Números 17 - Biblia en Guaraní - ?anderuete ?e’? Por? 2015

1Upéi Ñanderuete oñe’ẽ Moiséspe, ha he’i ichupe:

2Eñe’ẽ Israel ñemoñarenguérape, ha opaite tríbu ruvicha togueru peteĩ yvyra po’i ha tohai ijyvyra po’i rehe herateéva.

3Levi yvyra po’i rehe katu rehaiva’erã Aaron réra, péicha oĩva’erã 12 yvyra po’i, opaite tríbugui peteĩ yvyra po’i.

4Ha umía nde remoĩva’erã pe óga jojohuhápe, pe karameg̃ua renondépe, Che ajehechauka haguépe ndéve.

5Ha pe yvyra po’i ipotýtava jára, Che aiporavómava Israelguakuéra apytégui, péicha Che amokirirĩta Israel ñemoñarenguéra ñe’ẽguyguy vaígui.

6Ha Moises oñe’ẽ Israel ñemoñarenguérape, ha opaite tríbu ruvicha ome’ẽ ichupe ijyvyra po’i; oñondivepa oĩ 12 yvyra po’i; ha Aaron yvyra po’i oĩkuri ijapytepekuéra.

7Ha Moises omoĩ umi yvyra po’i Ñanderuete renondépe pe óga jojohuhápe, pe karameg̃ua renondépe, oĩháme umi 10 tembiapoukapy.

8Ha ojehu ambue árape, Moises oike rire pe óga jojohuhápe, péina Aaron, Levi rogaygua rehegua yvyra po’i hoky pyahu jevy, ipoty ha hi’a.

9Upémaramo Moises oguenohẽmba umi yvyra po’ikuéra Ñanderuete renondégui mayma Israel ñemoñarenguérape ohecha hag̃ua, ha peteĩteĩva ogueraha jevy ijyvyra po’i.

10Ha Ñanderuete he’i Moiséspe: Emoĩ jevy Aaron yvyra po’i pe óga jojohuhápe ha eñongatu ijyvyra po’i pe karameg̃ua renondépe techaukaha ramo; péicha remokirirĩta umi iñe’ẽvaiva’ekuépe che renondépe, ani hag̃ua omanótei avei hikuái.

11Ha Moises ojapopa Ñanderuete he’i haguéicha ichupe.

12Upémaramo Israel ñemoñareguéra oñe’ẽ Moiséspe, ha he’i: Péina ápe ore romanombátama, ore roñehundipátama,

13oimeraẽva oñembojáva Ñanderuete róga jojohuha rehe omanóta, romanombátapa ore avei.