃ua tetã ruvicha Salomónpe, tome’ẽ chéve Abisag, pe Sunemgua, che rembirekorã ramo, ha’e nombotovemo’ãi ndehegui.

18Ha Betsabe he’i: Oĩ porã, che añe’ẽta tetã ruvicha ndive.

19Betsabe ou tetã ruvicha rendápe oñe’ẽ hag̃ua ichupe Adonías rehe. Ha tetã ruvicha opu’ã omomaitei hag̃ua ichupe, ha ojayvy henondépe, ha oguapy jevy iguapyhápe, ha ogueruka peteĩ guapyha isýpe g̃uarã, ha ha’e oguapy ijakatúape.

20Peteĩ mba’e jerure agueru ndéve, ani chembotovétei. Ha tetã ruvicha he’i ichupe: Ejerure katu che sy, che norombotoveichéne.

21Ha ha’e he’i: Eme’ẽmína Abisag nde ryke’y Adoníaspe, hembirekorã ramo.

22Tetã ruvicha Salomón he’i isýpe: Mba’érehepa rejerure Abisag, pe Sunemgua rehe Adoníaspe g̃uarã. Ejeruréna avei ichupe g̃uarã ko tetã guapyha; ha’égui voi che ryke’y ypykue ha pa’i Abiatar, ha Joab, Sarvia memby, omoirũma avei ichupe.

23Ha tetã ruvicha Salomón ome’ẽ iñe’ẽ Ñanderuete rérape, ha he’i: Ñanderuete tachehavira che ndajukaukái ramo ichupe.

24Ñanderuete voi chemboguapy che ru David guapyhápe, ha chembohóga, Ha’e he’i haguéicha chéve, Adonías omanova’erã katuete ko árape.

25Upémaramo tetã ruvicha omondo Benaíape, Joiada ra’y, ojuka hag̃ua Adoníaspe; upéicha ha’e omano.

26Ha tetã ruvicha he’i pa’i Abiatárpe: Tereho Anatótpe, nde kokuépe. Iporãva’erãmo’ã che rojukauka, ndorojukamo’ãi katu ko árape, regueraha haguére Ñanderuete, pe Jaraitéva karameg̃ua che ru David renondépe, ha rehaságui avei opaite jepy’apy che ru ndive.

27Péicha Salomón omosẽ Abiatárpe pa’i rekógui, ojehu hag̃ua Ñanderuete ñe’ẽ Ha’e he’iva’ekue Eli rogaygua rehe Sílope.

28Ko’ã mba’e oñemombe’u Joábpe; ha’e omoirũkuri avei Adoníaspe, jepevémo noñemoĩri Absalon ykére. Ha Joab okañy, Ñanderuete róga jojohuhápe ha ojejapyhy kuave’ẽmby renda ratĩ rehe.

29Ojekuaauka Salomónpe, Joab okañy hague Ñanderuete róga jojohuhápe ha oĩha kuave’ẽmby rendápe. Upémaramo Salomón omondo Benaía, Joiada ra’ýpe, he’ívo ichupe: Tereho ha ejuka ichupe avei.

30Ha Benaía oike Ñanderuete róga jojohuhápe ha he’i ichupe: Tetã ruvicha he’i resẽ hag̃ua, ha ha’e ombohovái: Nahániri, ápente tamano. Ha Benaía oho omombe’u tetã ruvichápe, he’ívo: Péicha he’i Joab, ha péicha ombohovái jevy chéve.

31Ha tetã ruvicha he’i ichupe: Ejapo hese he’i haguéicha, ejuka ha eñotỹ ichupe, upéicha enohẽ chehegui ha che ru rógagui umi tuguy Joab oñohẽ reieteva’ekue.

32Ñanderuete ombou iñakã ári umi tuguy, ha’e voi ojuka haguére mokõi kuimba’e heko potĩva ha iporãvéva ichugui, ko’ãvape ojuka kyse pukúpe che ru David oikuaa’ỹre mba’eve: Abner, Ner ra’y, Israel soldádo ruvichaguasúpe ha Amasa, Jeter ra’y, Juda soldádo ruvichaguasúpe, (umíape ojukakuri Joab).

33Ko’ãva ruguykue ho’a joa jevyva’erã Joab akã ári, ha iñemoñarenguéra akã ári, opaite ára peve; David ha iñemoñarenguéra ári, hogaygua ha iguapyha ári, oĩva’erã katu py’aguapy Ñanderuete reheguáva opaite ára peve.

34Upémaramo Benaía, Joiada ra’y, ojupi ha ojuka rire Joábpe oñotỹ ichupe hógape upe desiértope.

35Ha tetã ruvicha omoĩ hendaguépe Benaía, Joiada ra’ýpe, isoldádo aty ruvichaguasu ramo, ha tetã ruvicha omoĩ Sadócpe pa’i ramo, Abiatar rendaguépe.

36Upéi tetã ruvicha ogueruka Simeípe, ha he’i ichupe: Emopu’ã nde rogarã Jerusalénpe ha eiko upépe, ha ani resẽtei upégui mamovete.

37Eikuaa porãke, resẽha ára ha rehasa Cedron ysyry rupi, katuete remanóta, ha nde ruguy ho’áta ne akã ári.

38Ha Simei he’i tetã ruvichápe: Pe eréva iporã, che jára ha che retã ruvicha he’i háicha, péicha ne rembiguái ojapóta avei. Ha Simei oiko Jerusalénpe heta ára pukukue.

39Ha ohasa rire mbohapy áño, mokõi Simei rembiguái okañy ha oho hikuái, Aquis, Maaca ra’y, Gat retã ruvicha rendápe. Ha oñemombe’u Simeípe, oje’évo: Péina ne rembiguaikuéra oime Gátpe.

40Upémaramo Simei opu’ã ombyape hymba búrro ha oho Aquis rendápe, oikóva Gátpe, ogueru jevy hag̃ua hembiguaikuérape. Ha Simei oho ha ogueru hembiguaikuérape Gátgui.

41Upéi oñemombe’u Salomónpe, Simei oho hague Jerusaléngui Gat peve, ha ou jevymaha.

42Upémaramo tetã ruvicha omondo ha ogueru Simeípe, ha he’i ichupe: Noromoñe’ẽme’ẽipara’e Ñanderuete rérape ha’évo ndéve: Resẽha ára ha reho ápe térã amo, eikuaa porãke remanova’erãha, ha nde ereva’ekue chéve: Pe eréva iporã, che ajapopáta nde eréva guive.

43Mba’érehepa nderejapói Ñanderuete réra pegua ñe’ẽme’ẽ ha pe tembiapoukapy che ha’eva’ekue ndéve rejapo hag̃ua.

44Tetã ruvicha he’i avei Simeípe: Nde reikuaa voi opaite mba’evai oĩva nde py’apýpe, ha rejapova’ekue che ru David rehe, Ñanderuete ombou ko’ã mba’evai ne akã ári.

45Ha tetã ruvicha Salomón oñemoherakuã porãve ohóvo, ha David guapyha opyta hatãva’erã opaite árape Ñanderuete renondépe.

46Upémaramo tetã ruvicha he’i Benaía, Joiada ra’ýpe: Tereho ha eikutu ichupe omano hag̃ua. Ha tetã pu’aka oñemoĩ hatãve Salomón pópe.