1Melquisedec, Salem (Jerusalen) ruvicha ha Ñanderuete yvatete pa’i, osẽ ohuvaitĩ hag̃ua Abrahámpe, ha’e ojevy ramoguare ombopoguy rire umi 4 mburuvichakuérape, (Génesis 14,1-20).
2Ha Abraham ome’ẽ Melquisedécpe pe diézmo opaite mba’e ogueruva’ekuégui. Melquisedec réra he’isékuri justícia ruvicha, ha upéi he’ise py’aguapy ruvicha.
3Ha’e ndaitúvai, ndaisýi, naiñemoñaréi, ndahi’ára ñepyrũi, ndahekove pahái, ojogua voi Ñanderuete Ra’ýpe, opytáva pa’iguasu ramo tapia g̃uarã.
4Pema’ẽna mba’éichapa mba’eguasuha ko Melquisedec, ichupe ningo Abraham, pe tuvaguasu ome’ẽva’ekue pe diézmo opaite mba’e ha’e ogueruva’ekuégui pe ñorãirõgui.
5Upévare Levi ñemoñarenguéra oikóva pa’i ramo ojerurekuaa ambue Israelguakuéragui, ipehẽnguekuéragui, pe diézmo he’i háicha pe tembiapoukapy (Números 18,20-30); umíva ou ramojepe avei Abrahámgui.
6Ha Melquisedec ndaha’éi ramojepe hesegua pa’i, Abraham ome’ẽ ichupe pe diézmo, ha Melquisedec ohovasa Abrahámpe, pe oguerekóva Ñanderuete promésa.
7Oje’e’ỹre mba’eve: Pe imichĩvéva ojehovasa pe tuichavéva po rupi.
8Ha ápe ningo oñeme’ẽ pe diézmo kuimba’e omanova’erãme, upépe katu oñeme’ẽ pe diézmo peteĩme ojekuaaukáva oikoveha gueteri.
9Levi ha iñemoñarenguéra oikova’ekuégui pa’i ramo oñeme’ẽva’erã ichupekuéra pe diézmo. Upéicha ikatu ja’e avei, Levi ome’ẽ hague pe diézmo Melquisedécpe Abraham rupi.
10Levi oikóma Abrahampype, ñemiháme ramojepe, Melquisedec osẽ ramoguare ohuvaitĩ hag̃ua Abrahámpe.
11Levi pa’i reko ha Moises rembiapoukapykuéra oporomboheko porãmba rire, oñeme’ẽmava’erãmo’ã Israelguakuérape Levi ha Aaron rupi Ñanderuete reko porã ha upéicharamo, natekotevẽveimava’erãmo’ã ambue pa’iguasu rehe Melquisedékicha, (Hesu Crísto voi).
12Oñemoambue ramo Levi pa’i reko, oñemoambueva’erã avei hembiapoukapykuéra.
13Hesu Crísto rehe ningo oje’e ko’ã mba’e, Ha’e katu ou Juda tríbugui, ha Juda tribugua araka’eve nomba’apóiva Ñanderuete rogaguasu rembiapópe.
14Ojekuaa porã ningo Hesu Crísto, Juda tríbu reheguaha, upévare Moises nde’íri mba’eve Juda tríbu rehe, oñe’ẽ ramoguare pa’i reko rehe.
15Ko’ã mba’e hesakãmbavétama, Ñanderuete oiporavo ramoguare ambue pa’i ojoguáva Melquisedécpe.
16Hesu Crísto nonacéi kuimba’e pu’aka rupi, Ha’e onace uvei tekove opa’ỹva pu’aka rupi (Pytu Porãmbáva rupi).
17Ojekuaauka hag̃ua Hesu ha’eha pa’i tapia g̃uarãva Melquisedec pa’i reko reheguáva.
18Upévare oñemboykéma pe tembiapoukapy tenondeguare ojeporuva’ekue, ikangy ha naiporãmbáigui.
19Pe tembiapoukapy Moises ombohasava’ekue Israelguakuérape ndoguerúi pe tekove oĩmbáva ha heko porãva, hendaguépe oñeme’ẽ uvei ñandéve peteĩ esperánza iporãitevéva, ha péva rupi ñañemoag̃uikuaa Ñanderuetégui.
20Ñanderuete omoañete pe Ha’e he’iva’ekue iñe’ẽme’ẽ rupi, umi ambue pa’ikuéra katu oiko pa’i ramo Ñanderuete ñe’ẽme’ẽ’ỹre.
21Ñanderuete ome’ẽ Hesu Crístope ipa’i reko iñe’ẽme’ẽ rupi (Salmokuéra 110,4) ha Ha’e noñembyasymo’ãi oiporavo haguére ichupe; upévare Ha’e he’i avei Hesu Crístope: Nde repytáta pa’i ramo tapia g̃uarãva.
22Péicha Hesu Crísto omoañete Ñanderuete ñe’ẽme’ẽ iporãvéva pe tenondeveguarégui.
23Ha umi ambue pa’ikuéra oñemboheta ohóvo, omanógui hikuái, ha ndopytái arégui hikuái.
24Hesu Crísto oikovégui tapia g̃uarã, noñeme’ẽmo’ãi ipa’i reko ambuépe.
25Upévare Ha’e ikatu osalva avei tapia g̃uarã umi og̃uahẽvape, Ha’érupi, Ñanderuete rendápe. Hesu Crísto oikovégui tapia g̃uarã, ha’e oñembo’e iñermanokuéra rehe Ñanderuetépe.
26Peichagua pa’iguasu ñaikotevẽ. Hesu Crísto ningo, heko porã, ipy’aporã, oñemomombyry angaipavóra rembiapo vaígui ha upévare oñemboyvateve ichupe yvagakuéragui.
27Hesu Crísto natekotevẽi, ku ambue pa’iguasukuéraicha, oikuave’ẽ raẽ hembiapo vai rehe, ha uperire ae hetãyguakuéra rehe; Hesu Crísto ome’ẽma peteĩ jevýnte hekove ha péva ovaléma tapia g̃uarã.
28Pe tembiapoukapy Moises ombohasava’ekue Israelguakuérape, omoĩ avei peteĩ kuimba’e kangýva pa’iguasu ramo, Ñanderuete iñe’ẽme’ẽ rupi katu, omoĩ Ita’ýra heko porã ha heko potĩva opyta hag̃ua pa’iguasu ramo tapia g̃uarã.
Who We AreWhat We EelieveWhat We Do
2025 by iamachristian.org,Inc All rights reserved.
