Cantar de los cantáres 6 - Biblia en Guaraní - ?anderuete ?e’? Por? 2015

Pe menarã ha tembirekorã juky reko

1Jerusalen rajykuéra oñe’ẽ: Moõpa ohóra’e ne mborayhu jára, nde kuñataĩ iporãvéva. Moõpa oñemboykéra’e ne mborayhu jára, roheka joáta nendive.

2Kuñataĩ oñe’ẽ: Che mborayhu jára ohókuri ijyvatýpe, umi mba’e ryakuã asy apytépe, oñangareko hag̃ua hymbakuéra rehe umi cérro rupi, ha omono’õ hag̃ua umi lírio.

3Che mborayhu jára che mba’e, ha che imba’e, ha’e oñangareko hymbakuérare lírio apytépe.

4Karia’y oñe’ẽ: Nde ningo neporã, nde che angirũ, Tírsaicha neporã, (1 Réyes 14,17); ha Jerusalénicha ndejuky, ha reporomopy’andýi ku ñorãirõ aty oñemohenda porãvaicha.

5Emboyke chehegui nde resakuéra, ipu’akapágui cherehe hikuái. Ne akã rague ojoguaite ku kavara atýpe oguejy joáva Galaad cérrogui.

6Ne rãinguéra ku ovecha atýicha ou joáva oñembojahu haguégui, ha imembykõi joaitéva, ha ijapytepekuéra ndaipóri imemby’ỹva.

7 Granáda yva ajúpe ojoguaite umi nde rova yke, nde rova ao mo’ãha guýpe.

8Oĩhína 60 tetã ruvicha rembireko, ha 80 hína ikuñakuéra, ha ikuñataĩkuéra ndojepapái.

9Peteĩmínte katu che pykasumi, chéve g̃uarã ningo ha’e pe iporãitereivéva, isy ohayhuve ichupe, ha’e pe ojeporavopyréva isy membykuéra apytépe. Umi kuñataĩ ohechávo ichupe, oguerohory, tetã ruvicha rembirekokuéra ha ikuñakuéra omosarambi herakuã porã.

10Máva piko ku ko’ẽjúicha iñapysẽva, jasýicha iporãitéva, kuarahýicha oñemyesakãva, ha oporomopy’andýiva ku ñorãirõhára atýicha.

11Kuñataĩ oñe’ẽ: Yvyratýpe aháma ñu rupigua yva rekávo, ha ahecha ipotypamaha umi parral ha umi granáda.

12Ha aikuaa porã’ỹre mba’éicha rupípa che ajejohu che mborayhu jára cárrope.

13Jerusalen rajykuéra oñe’ẽ oñondive: Eju jevýna, eju jevýna, nde Sulam pegua; eju jevýna, rohechave hag̃ua ne porãngue. Kuñataĩ oñe’ẽ: Mba’éiko pehechakuaa pe Sulamgua rehe. Ojeroky hag̃ua piko mokõi soldádo aty mbytépe.