Salmokuéra 140 - Biblia en Guaraní - ?anderuete ?e’? Por? 2015

David oñembo’e Ñanderuetépe, Ha’e oipytyvõ hag̃ua ichupe umi hese ija’e’ỹvagui

1Chepytyvõmína Nde, che Ruete, upe tekove ñañágui; chemo’ãmína umi kuimba’e imbaretévagui.

2Ko’ẽ ko’ẽ rehe omoheñói hikuái mba’evai ipy’apypekuéra, ha ko’ẽ ko’ẽ rehe oñeha’ãmba hikuái ojapo vai hag̃ua cherehe.

3Mbóicha ombohakua hikuái ikũ, mbói pohã vaígui henyhẽ ijuru. Selah

4Chemo’ãmína Nde, ore Ruete, tekove ñaña pógui, chepytyvõmína pe kuimba’e heko vaívagui, umíva ombyaise voi che rekove.

5Umi heko ñañáva oñomi ired ha isã chéve g̃uarã, ired oipysóma hikuái chemoñuhã hag̃ua, che raperãme ojo’óma yvykua ha’a hag̃ua ipype. Selah

6Che ningo ha’e che Ruetépe: Nde, che Jaratee, che Ruete ehendumína che ñembo’e.

7Nde, ore Ruete, che pytyvõhára imbaretetéva, nde remo’ãma che akã pe ñorãirõguasuha árape.

8Anína ore Ruete rehejátei tekove ñaña ojapo cherehe ojaposéva, anína osẽtei ichupekuéra umi mba’e ipy’apýpe oñemíva, ani hag̃ua oñembotuicha hikuái. Selah

9Ha’ekuéra omopu’ã iñakã oñemoĩ hag̃ua cherehe, ha umi iñañáva jurúgui osẽva to’a jevy hi’arikuéra.

10To’a hikuái tatapỹime, tatápe to’a hikuái ha Ñanderuete toity ichupekuéra ysyry pypukúpe anive hag̃ua osẽ.

11Umi oñe’ẽvai reíva ndoiko porãiva’erã yvy apére, pe mba’evai tomuña pe tekove ñañávape oñehundiete peve.

12Che aikuaa porã Ñanderuete oipytyvõtaha umi imboriahúvape ha ombojovake porãtaha ichupekuéra.

13Añetehápe umi heko potĩvante omomba’eguasu nde réra, umi heko potĩvante oikohína nde ypýpe.