Provérbios 20 - Biblia en Guaraní - ?anderuete ?e’? Por? 2015

1Pe víno rupi oñembohory hikuái, pe cáña rupi oĩta apañuãi ha umi oka’úva ichuguikuéra, noñemoarandumo’ãi.

2Ojekyhyje háicha leõ okororõvagui, péicha ojekyhyje pe tetã ruvichágui; ha upe ombopochýva ichupe ohundíta hekove.

3Pe kuimba’e herakuã porãva ojei ñorãirõgui, pe ivýrova katu oheka voi pe ñorãirõrã.

4Pe iñate’ỹva nombosako’íri ikokuerã hi’araitépe ha upévagui pe ñemono’õha ára ndojohumo’ãi mba’eve omono’õ hag̃ua ni ho’uva’erãva.

5Pe tekombo’e porã tapicha py’apýpe g̃uarã ojogua pe y hypyetévape, pe iñakã porãva katu oguenohẽntema oikotevẽ vove.

6Heta tapicha he’i ipy’a porãha, oñekotevẽ ramo peteĩ ipy’a porãva katu hasyete ojejohu hag̃ua peteĩme jepe.

7Pe heko potĩva ha pe heko porãva ombovy’áta iñemoñarenguérape.

8Pe tetã ruvicha oguapy jave ombojovake hag̃ua iguapyhaguasúpe, ojohúta ima’ẽme mba’evai apohárape.

9Mávapa he’ikuaa: Che amopotĩmbáma che py’apy, chepotĩmbáma che rembiapo vaígui.

10 Balánza ha pésa ijapúva, mokõivéva ombojeguaru Ñanderuetépe.

11Pe mitãrusu rembiapo rupi ojekuaáta heko ipotĩ ha naikarẽiha.

12Pe apysa ohendúva ha pe tesa ohecháva, mokõivéva ningo Ñanderuete rembiapokue.

13Aníke rekeiterei, ani hag̃ua reñemomboriahu; voi ejesape’a ha epu’ã, neryg̃uatã hag̃ua ne rembiapo rupi.

14Pe ojoguaséva peteĩ mba’e he’i: Hepy, hepyeterei ningo, ha ojeívo upégui, ovy’aite ojogua porã haguére imba’e.

15Oĩ heta óro ha ita vera hepýva, pe jeguaka hepyetéva katu pe ñe’ẽ omopu’ãva hapicha ñe’ã, pe omokyre’ỹva ichupe.

16Peteĩ kuimba’e oipytyvõva hapicha oikuaa’ỹvape, ha odevéva opárupi ho’a hapicha ñuhãme oipe’ase reígui ijao jepe ichugui.

17Heiterei ningo tapichápe g̃uarã pe tembi’u ohupitýva japu rupi, uperire katu ijuru henyhẽta ita ku’ígui.

18 Pensamiénto porã ojejohúnte ñemongeta porã rire, upévagui ani repensa porã’ỹre reñemoĩ nde rapicháre.

19Pe oikóva jurumy’ỹime oikuaauka ñemiha megua; aníke rejekupytýtei ijuru guasúva ndive.

20Upe omaldecíva itúva térã isýpe, imba’e rendy ogueva’erã pytũguýpe ha’e okyhyjevehápe.

21Umi mba’erepyeta ojehupitýva pya’e pya’épe, amo ipahápe ndojehovasaiva’erã.

22Ani erétei: Che añevengáta, emoĩ katu Ñanderuete pópe, Ha’e nepytyvõta.

23 Balánza ha pésa ijapúva ombojeguaru Ñanderuetépe.

24Pe tapicha ñemboguata Ñanderuete mba’e; mba’éicha piko ñande jaikuaáne ñane raperã.

25Ñuhã ningo tapichápe g̃uarã ha’e ome’ẽ ramo pya’eiterei iñe’ẽ, ha uperire ae ojepy’amongeta (opensa) umi mba’ e rehe.

26Pe tetã ruvicha iñarandúva omombo opaite iñañávape yvytúre, ha hi’arikuéra ombohasa icárro.

27Ñanderuete mba’e rendy hína ñande pytu porã, ha’e ningo upe oitypekáva pe py’apy ruguaitépe oĩva jepe.

28Py’aporã ha añetegua omo’ã tetã ruvichápe, ha umía rupi ha’e oñemoĩ’atã iguapyhaguasúpe.

29Karia’ykuéra mimbi ningo imbaretekue, ha umi itujáva mimbi hi’áva morotĩ (iñarandu).

30Pe ñembuepoti oporomonguera ñaña rekógui, ha pe jehavira omopotĩ tapicha py’apy.