Provérbios 1 - Biblia en Guaraní - ?anderuete ?e’? Por? 2015

Mba’erãpa oĩ tekombo’ekuéra

1Ko’ã ñe’ẽ arandu ohejava’ekue Salomon, Israel retã ruvicha, David ra’y,

2ojekuaa porã hag̃ua tekombo’e, arandu ha akãporã,

3ojehupityve hag̃ua tekombo’e porã, justícia, akãporã oporombojovake hag̃ua hekoitépe,

4omoarandu hag̃ua umi iñarandu’ỹvape, ha ome’ẽ hag̃ua mitãrusukuérape akãporã ha akãguapy.

5Iñarandúva tohendu ha tombohetave iñarandu, ha upe iñapytu’ũ porãva tohupityve tekombo’e porã,

6ojekuaa porã hag̃ua tekombo’e ñe’ẽ mbojoja, ñe’ẽ arandu ha ñe’ẽ ñemimby.

7Pe arandu ñepyrũmby ningo pe jekyhyje Ñanderuetégui; umi ivýrõva katu ndojapói mba’eve ramo pe arandu ha pe tekombo’e.

Pe iñarandúva oporohekombo’ese

8Ehendúke che ra’y nde ru rekombo’e ha aníke rejahéi nde sy nembo’évare;

9umíva ningo jeguaka iporãitéva ne akã rehe, ha ojogua nde ajurigua oroguiguávape.

10Che ra’y, umi hembiapo vaíva nembotavyse ramo, ani reñembopy’apeteĩ hendivekuéra.

11He’i ramo hikuái: Ejúna orendive, ñamoĩ ñuhã ñañohẽ hag̃ua tuguy, ñamoñuhã reimínte upe heko potĩvape;

12hekovére ñamokõta ichupekuéra ku aña retãicha, ha oñepehe’ã’ỹre, ku yvykua hugua’ỹvape ho’árõ guáicha;

13opaichagua imba’erepyeta jajohútava guive ñamyenyhẽta ñande róga mba’eita imondapyrégui.

14Eheka po’a orendive, oñondivepa jaguerekóta peteĩ vosa añónte (ñañongatu hag̃ua ñande pirapire).

15Che ra’y, aníke reiko hendivekuéra hapére. Emboyke katu nde py hapégui.

16Ipykuéra oñaniségui mba’evai gotýo, ha pya’e pya’e oho hikuái oñohẽ hag̃ua tuguy.

17Reiete ningo oñemyasãita ñuhã guyrakuéra opavave resa renondépe.

18Ha’ekuéra omoñuhã hekovekuérape, ha omoĩ iñuhã hi’angakuérape g̃uarãnte.

19Péicha ningo umi ombyatyseitereíva mba’e heta, ipahápe imba’eita rupi ohundi hekoveteéva.

20Pe arandu ojekuaauka sapukaipópe tapekueraha rupi, ha oñe’ẽ hatã táva pláza rupi,

21osapukái umi atyguasuha renda rupi ha tavakuéra rokẽ ojeikeha rupi he’i hag̃ua iñe’ẽ.

22Araka’e pevépa, itavýva ohayhúta ivýro reko; ha ivýrova rembiapo výro rei, ha umi heko ñembotavýva ojapo’íta ñe’ẽ arandúpe.

23Pejevýke, pehendu hag̃ua che ñe’ẽ pohýi; péina ápe Che añohẽta che Pytu Porãite pendeári, ha aikuaaukáta peẽme che ñe’ẽ arandu.

24Che ningo pohenói, ha nacherenduséi aipysova’ekue che po ha avave noipopyhyséi.

25Pemboyke uvei opaite che rekombo’e ha ndapejaposéi che ñe’ẽ.

26Upéicharõ che avei apukáta penderehe pene rembiasa asy jave ku yvytu ratãicha, ha añembohorýta oúvo pene rendápe ñemondýiguasu,

27ha og̃uahẽvo peẽme peñehundi hag̃uáicha pekyhyjeva’erã, pene rembiasa asyva’erã ku yvytu jepokávaicha, oúvo pendeári angekõi vai ha py’a tarova.

28Upéicha peime jave cherenói joáta, ha napombohovaimo’ãi; cherekáta pyhareve, ha ndapechejohumo’ãi.

29Pejapo’ígui arandúpe, ha ndapeiporavóigui Ñanderueteguigua kyhyje,

30ha ndapejapysakaséigui che ñe’ẽ rehe, pemboyke opaite che rekombo’e.

31Pende reko vai penemokõva’erã ha peñembojeguarúta pene rekombo’epyteégui.

32Umi tekove tavýpe ojukava’erã ijejavykue, ha oñehundiva’erã hikuái ivýrova reko rei rupi.

33Ha upe cherendúva katu, oikova’erã kyhyje’ỹme ha oikoveva’erã py’aguapýpe okyhyje’ỹre mba’evégui.