1Ñanderuete ñe’ẽ ou Jeremíaspe, Sedequías, Juda retã ruvicha oisãmbyhy aja 10 áño tetã ruvicha ramo, ha Nabucodonosor oisãmbyhy aja 18 áñoma.
2Upéramo Babilónia retã ruvicha soldádo aty omongora Jerusalénpe ha pe proféta Jeremías oĩ upérõ cárcelpe Juda retã ruvicha róga korapýpe.
3Sedequías, Juda retã ruvicha, ojapyhyukágui ichupe, he’ívo: Mba’érehepa reiko remomarandu erévo, péicha he’i pende Ruete: Peikuaa porãke, Che amoĩta ko táva kóva Babilónia retã ruvichaguasu poguýpe, ha katuete ho’áta ipopekuéra.
4Sedequías, Juda retã ruvicha, nokañymo’ãi Caldeayguakuéragui, añetehápe oñemoĩta ichupe Babilónia retã ruvicha pópe, ha oñe’ẽta hendive ojovakete ha hesatee rupi ohecháta ichupe.
5Ha oguerahaukáta Sedequíaspe Babilónia retãme, ha upépe opytáta chemandu’a jevy peve hese; ha peñorãirõ ramo umi Caldeaygua ndive, ndoho porãmo’ãi peẽme, he’i pende Ruete.
6Ha Jeremías he’i: Ñanderuete ñe’ẽ ou chéve, ha he’i:
7Ema’ẽ porãke, Hananeel, nde tio Salum ra’y, oúta ne rendápe ha he’íta: Ejoguána chehegui che kokue oĩva Anatótpe; nde ningo che pehẽngueteégui rejoguakuaa.
8Ha ou che rendápe Hananeel, che tio ra’y, Ñanderuete ñe’ẽ he’i haguéicha chéve aĩ jave cárcelpe, ha he’i chéve: Ejoguána chehegui che kokue oĩva Anatótpe, Benjamin yvýpe, ndénte reñemomba’ekuaa hekoitépe che kokue rehe, nde ikatu reguenohẽ pirapire repy rehe; ejoguána péva ne mba’erã ramo. Ha upévo ahechakuaa Ñanderuete oñe’ẽ hague chendive.
9Ha ajogua Hananeel, che tio ra’y kokue, opytáva Anatótpe, ha aha’ã (apesa) ichupe iplatarã, 190 grámo óro morotĩ.
10Upérõ ahai ichupe kuatiañe’ẽ, ha amoha’ãnga (afirma) rire techaharekuéra renondépe, aha’ã iplatarã balánzape.
11Upéi ajapyhy che yvy kuatiañe’ẽ (título), oñemoha’ãgáva hekoitépe ha ajapouka ambue kuatiañe’ẽ (cópia) ojehecha hag̃uáicha ha oñemboty’ỹva.
12Ha ame’ẽ ko kuatiañe’ẽ Baruc, Nerías ra’ýpe, Maasías ra’yrépe, che tio ra’y Hananeel rovake, ha umi techahare rovake, omoĩma avei herakuéra ko kuatiañe’ẽme, mayma Judaygua rovake oĩva guive pe cárcelpe.
13Ha hovake che ha’e Barúcpe péicha:
14Péicha he’i Yvága Atykuéra Jára, Israel Jára: Ejapyhy ko kuatiañe’ẽ, ko yvy kuatiañe’ẽ ajoguamava’ekue Hananeélgui ha oñemoha’ãngava’ekue, ha pe ambue kuatiañe’ẽ oñemboty’ỹva, ha emoĩ mokõivéva peteĩ kambuchi ñay’ũguiguápe, oiko hag̃ua heta árape.
15Yvága Atykuéra Jára, Israel Jára he’ígui chéve: Ojejogua jevytaha ogakuéra, kogakuéra ha parraltykuéra ko tetã kóvape.
16Ha ame’ẽ rire pe yvy kuatiañe’ẽ Baruc, Nerías ra’ýpe, añembo’e Ñanderuetépe, ha ha’e:
17Nde, che Ruete: Aikuaa porã ningo nde pu’aka rupi rejapomava’ekue umi yvága ha ko yvy, nde pyapy jepysopyre rembiapopa voi ningo; ndéve g̃uarã ndaipóri mba’eve ikatu’ỹva rejapo.
18Reiporiahuvereko 1.000 ñemoñare (generaciónes) peve ha rehaviránte tuvakuéra rembiapo vaikuére ita’yrakuéra pevénte; Ñanderuete tuichaitéva ha ipu’akapáva, nde réra ningo Yvága Atykuéra Jára.
19Ituichaite ningo ne rekombo’e ha opaite ne rembiapo iporãite; nde resa ohecha porãmba yvyarigua rembiapo, rehepyme’ẽ peteĩteĩvape ojapo haguéicha ha hembiapokue ojerure háicha.
20Nde rejapóma tembiapo techapyrãva ha techaukaha tuicháva Egípto retãme ko ára kóva peve, Israel retã ha yvyariguakuéra apytépe; upévagui oñemoherakuã porã nde réra, ko ára kóvape ojehecha háicha.
21Ha reguenohẽva’ekue ne retã Israélpe tembiapo techapyrã rupi, nde pyapy jepyso mbaretepópe ha tuicha ñemongyhyje rupi;
22ha reme’ẽ ichupekuéra ko yvy kóva, ituvakuérape eremava’ekue reme’ẽtaha ko yvy osyryhápe kamby ha eíra.
23Ha’ekuéra oike ha oñemomba’e rire ko tetãre naiñe’ẽrenduvéi ha ndojapovéi ne rembiapoukapy he’i háicha; opaite mba’e Nde ereva’ekue ichupekuéra omboyke hikuái ha upévaguinte rembou hi’arikuéra opaite ko’ã mba’evai.
24Pema’ẽ porãke, omopu’ã hikuái yvy atýra Jerusalen tápia renondépe ha oko’i hikuái ko táva rehe ombopoguy hag̃ua, ha ko táva kóva ho’átagui umi Caldeaygua pópe, ikyse puku, ñembyahýi ha mba’asy iñasãiva rupi; ha ojehupáta Nde ereva’ekue guive, ha’ekuéra voi ohecha porãmbátama.
25Nde, che Ruete, eréma chéve: Ejogua ne mba’erã nde prímo kokue, techaharekuéra rovake; ho’áta ramojepe ko táva kóva Caldeayguakuéra pópe.
26Ha Ñanderuete ñe’ẽ ou Jeremíaspe, ha he’i:
27Ema’ẽ porãke, Che ningo pende Ruete, mayma oikovéva Jára, oĩnepa mba’e hasýva ikatu’ỹva Che ajapo.
28Upévare Ñanderuete he’i chéve: Eikuaa porãke ko táva kóva amoĩta Nabucodonosor, Babilónia retã ruvicha, ha Caldeayguakuéra pópe ha katuete ombopoguýta ko táva kóvape.
29Ha umi Caldeaygua oúta ojeity hag̃ua ko táva ári, ha ohapýta hikuái ko távape, ohapýta avei umi óga ijape ári oñekuave’ẽ haguépe Baálpe g̃uarã mba’e ryakuã porã ha oñohẽ hague hikuái víno ambue jarakuérape g̃uarã ha ko’ã mba’e rupi ha’ekuéra ou chembopochy.
30Umi Israel ha Juda ra’ykuéra tapia ojapo ivaíva che resa renondépe imitãrusu ára guive; hembiapo vaikuéra rupi Israelguakuéra ou chembopochy, he’i pende Ruete.
31Ko táva kóva chembopochy oñemopu’ãha ára guive ko ára peve, upévare Che ahundíta ichupe.
32Israel ha Judayguakuéra ñaña reko rupi chembopochy, oimeraẽva oikóva guive ipype chembopochy: Hetã ruvichakuéra, imburuvichakuéra, ipa’ikuéra, iprofetakuéra, Judayguakuéra ha Jerusalenguakuéra.
33Ojerénte hikuái ome’ẽ hag̃ua chéve ijatukupe, ha nome’ẽséi chéve hova; ha ahekombo’e porã ramojepe ichupekuéra ko’ẽ ko’ẽre ndojapysakaséi hikuái omyatyrõ jevy hag̃ua hekove.
34Upéva rãngue omoĩ ijára ra’ãnga gua’u che rógape, oñehenoiháme che réra, ha péicha omongy’a hikuái che rogaguasu.
35Ha omopu’ã hikuái kuave’ẽmby renda Baálpe g̃uarã Hinom ra’y cerrokuéra pa’ũme, upépe ohapy tatápe ita’ýra ha itajyrakuérape Molócpe g̃uarã; umi mba’e Che nda’eiva’ekue ichupekuéra ojapo hag̃ua, ha ndoúiva che akãme ojapo hag̃ua hikuái, ko’ã mba’evaiete rupi Judayguakuéra oñemohembiapo vaieteve ohóvo.
36Upévare Che, pende Ruete, Israel Jára, ha’éma ko táva kóva ho’ataha Babilónia retã ruvicha pópe, kyse puku rupi, ñembyahýi ha mba’asy iñasãiva rupi.
37Peikuaa porãke, upéi Che voi ambyaty jevýta ichupekuéra opaite tetãgui amosarambi haguégui, che pochy ha che py’aro ogueraha haguépe, aguerukapa jevýta ko’ápe, ha ambosako’ipáta oiko jevy hag̃ua py’aguapýpe hetãteépe;
38ha’ekuéra oikóta che retã ramo, ha Che aikóta Ijára ramo.
39Ha ambopyahúta ipy’apy ha amopotĩta haperã, ha’ekuéra okyhyje hag̃ua chehegui opaite árape, ohupity hag̃ua mba’eporã ha oñemboheta hag̃ua.
40Añembopy’apeteĩta hendivekuéra tapia g̃uarã ha ajapo meméta mba’eporã ichupekuéra ha amoĩta ipy’apýpe kyhyje ani hag̃ua oñemboyke jevy chehegui.
41Ha cheroryetéta che py’a ha che angaite guive ha ajapóta hesekuéra mba’e iporãva, ha añotỹta ichupekuéra ko yvy kóvape.
42Péicha he’i pende Ruete: Agueru haguéicha ko tetã kóva ári opaite ko’ã mba’evaieta, upéicha avei aguerúta hi’arikuéra opaite mba’eporã ha’emava’ekue.
43Ha ojejogua jevýta pe yvy ko tetã kóvape, peẽ peje ramojepe hese: Itapere, ndaipóri ipype yvyariguakuéra ni tymbakuéra, ho’apágui Caldeayguakuéra pópe.
44Ojogua joáta hikuái ikokuerã pirapire rehe, ha ohaíta ijyvy kuatiañe’ẽ (título), omoha’ãngáta (ofirmáta) ha omoĩta avei umi techahare réra, upéicha ojejapóta Benjamin yvýpe, Jerusalénpe ha Juda tavakuéra ryepýpe ha ijypýpe, Sefela cérro guive Négev peve; Che voi agueru jevýta umi ojeguerahamava’ekue jepokuapyhápe, he’i pende Ruete.
Who We AreWhat We EelieveWhat We Do
2025 by iamachristian.org,Inc All rights reserved.
