Romayguakuérape 12 - Biblia en Guaraní - ?anderuete ?e’? Por? 2015

Pe cúlto

añeteguáva

1Upévare che hermanokuéra, che ajerure asy peẽme, Ñanderuete poriahuvereko rehe, peme’ẽmba pende rekove Ñanderuetépe g̃uarã peteĩ kuave’ẽmby oikovévaicha, ipotĩva ha ombohorýva ichupe, kóva ningo pe cúlto añeteguáva ñame’ẽkuaáva Ñanderuetépe.

2Ha anítei pende reko ojogua kuimba’e térã kuña ko’ag̃agua rekópe, upéva rãngue peheja pende reko oñemoambue hag̃ua ohóvo (Pytu Porãmbáva rupi) pende py’apy rembipotapype, peikuaa hag̃ua Ñanderuete rembipota iporãha, hekópe ha oporombohorýva.

3Che poavisase pe poriahuvereko rupi Ñanderuete ome’ẽmava’ekue chéve, ani hag̃ua avave oñembotuicha hekope’ỹ, tohechakuaa uvei pe poriahuvereko me’ẽmby Ñanderuete ome’ẽ háicha oimeraẽvape ijerovia rupi.

4Peikuaa porã voi, ñande rete rehegua heta ramojepe, omba’apo porã hikuái oñondive oimera’ẽva katu hembiapoteépe.

5Péicha avei ñande jajeroviáva Hesu Crísto rehe, ojejapo ñandehegui Ñandejára Hesu Crísto rete ramo ha peteĩteĩme oñeme’ẽ hembiapotee Ñanderuete ome’ẽ haguéicha ichupe.

6Peteĩteĩme, jajeroviáva guive Hesu Crísto rehe, oñeme’ẽ ambue me’ẽmby, ha ko’ã poriahuvereko me’ẽmby ojuavy ojuehegui, upévare jaiporu hekópe umi me’ẽmby oñeme’ẽva ñandéve. Taha’e pe profecía, jaiporu katu hekópe, ñande jerovia Hesu Crísto rehe ojerure háicha;

7térã taha’e upe oservíva, toservi hekópe ñande jerovia Hesu Crísto rehe ojerure háicha; taha’e pe mbo’ehára rembiapo ombo’éva hapichakuérape, toporombo’e hekópe ñande jerovia Hesu Crísto rehe ojerure háicha,

8taha’e upe oporohekombo’éva, toporohekombo’e hekópe, taha’e pe oipytyvõva pirapire térã ambue mba’e rupi, toipytyvõ hekópe; taha’e karai anciáno (pe omoakãva pe iglésia rembiapo), tojapo kyre’ỹme; taha’e pe oporoporiahuverekóva, toiporiahuvereko py’aporãme.

9Pejohayhu tova mokõi’ỹre. Pejeguaru mba’evaígui, pejapo uvei mba’eporã ha heko peguáva.

10Pejohayhu oñohermánoicha, pejo’apo mba’e ramo, péva he’ise emomba’eve ne hermánope ndejehegui voi.

11Ani peneate’ỹ pene rembiapópe, peñemokyre’ỹ katu pende pytu porãme, ha pejapopa Hesu Crísto he’íva guive peẽme.

12Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.

13Peipytyvõ hermanokuérape hemikotevẽme, peporombohupa porãkena.

14Pehovasa umi ndaija’éiva penderehe, pehovasa ha ani pemaldeci.

15Pevy’a umi ovy’áva ndive, ha pejahe’o umi ojahe’óva ndive.

16Peiko peteĩ py’ápe oñondive; ani peñembotuicha, peñemomirĩ uvei; ani pejeguereko iñarandúva ramo.

17Ani pemyengovia avavépe ivaíva ivaívare, peñeha’ãmba katu pejapo hag̃ua mba’e iporãva opavavépe g̃uarã.

18Peñeha’ãmbáke, ijáva guive peẽme, peiko hag̃ua py’aguapýpe opavave ndive.

19Che hermanokuéra pohayhúva, ani peñevenga peẽ voi pende rapicha rehe, pemoĩmba katu Ñanderuete pópe. Ojehai voi Ñanderuete kuatiañe’ẽme: Che avengáta ha amyengoviáta opavave rembiapo vaikue, (Deuteronómio 32,35).

20Upe nderehe ija’e’ỹva iñembyahýi ramo, emongaru ichupe, ha ijy’uhéi ramo, emboy’u ichupe, péicha rejapórõ remboja tatapỹi hendýva nde rapicha akã ári (otĩ hag̃ua).

21Ani reheja pe ivaíva ipu’aka nderehe, upéva rãngue ndepu’aka pe ivaíva rehe mba’eporã rupi.