1Peju ha jaha jevy Ñanderuete rendápe. Ha’e ñandereityva’ekue, Ha’e katuete ñanemopu’ã jevýta avei, Ha’e ñanembohasy, Ha’e katuete ñanemonguera jevýta avei.
2Ohasa mboyve mokõi ára ñanemoingove jevýta ha pe ára mbohapyhápe ñanemopu’ãta ha jaikove jevýta henondépe.
3Ñañeha’ãmba jaikuaave hag̃ua Ñanderuetépe. Ha’e katuete oúta ñane rendápe ku kuarahy rendýicha osẽva opaite árape ha og̃uahẽta jaikohápe ku ama tenondegua ha ipaha peguáicha oúva ko yvy apére.
4Mba’épa ajapóta ndéve, nde Efrain. Mba’épa ajapóta ndéve, nde Juda. Pene mborayhu ningo ku arai pyhareve guáicha, ha ku ysapy ko’ẽju meguáicha, pya’e opa.
5Upévagui Che poinupãta che proféta rupi, ha che juru ñe’ẽ rupi pojuka ha che pohavira ojehecha porãta ku tesape osẽvaicha.
6Che ahayhuve jeporiahuvereko kuave’ẽmbýgui ha aipotave umi tetãyguakuéra chekuaa porã kuave’ẽmby ojehapypapyrévagui.
7Yvyariguakuéra omboyke hikuái che ñe’ẽme’ẽ ha oñemoĩ cherehe.
8Galaad, pe táva oñembyatyha umi oporojukáva, upépe tuguy pypore opárupi ojejohu.
9Ku mondahakuéra oha’ãrõ háicha oimeraẽ kuimba’épe (omonda hag̃ua), péicha pa’ikuéra oporojuka avei Siquem rapépe, mba’evaiete ojapo hag̃ua hikuái.
10Ahecha teko vai Israel retãme; Efrain omomba’eguasu umi jára gua’úpe ha Israel oñemongy’apaite.
11Ha Júdape g̃uarã oñembosako’íma iñembojovakerã, ha’ekuéra ndegueraháta avei ñeñapytĩháme ambue tetãme.
Who We AreWhat We EelieveWhat We Do
2025 by iamachristian.org,Inc All rights reserved.
