Job 19 - Biblia en Guaraní - ?anderuete ?e’? Por? 2015

Job ojerovia Ñanderuete rehe ha oha’ãrõ Ha’e omoĩ porã jevy hag̃ua ichupe

1Uperire Job oñe’ẽ jevy, ha he’i:

2Araka’e pevépa peẽ chemyangekõita ha pechekutúta pene ñe’ẽ pohýi rupi.

3Peẽ cheja’óma 10 jevýma, napetĩripa peñe’ẽvai hag̃ua péicha chéve.

4Ha oimérõ jepe añete che añemoangaipa hague, cheárinte ho’a jevyva’erã che rembiapo vaikue.

5Peẽ chembojovakese ramo, pehechauka porãke moõpa che añemoangaipa.

6Peikuaa Ñanderuete chereity hague, ha Ha’e chejopy hague iñuhãme.

7Pema’ẽ porãke, che asapukái ramojepe ahasa asýgui, avave nacherendumo’ãi ha asapukái ramojepe chepytyvõ hag̃ua ndaiporimo’ãi chepytyvõséva.

8Ñanderuete omboty che rape, ha ndaikatúi ahasa, ha che rape aguataha rupi Ha’e omoypytũmba.

9Che rerakuã porã oipe’a chehegui, ha che akã jeguaka Ha’e oity.

10Ha’e chereity chehundi hag̃ua, ha umi mba’e che aha’ãrõva Ha’e omondoro ku ojehapo’o háicha peteĩ yvyra.

11Cherehe omyendy ipochy rendy, hese ija’e’ỹva ramo Ha’e cheguereko.

12 Isoldádo atykuéra og̃uahẽma chemongora hag̃ua ha oñemohendáma che róga jerekuévo.

13Che ryke’ykuéra oñemomombyrypa chehegui, ha umi chekuaáva oñemboykepa chehegui ku chekuaa’ỹrõ guáicha.

14Che pehẽnguekuéra ojei che rendágui, ha umi chekuaáva hesaráima chehegui.

15Che rogaygua ha che rembiguaikuéra cheguereko tetã ambueygua ramo; okaraygua ramo aiko hesakuéra renondépe.

16Ahenói che rembiguáipe, ha’e katu nopenái cherehe, ajerure asy ramojepe ichupe ou hag̃ua.

17Che pytuhẽ ombojeguaru che rembirekópe, che pyti’u ombopy’a vai che ñemoñarenguérape.

18Mitãrusukuéra jepeve ojahéi cherehe ha apu’ãvo oñe’ẽ vai hikuái cherehe.

19Che rogayguakuéra otĩ chehegui, ha umi che ahayhúva jepeve opu’ã cherehe.

20Che ro’o ha che pire oja che kanguére ha che rãi pire añóntema hemby.

21Ha peẽ che irũ cherayhúva, pecheporiahuverekomína, pecheporiahuverekomína, Ñanderuete opokógui cherehe.

22Mba’érehepa peẽ chemuña Ñanderuetéicha, ha chekutumanterei pene ñe’ẽ pohýi rupi.

23Mba’eichatamora’e ko’ã che ñe’ẽ ojehai, tojehai peteĩ kuatiañe’ẽme,

24 hiérro ha plómope tojehai che ñe’ẽ, itaguasúre opyta hag̃ua opaite árape g̃uarã.

25Che katu aikuaa porã che Salvador (Pytyvõharaite) oikoveha ha ipahápe opu’ãtaha chepytyvõ jevy hag̃ua ko yvy apére,

26ha oñembyaipa rire che pire che ro’o reheve ahecháta che Járape.

27Che ahecháta ichupe che resatee rupi, jepémo che py’a manóma.

28Peje ramo: Mba’érehepa ñamuñáta ichupe, ipype ningo oĩ voi ijehasa asy rapo.

29Pekyhyjéna kyse pukúgui, peichagua jejavy ojerure voi jehavira, peikuaa hag̃ua oĩtaha gueteri peteĩ ombojovakéva hekoite pegua.