Miquéas 4 - Biblia en Guaraní - ?anderuete ?e’? Por? 2015

Ñanderuete omoangapyhy jevy Israel retãme ipytyvõrã rupi.

1Ha ojehúta umi ára pahápe pe cérro oñemopu’ã haguépe Ñanderuete rogaguasu, oikóta cérro akã ramo ambue cerrokuéra apytépe ha tetãnguéra oñembyatýta upépe.

2Hetaiterei tetãygua og̃uahẽta ha he’íta: Pejúke ha jajupi Yvága Jára cérrope, ha Jacóbo Jára rogaguasúpe, Ha’e ohechauka hag̃ua ñandéve ñane raperã, ha jaiko hag̃ua hape po’ípe, Sióngui ningo osẽta Ñanderuete rekombo’e ha Jerusaléngui osẽta Ñanderuete ñe’ẽ.

3Ñanderuete voi ombojovakéta tetãnguérape ha Ha’e ohekombo’éta tetã guasúpe mombyry oikóvape; ikyse pukúgui ojapóta hi’aradorã ha hu’yguasúgui ojapóta ikyserã oikytĩ hag̃ua iparral rakã, ha ndaiporimo’ãvéima ñorãirõ ha avave nombo’emo’ãvéima hapichápe oiporu hag̃ua ñorãirõ rembiporukuéra, (oĩgui upépe py’aguapy).

4Ha peteĩteĩva oguapýta iparralty ha hi’ígo rakã guýpe, ha ndaiporimo’ãvéima omongyhyjéva ichupekuéra, ángel atykuéra Jára juru he’ígui ko’ã mba’e.

5Ambue tetãnguéra omomba’eguasu ramojepe ijára gua’úpe, ore katu roikóta Ñanderuete oipota háicha tapia g̃uarã.

6Upe ára upévape he’i pende Ruete, ambyatýta umi ikarẽvape, umi okañyva’ekue ha umi ahavirava’ekuépe.

7Ha umi ikarẽva ha umi okañýva oikóta peteĩ tetã imbaretéva ramo ha pende Ruete voi oisãmbyhýta ichupekuéra tapia g̃uarã Sion cérro guive.

8Ha nde Sion cérro, tymba róga yvate, nde ningo pe táva tápia yvate oñemombaretéva, nde pu’aka oñeme’ẽ jevýta ha Jerusalen retãyguakuéra oiko jevýta tetãnguéra ruvicha ramo.

9Mba’érehe piko resapukái rei reikóvo. Ndaipóri piko mburuvicha ndepype. Omano piko nerekombo’éva, ha ou ndéve mba’asy kuña imembymbotarõguáicha.

10Kuña imembymbotarõguáicha eryrýi ha esapukái, nde Sion rajy (Jerusalenguakuéra), ko’ág̃a ningo resẽta nde távagui ha reikóta ñúre reg̃uahẽ meve Babilónia retãme. Upépe rejejoráta, upépe pende Ruete neguenohẽta hesekuéra ija’e’ỹva poguýgui.

11Ko’ág̃a katu heta tetã oñembyaty oñemoĩ hag̃ua nderehe ha he’i hikuái: Toñemongy’a Jerusalen ha rohechase mba’éichapa ohasa asy, roñembohory hag̃ua hetãyguakuéra rehe.

12Ha’ekuéra ndoikuaaiete pende Ruete py’apýpe oĩva térã mba’épa Ha’e ojapótava, upévare Ha’e ombyaty ichupekuéra oñemono’õ háicha umi trígo háse.

13Epu’ã Sion ha ejykýi, Che ajapóta ne ratĩ hiérrogui ha ne pysãpẽ bróncegui remongu’ipa hag̃ua heta tetãme. Imba’eita nde reguerúta pende Ruete rogaguasúpe.