Apostolkuéra 19 - Biblia en Guaraní - ?anderuete ?e’? Por? 2015

Páblo og̃uahẽ Efésope

1Apólos oĩ aja Coríntope, Páblo ohasa pe cerrorusu pa’ũ rupi og̃uahẽ meve Efésope ha upépe ojohu umi Apólos ombo’eva’ekuépe,

2ha oporandu ichupekuéra: Peẽ pehupitýmapa pe Pytu Porãmbáva pejeroviávo Hesu Crísto rehe. Ha’ekuéra ombohovái: Ore norohendúi gueteri oĩha Pytu Porãmbáva.

3Upémaramo Páblo oporandu: Mba’eichagua bautísmo piko oñeme’ẽra’e peẽme. Ha’ekuéra he’i: Pe bautísmo Juan Bautísta ome’ẽva’ekue.

4Páblo ombohovái ha he’i: Juan obautiza tetãyguakuérape omoambue hag̃ua ipensamientokuéra ha he’iva’ekue opavavépe ojerovia hag̃ua upe ha’érire oútava rehe upéva ningo Hesu, pe Crísto.

5Ohendúvo péva, ha’ekuéra ojebautizauka Ñandejára Hesu Crísto rérape.

6Ha Páblo omoĩvo ipo hi’arikuéra, pe Pytu Porãmbáva oguejy hi’arikuéra, ha oñe’ẽ joa ñe’ẽ ambuépe ha oprofetiza.

7Umi ojebautizaukava’ekue oĩ 12 kuimba’e rupi.

8Páblo oho mbohapy sábado Ñanderuete rógape oĩva Efésope, ha oñe’ẽ kyhyje’ỹre Ñanderuete retãguasu rehe.

9Umi ojapysakáva apytégui oĩ umi oñembopy’a hatãva, ha oñemoĩva Páblo rehe opaite oñembyatýva rovake, oñembohorývo ko tape pyahu kóva rehe. Upévare ha’e ojei ijapyteguikuéra ha ogueraha avei hendive umi oñepyrũmava ojerovia Hesu Crísto rehe, ha oñembyaty meme hikuái Tiráno escuélape, upépe Páblo ikatu ombo’e porãve ichupekuéra.

10Mokõi áño pukukue Páblo omyasãi upépe Hesu Crísto evangélio ha hetápe ombo’e, upéicha opaite oikóva guive Ásia retãme, Judaygua ha Greciayguakuéra, ohendu Hesu Crísto evangélio Páblo juru rupi.

11Ha Ñanderuete ojapo milágro tuichaitéva Páblo rupi.

12Páblo pañuélo ha ijao hy’ái reheve ojeguerahávo hasývape okuerapaite hikuái, ha mba’epochy osẽ avei ichuguikuéra.

13Oĩ Judayguakuéra apytégui omosẽséva mba’epochykuérape hetãyguakuéragui oiporúvo ko’ã ñe’ẽ: Hesu rérape, pe Páblo omoherakuãva, pesẽ ichugui.

14Ha ijapytépe oĩ 7 Escéva ra’y, ojapóva ko’ã mba’e; Escéva peteĩ pa’iguasu ñemoñare.

15Ha oñe’ẽ jave ko’ã ñe’ẽ pe mba’epochy ombohovái: Che aikuaa Hesúpe, ha aikuaa avei Páblope, ha máva piko peẽ.

16Ha pe kuimba’e, ipype oĩva pe mba’epochy, ojeity hi’arikuéra ha ipu’akapa hesekuéra, oinupã vai rire ichupekuéra huguypa peve okañy hikuái opivopa upe ógagui.

17Ha ko mba’e oikóva guive Efésope opaite Judaygua ha Greciaygua oikuaa, ha kyhyje ndetuicháva ho’a hi’arikuéra, ha omomba’eguasu Hesu Crísto réra.

18Heta ojeroviáva ou omombe’u hembiapo vai (iñangaipakuéra).

19Heta paje apohára ogueru ipaje kuatiañe’ẽ ha ohapy opavave renondépe. Hepykue ohupity 50.000 ára rembiapo repy rupi.

20Upéicha Ñanderuete ñe’ẽ oñemyasãive ohóvo ha ohechauka ipu’aka.

21Ha oikopa rire ko’ã mba’e pe Pytu Porãmbáva ojechauka Páblope ohasa rire Macedónia ha Acáiape, oho hag̃ua Jerusalénpe ha uperire ohova’erãha Rómape.

22Upévare Páblo omondo Macedóniape mokõi ipytyvõhára, Timotéo ha Erástope, ha’e opytave aja Ásiape.

Apañuãi Efésope

23Umiha árape oiko peteĩ apañuãi umi tetãygua apytépe Hesu Crísto evangélio rehe.

24Demétrio, peteĩ omba’apóvaóro morotĩre, ohupity iñirũnguéra ndive heta pirapire hembiapo rupi, ojapógui hikuái ijára Diána tupão michĩva óro morotĩgui.

25Upévare Demétrio ombyaty opaite ojapóvape ijára Diána tupão michĩva ha he’i ichupekuéra: Kuimba’ekuéra, peẽ peikuaa porã ko tembiapo kóva rupi jahupity heta pirapire.

26Pehendu ha pehecha ko Páblo, Efésope ha haimete opaite Ásiape ha’e oporombo’e he’ívo: Ndaha’éi jára añeteguáva umi ojejapóva kuimba’e po rupi, ha omombia heta tetãyguakuérape ñande reko tujágui.

27Ko mba’evaiete ikatúne ohundi ñane rembiapo repyrã ha ndojejapovéi mba’eve ramo avei Diána tupão, oñemomba’eguasuvahína opaite Ásiape ha opaite yvy apére.

28Ohendupávo péva, ipochyete hikuái, ha osapukái joa: Ituicha ningo ñane Diána, Eféso pegua jára.

29Ha pe apañuãi oñemysãi ohóvo henyhẽ meve pe táva Eféso ha oike hikuái peteĩ cáncha ndetuichávape. Ohokuévo katu ojagarra gueteri mokõi Páblo irũme, Gáio ha Aristárcope, mokõi Macedoniaygua, ha ombotyryry ichupekuéra hendivekuéra.

30Ha Páblo oikese umi tetãygua oñembyatýva apytépe, umi hermanokuéra katu ojoko ichupe.

31Oĩ avei imburuvichakuéra apytégui he’iukáva Páblope ani hag̃ua ojehechauka pe atyguasúpe.

32Oĩ heta kuimba’e osapukáiva peteĩ mba’e, ambuekuéra katu ambue mba’e, ha hetave oĩ ndoikuaáiva mba’érehepa oñembyaty hikuái, péicha ituicha pe apañuãi.

33Upémaramo umi Judaygua he’i Alejándrope oñe’ẽ hag̃ua pe atyguasúpe. Upérõ Alejándro ohupi ipo omokirirĩ hag̃ua umi oñembyatývape,

34ha’ekuéra katu oikuaávo ha’e Judayguaha osapukái hatãve joaite mokõi hóra pukukue: Ituicha ningo ñande jára Diána Eféso pegua.

35Pe kuatia haihára Eféso pegua katu omokirirĩ hetãyguakuérape ha he’i ichupekuéra: Kuimba’e Eféso pegua: Opavave oikuaa porã voi Diána ra’ãnga ho’a hague yvágagui ha oñeñongatu itupãópe oñemomba’eguasu hag̃ua, Diána ha’égui Efesoyguakuéra jára.

36Ndaipóri ombotovéva ko mba’e kóva, upévare peñembopy’aguapyva’erã ha anítei pejapo mba’eve pejepy’amongeta porã raẽ’ỹre.

37Peẽ pegueru rei ko’ã mokõi Macedoniayguápe, ha’ekuéra nomondái ñande jára ra’ãnga itupãógui ni noñembohorýi ñande jára rehe.

38Upévare Demétrio ha iñirũnguéra omba’apóva óro morotĩre, oimérõ oguerekóva peteĩ mba’e omombe’u hag̃ua mbojovakehárape, ohova’erã mbojovakeha rógape ombohasapa hag̃ua hekoitépe.

39Ha oimérõ peipotave ambue mba’e, ñañombyaty hag̃uáicha hekópe ikatu ñañomongeta upévare.

40Ko apañuãi kóva rupi katu Róma retã ruvichaguasu ikatu oñemoĩ ñanderehe, ñande ñanẽmbyatypa joa haguére hekope’ỹ, ndajajeruréigui permíso. Ha mba’épa ñamombe’úta avei ichupekuéra, ha’ekuéra oporandu ramo ñandéve: Mba’érehepa ko apañuãi kóva oikóra’e.

41Ha he’ipávo ko’ã mba’e, pe atyguasuete oñemosarambipa.