Provérbios 19 - Biblia en Guaraní - ?anderuete ?e’? Por? 2015

1Iporãiteve pe imboriahúva oguatáva teko potĩme, upe ipirapire hetáva juru tie’ỹ iñañáva ha ivýrovagui.

2Pe ánga iñarandu’ỹva naiporãi, ha pe py oñembopya’etéva oñemoangaipa hag̃ua ivai avei.

3Pe tapicha reko ñaña ohundi ichupe, ha ipy’apýpe ha’e ipochy Ñanderuete ndive.

4Pirapire heta ombyaty heta amígo; ha pe imboriahúva angirũ oñemomombyry ichugui.

5Pe techahare japu ndopytaiva’erã ojehavira’ỹre, ha upe he’íva japu ndojesalvamo’ãi araka’eve.

6Heta oiko porãse ipojeráva ndive, ha upe ome’ẽva jopói heta hi’angirũ.

7Imboriahúvagui opaite hyke’ykuéra jepe ojei; ko’yteve katu hi’angirũnguéra oñemomombyrypava’erã ichugui, ha’e ohekáta iñe’ẽ irũrã, ha ndojohumo’ãvéi avavére.

8Pe iñarandúva ohayhu hi’ánga; ha upe oñemoakã porãva katu ojohuva’erã mba’eporã.

9Pe techahare japu ndopytaiva’erã ojehavira’ỹre, ha upe he’íva japu omanova’erã.

10Pe ivýrova ndaijái okaruguasu hag̃ua, ha ko’yteve pe tembiguáipe oikose ramo ijára ruvicha ramo.

11Pe tapicha akãguapýva ojekuaáta ojokokuaágui ipochy, ha oñemombe’u porãta ichupe operdonakuaa ramo hapicha rembiapo vai.

12Pe tetã ruvicha pochy ku leõ okororõvaicha, ipy’a porãva ndive katu ku ysapýicha kapi’ípe g̃uarã.

13Pe ta’ýra ivýrova ohundi itúva rekove ha peteĩ tembireko oñorãirõitereíva ku óga otyky tapiaitévaicha.

14Túva yvyarigua ohejapava’erã ita’yrakuérape: Hóga ha imba’erepyeta; Ñanderuete remime’ẽ katu peteĩ tembireko iñakãguapy porãva.

15Pe iñate’ỹva ojeity topehýi nderypývape, ha pe tekove ate’ỹ iñembyahyiva’erã.

16Pe ojapóva Ñanderuete rembiapoukapy oñangareko porã hi’ánga rehe; ha upe oñembohorýva hapekuéra rehe omanova’erã.

17Upe oipytyvõva imboriahúvape ome’ẽhína Ñanderuetépe, ha pe mba’eporã ojapóva, oñemyengovia jevyva’erã ichupe.

18Ehavira nde ra’ýpe imitã aja, ne ánga katu ani ipochyeterei ojuka hag̃uáicha ichupe.

19Pe ipochyetereíva ohupityva’erã jehavira ha nde reipytyvõse ramo rembopochyvéta ichupe, ha ha’e ombojo’a jo’aveva’erã imba’evai.

20Nde neñe’ẽrendúke ha eñemomirĩ jehavira guýpe, nearandu hag̃ua nde ára tujápe.

21Heta jepy’amongeta oĩ ñande py’apýpe Ñanderuete rembipotánte katu ojehuva’erã ñande rekovépe.

22Pe tapicha oporoporiahuverekóva ovy’a, upévagui pe imboriahúva iporãiteve pe oporombotavysévagui.

23Upe okyhyjéva Ñanderuetégui oikoveva’erã, ha’e oke porãta hyg̃uatã porãgui.

24Pe iñate’ỹva opoko ramojepe hembi’urã rehe, ikaigue ogueraha hag̃ua ijurúpe.

25Ehavira pe oñembohory asývape, ha iñaranduveva’erã; ha rehekombo’e ramo iñakã porãvape oikuaáta avei pe arandu rape.

26Pe omondáva itúvape ha omosẽva isýpe, péva ningo peteĩ ta’ýra heko vai ha iñañáva.

27Nde, che ra’y, neñe’ẽrenduva’erã, ỹrõ repiáta arandu rapégui ha reñehundíta.

28Pe techahare tie’ỹ iñañáva oñembohory ñembojovake porã rehe, ha umi iñañáva omboyke pe justícia.

29Umi oñembohorývape g̃uarã oñembosako’íma ijehavirarã, ha ivýrova retépe g̃uarã katu oĩ tukumbo.