1 Timotéope 1 - Biblia en Guaraní - ?anderuete ?e’? Por? 2015

Páblo ohai Timotéope

1Che, Páblo, Hesu Crísto remimondo (apóstol), Ñanderuete cheporavógui amyasãi hag̃ua ita’ýra Hesu Crísto evangélio, Ha’e ningo ñane esperánza, Ha’e ñandesalváma.

2Che, Páblo, amondo ndéve, che jeroviaha ra’ýpe, ko kuatia, ha romomaitei: Ñandejára Ñanderuete ha Ñandejára Hesu Crísto poriahuvereko, py’aporã ha py’aguapy toĩ nendive.

Mbo’ehára gua’u

3Ajerure haguéicha ndéve, ha’e jevy: Epyta Eféso tavaguasúpe, che aha ramo Macedóniape, ha che roavisase jevy nde rejoko hag̃ua umi oporombo’éva ambue mbo’epy rehe, anive hag̃ua ombo’e,

4ha anive ohechakuaa ha omyasãi umi ñemombe’u gua’u, ni oñeha’ãve oipyguara hag̃ua ñande ypykuéra réra opave’ỹva apytépe, umi mba’e rupi heñói ñe’ẽ joapirã rei pende apytépe, ha nomongakuaái ñande jerovia.

5Che rombo’éma pe tekombo’e tuichavévare: Ñande jajohayhuve jahávo ha péva heñoiva’erã py’a potĩgui, py’apyñe’ẽ porã ha jerovia añetévagui.

6Oĩ katu pende apytépe umi oñemomombyrýva ko’ã mba’égui, ojapyhy hag̃ua ñe’ẽ výro reíva.

7Oikose tembiapoukapy mbo’ehára ramo, ndoikuaái katu upe he’íva, ni nahesakã porãi ichupekuéra umi mba’e oporombo’éva.

8Jaikuaa ningo Ñanderuete rembiapoukapy iporã ojeporu ramo hekópe, ha Ha’e oipota háicha.

9Jaikuaa porã ningo Ñanderuete nome’ẽiva’ekue hembiapoukapykuéra heko potĩva ha hekojojávape g̃uarã. Ha’e ome’ẽ uvei hembiapoukapykuéra umi tekove vai ha umi oñembotuichávape g̃uarã, umi oñemomombyrýva Ñanderuetégui, hembiapo vaívape g̃uarã, iñañáva ha oñemongy’ávape g̃uarã, umi itúva ha isy jukahárape, térã hapicha jukahárape g̃uarã jepe,

10umi ojoguerekóva menda’ỹre ha umi oikóva kuimba’e kuimba’e ndivépe g̃uarã, umi hapicha mondaha ha umi ijapúvape g̃uarã, umi omoañeteséva iñe’ẽ japu oiporúvo Ñanderuete réra ha opaichagua tekove vaípe g̃uarã.

11Ñanderuete ñe’ẽ porãite ñanemosãso ko’ã mba’evaígui, Ñanderuete reko jajaipa rupi, ha ko ñe’ẽ porãite Ha’e ome’ẽ chéve amyasãi hag̃ua.

Páblo oagradece

Hesu Crístope

12Che agradece Ñandejára Hesu Crístope, Ha’e chemombaretégui, ha cheguerekoháre jeroviaha ramo chemoĩ ko evangélio ñemyasãi rembiapópe.

13Yma che añe’ẽvai ramojepe Hesu Crísto rehe, ha che apersegui ha aja’o vai ramojepe Hesu Crísto reheguávape, ahupity avei Hesu Crísto poriahuvereko, ndaikuaái ni ndajeroviaiva’ekuégui hese.

14Hesu Crísto katu chemyenyhẽ iporiahuverekógui heñói hag̃ua chepype pe jerovia ha pe mborayhu añeteguáva Ha’érupi.

15Hesu Crísto ñe’ẽ porãite hi’añete ha ija oimeraẽva ojapyhy hag̃ua. Hesu Crísto ou ko yvy apére osalva hag̃ua angaipavórape, ha ijapytépe che pe ituichaveva’ekue.

16Upévare Hesu Crísto chemyenyhẽ iporiahuverekógui, péva ijopói chéve g̃uarã, ojehechauka hag̃ua che rekove rupi, imborayhu tuicha oha’ãrõva opaite ojeroviátavape g̃uarã, ohupity hag̃ua avei Hesu Crísto rupi pe tekove opa’ỹva.

17Toñemomba’eguasu pe ára atyguasukuéra Járape, Ha’e voi ningo Ñanderuete peteĩetéva ha tapia oikóva, ha ndojehechái ramojepe ichupe toñemboete ichupe ára atyguasukuéra rupi, taupéicha (amen).

18Ko ñe’ẽ kóva che aipota nde, che ra’y, Timotéo rehechakuaa porã ha emyasãi avei ambuekuérape, ojejapouka haguéicha ndéve profecía rupi, upévare eñeha’ãmba nde reñorãirõ hag̃ua pe ñorãirõ porãme,

19jeroviapópe ha py’apy ñe’ẽ porãme; oĩ ningo pende apytépe umi omboykéva ipy’apyñe’ẽ (conciéncia) ha upévagui ohundi ijerovia.

20Ijapytépe oĩ Himenéo ha Alejándro, umívape che ame’ẽma Satanáme ohavira hag̃ua ichupekuéra ha anive hag̃ua omaldeci hikuái.