Josue 23 - Biblia en Guaraní - ?anderuete ?e’? Por? 2015

Josue oavisa

hetãyguakuérape

1Ko’ã mba’e rire ohasa ohóvo heta ára ha Ñanderuete omombytu’u Israelguakuérape ñorãirõgui ambue tetãnguéragui ndive, ha Josue itujáma ramo,

2ohenói mayma Israelguápe, opaite mburuvicha, mbojovakehára ha karai ancianokuérape, ha he’i ichupekuéra: Che chetujáma ha heta áñoma che aiko.

3Ha peẽ pehechapáma Ñanderuete ojapova’ekue ko’ã tetãnguéra rehe penderehehápe; Ñanderuete, pende Jára voi ningo oñorãirõ hague penderehehápe.

4Peikuaa porã che amboja’o hague peẽme po’a jeporavo rupi ko Canaan retãygua yvykue ha avei pe yvy hembýva gueteri ha oikohápe gueteri Canaanguakuéra, Jordan ysyry guive Yguasu Mediterráneo peve, kuarahyreike gotýo pende tríbu mba’etee ramo.

5Umívape Ñanderuete, pende Jára, omosẽmbáta gueteri pene renonderãgui; ha peẽ peguerekóta avei ijyvykuéra, pene mba’e ramo Ñanderuete, pende Jára, he’i haguéicha peẽme.

6Peñeha’ãmbaitéke pejapo hag̃ua opaite mba’e ojehaíva guive Moises kuatiañe’ẽme, aníke pepia ichugui akatúa gotýo ni asu gotýo ndojapoiva’erã oñanduha reíva ichupekuéra;

7ani hag̃ua pejehe’a ko’ã tetã hembýva rehe ha oikóva gueteri pende apytépe, ani pemomba’eguasu ijarakuérape, ani peikótei hembiguái ramo ha ani peñesũtei henondepekuéra.

8Ñanderuete, pende Jára rapykuéri uvei peikova’erã, pejapo háicha peikóvo (opaite umi mba’e he’íva guive peẽme).

9Ñanderuete omosẽ pene renondégui tetãnguéra tuicha ha imbaretevéva pendehegui, ha ko ára peve avave ndaikatúi gueteri ipu’aka penderehe.

10Peteĩ kuimba’e pende reheguáva omuña 1.000-pe, Ñanderuete, pende Jára oñorãirõgui penderehe, Ha’e he’i haguéicha peẽme.

11Peñangarekóke kyre’ỹpópe pene ánga rehe, pehayhu hag̃ua Ñanderuete, pende Járape.

12Ha pemboyke ramo Ñanderuetépe, ha pejehe’a ramo ko’ã tetãyguakuéra hembýva rehe pende apytépe, ha peju ramo pemenda hesekuéra, pejehe’ávo hesekuéra, ha ha’ekuéra penderehe,

13upérõ peikuaa porãke Ñanderuete nomosẽmo’ãvéima ko’ã tetã pene renonderãgui, oikóta katuete peẽme g̃uarã ñuhã, ñepysãngaha ramo ha tukumbo pende rete yke rehe ha ñuatĩ ramo pende resápe g̃uarã, pehundi peve ko yvy porã Ñanderuete, pende Jára, ome’ẽmava’ekue peẽme.

14Pema’ẽ porãke, che aiméma aike hag̃ua mayma kuimba’e rape rehe, pehechakuaákena pende py’aite guive ha pene ánga mbytete guive, ndaiporiha peteĩ ñe’ẽ ojehu’ỹva opaite mba’e porãva apytégui Ñanderuete, pende Jára, he’imava’ekue guive peẽme; opaite mba’e ojehupa uvei, ha ndaipóri peteĩnte jepe ndojehúiva.

15Ou haguéicha pendeári opaite mba’e iporãva Ñanderuete, pende Jára, he’iva’ekue guive, upéicha Ñanderuete ogueruva’erã avei pendeári opaite mba’e ivaíva napeneñe’ẽrendúi ramo, peñehundi peve ko yvy iporãvagui Ñanderuete, pende Jára, ome’ẽmava’ekue peẽme,

16pepoi ramo Ñanderuete, pende Jára, ñe’ẽme’ẽgui Ha’e ome’ẽva’ekue peẽme, pehóvo ha pemomba’eguasúvo ambue Járape ha peñesũ ramo henondepekuéra. Upéicha ramo Ñanderuete pochy hendýta penderehe, ha pya’ete peñehundipáta ko yvy porãme, Ha’e ome’ẽmava’ekue peẽme.