Salmokuéra 60 - Biblia en Guaraní - ?anderuete ?e’? Por? 2015

Ñembo’e ojeruréva ñepytyvõ, oĩgui hese ija’e’ỹva pópe - David purahéi arandu, ohekombo’éva umi mba’e ojehúva pe ñorãirõguasúpe Aram Naharaim oguerekova’ekue ha Aram, Sobaygua ndive, ha Joab ou jevývo ohundi ramoguare 12.000 Edomguápe pe juky pegua ñúme

1Nde, che Ruete, oremboykepáma, Nde, oremosarambíma, ndepochýgui orendive. Ndémante oremopu’ãkuaa jevy.

2Nde remboryrýi ha rejokapa ko yvy, emboty osoro haguépe, oku’epágui.

3Nde rembohasa asyete ne retãme, re’uka oréve víno orembotarováva.

4Nde katu reme’ẽ peteĩ poyvi veve opaite ojeroviáva ndéve g̃uarã opu’ã jevy hag̃ua. Selah

5Eguenohẽmína nde pu’aka rupi ko jejopy vaígui opaite nderayhúvape.

6Ñanderuete he’íra’e hekoha porãme: Vy’apópe ambopoguýta ha amboja’óta Siquémpe ha Sucot ñúme aha’ãta.

7Galaad ha Manases che mba’e voi, Efrain che akã mo’ãha ha Juda katu che retã sãmbyhyhára yvyra po’i.

8Moab katu che mba’yru ajepyhéi hag̃ua, Edom ári aitýta che sapatu, ha Filisteayguakuéra rehe chepy’arorýta.

9Mávapa chegueraháta pe táva oñemombaretévape, ha mávapa chegueraháta Edómpe.

10Nandéi nga’u piko, ore Ruete, oremboykemava’ekue; ha Nde, ore Ruete, neresẽvéima, ore soldádo atykuéra ndive.

11Nde orepe’amína orerayhu’ỹva poguýgui, yvyariguakuéra ñepytyvõ ningo opa rei katuete.

12Ñanderuete ndive jajapokuaa mba’eguasuete, ha Ha’e opyrũta umi ñanderehe ija’e’ỹva rehe.