Números 21 - Biblia en Guaraní - ?anderuete ?e’? Por? 2015

Arad retã ruvicha ojeity Israel ári

1Peteĩ Canaan retã ruvicha oikóva Arádpe, opytáva Négevpe, ohendúvo Israel ouha Atarim rape rehe, osẽ ojeity hag̃ua Israel ári, ha oapresa ijapytégui ha ogueraha hikuái pokuapýpe.

2Upéramo Israelguakuéra ome’ẽ iñe’ẽ Ñanderuetépe ha he’i hikuái: Nde reme’ẽ ramo ko tetã kóva ore pópe, ore rohundíta itavakuéra.

3Ñanderuete ohendu Israelguakuéra ñe’ẽ ha ome’ẽ Canaanguakuérape ipópe ohundi hag̃ua ichupekuéra ha itavakuéra avei; ha ombohéra pe yvy péva Horma.

Mbói bronceguiguáva

4Upéi oipykúi hikuái Hor cérrogui, Yguasu Pytã (Mar Rójo) rape gotýo, ojere hag̃ua Edom retãgui; ha Israelguakuéra ou ipy’akangy tape rehe.

5Ha oñe’ẽvai hikuái Ñanderuete ha Moises rehe: Ma’erãiko oreguenohẽra’e Egíptogui romanomba hag̃ua ko desiértope, ko’ápe ndaipóri pan ni y, ha ore ánga ombyajúma ko mana vevuietégui.

6Ha Ñanderuete ombou mbói pochy Israelguakuéra apytépe oisu’u hag̃ua ichupekuéra; ha heta Israelgua omano.

7Upémaramo ou hikuái Moises rendápe ha he’i: Roñemoangaipa roñe’ẽ vaívo Ñanderuete ha nderehe; ejeruréna Ñanderuetépe toipe’a ore apytégui ko’ã mbói. Ha Moises oñembo’e hesekuéra.

8Ha Ñanderuete he’i Moiséspe: Ejapo peteĩ mbói ra’ãnga, ha ehupi peteĩ yvyra puku rehe; ha umi ojesu’uva’ekue oma’ẽ ramo hese, okueráta.

9Ha Moises ojapo peteĩ mbói bróncegui ha omoĩ peteĩ yvyra puku rehe; ha umi ojesu’uva’ekue oma’ẽvo pe mbói bronceguigua rehe okuera.

Israelguakuéra ojere Moab retãgui

10Upéi Israel ñemoñarenguéra oipykúi ha opyta Obótpe.

11Ha oipykúi hikuái Obótgui, ha opyta Ijeabarímpe, pe desiérto opyta Moab rovái, kuarahyresẽ gotýo.

12Oipykúi hikuái upégui, ha opyta Zered ysyry rembe’ýpe.

13Oipykúi hikuái upégui, ha opyta Arnon ysyry mboypýri, opytáva desiértope, ha osyrýva Amorgua retãgui; Arnon oĩhína Moab retã rembe’ýpe, Moab ha Amorgua pa’ũme.

14Upévagui Ñanderuete kuatiañe’ẽ oñe’ẽvo ñorãirõ rehe ha péicha he’i: Pe mba’e ojapova’ekue pe Yguasu Pytãme (Mar Rójope), ha Arnon yakãme;

15umi yakã osyrýva ho’a Árpe, opytáva Moab retã rembe’ýpe.

16Upégui ou Beer peve: Kóva hína pe ykua Ñanderuete he’iva’ekue Moiséspe: Embyaty tetãyguakuérape, ha ame’ẽta ichupekuéra y.

17Upéramo Israel sapukáipe péicha opurahéi: Tojupivéke nde y ykua pegua; ha pegueropurahéi ichupe;

18karaikuéra ojo’ova’ekue ykua, ha tetã sãmbyhyhára ombokua ijyvyra po’ípe. Pe desiértogui ou hikuái Matanápe.

19Ha Matanágui oho Nahaliélpe, ha Nahaliélgui oho Bamótpe;

20ha Bamótgui oho Moab ñúme opytáva cérro ha Pisga ru’ã pa’ũme, pe oma’ẽva desiérto rehe.

Israel ojapo sarambi Sehon rehe

21Upéramo Israel omondo ñe’ẽrerahahára Sehon, Amorguakuéra retã ruvichápe, ha he’i:

22Ahasase ne retã rupi; ndorohomo’ãi pende kokue ni pende parralty rupi; ndoroy’umo’ãi pende ykuágui, pe tetã ruvicha rape rupínte rohóta, rohasapa peve ne retã rupi.

23Sehon katu ndohejái Israelguakuérape ohasa hetã rupi, ombyatypa uvei isoldadokuérape pe desiértope ojeity hag̃ua Israel ári.

24Ha Israel ojapo sarambiguasu ichuguikuéra ikyse puku rãimbépe, ha oñemomba’epa ijyvykuéra rehe Arnon guive Jaboc peve, péva Amon retã rembe’y ha hetã rembe’y oñemombareteva’ekue.

25Ha Israel ombopoguypa ko’ã táva, ha Israelguakuéra oike Amorgua távape, Hesbónpe ha itava’ikuérape.

26Hesbónpe oiko Amorgua retã ruvicha Sehon, ha’e oipe’ava’ekue Moab retã ruvichágui ha omoĩ ipoguýpe Arnon meve.

27Upévagui umi ñe’ẽ yvoty apoha he’i: Peju Hesbónpe, pemopu’ã ha pemyatyrõ hag̃ua Sehon táva.

28Osẽma tata Hesbóngui, ha tatarendy Sehon távagui, ha ohundi Moab pegua távape, ha ohapy umi cérro oĩva Arnon rembe’ýpe.

29Angái, angái nde Moab, oñehundíma Quemos retã. Sehon, Amorgua retã ruvicha omuñamba nde ra’ykuéra ha nde rajykuérape, ha oguerahapa pokuahápe.

30Ha ohundiete hetãyguakuérape; Hesbon guive Dibon peve, ha Nofa guive Médeba peve.

Israel ombopoguy Og, Basan retã ruvichápe

31Pe ára guive Israel oiko avei Amorgua retãme.

32Moises omondo avei imañahára (ipyrague) oma’ẽ hag̃ua Jazer rehe ha ombopoguy rire, omosẽ avei Amorguakuérape, Jazer ha itava’ikuéragui.

33Israelgua ojevývo Amor retãgui oho Basan gotýo ha Og, Basan retã ruvicha, ha mayma isoldádo aty ou ojeity hag̃ua Israelguakuéra ári Edreípe.

34Upéramo Ñanderuete he’i Moiséspe: Ani rekyhyjétei ichuguikuéra, amoĩma ichupe, mayma hetãyguakuéra ha ijyvy reheve nde pópe ha rejapóta hese rejapo haguéicha Sehon, Amorgua retã ruvicha rehe, oikova’ekue Hesbónpe.

35Upérõ Israelguakuéra ojuka ichupe, ita’yrakuérape ha mayma hetãyguakuérape, oheja’ỹre peteĩnte jepe, ha oñemomba’e hikuái avei ijyvy rehe.