Eclesiástes 3 - Biblia en Guaraní - ?anderuete ?e’? Por? 2015

Opaite mba’e hi’ára ha hi’óra

1Opaite mba’e hi’ára, ha opaite mba’e ojejapótava guive yvy apére hi’óra avei.

2 Ñanace hag̃ua hi’ára, ha ñamano hag̃ua hi’ára; ñañotỹ hag̃ua hi’ára, ha ñamono’õ hag̃ua hi’ára;

3Pe jejuka hi’ára, ha pe ñepohãno hi’ára; pe ñehundi hi’ára, ha ñemopu’ã jevy hi’ára.

4Pe tasẽ hi’ára, pe puka hi’ára, pe jahe’o hi’ára ha pe jeroky hi’ára.

5Ita oñemosarambi hag̃ua hi’ára, ha ita oñembyaty hag̃ua hi’ára; ñeporoñañu’ã hag̃ua hi’ára, ha ojejei hag̃ua hi’ára.

6Ojeheka hag̃ua hi’ára, oñehundi hag̃ua hi’ára avei; oñeñongatu hag̃ua hi’ára, ha oñemombo hag̃ua hi’ára avei.

7Oñemondoro hag̃ua hi’ára, oñembovyvy hag̃ua hi’ára jevy; oñekirirĩ hag̃ua hi’ára, ha oñeñe’ẽ hag̃ua hi’ára avei.

8Ojehayhu hag̃ua hi’ára, ha ojejahéi hag̃ua hi’ára avei; ñorãirõguasu hi’ára, ha py’aguapy hi’ára avei.

9Mba’épa oguenohẽ upe omba’apoitereíva hembiapokuégui.

10Che ahechákuri pe tembiapo Ñanderuete ome’ẽmava’ekue yvyariguakuérape ojapo hag̃ua.

11Ha’e ojapo porãmbaitékuri hi’árape; ha omoĩkuri apyre’ỹ reko yvyarigua py’apýpe; yvyariguakuéra ndoikuaái katu Ñanderuete ojapovahína iñepyrũ guive ipaha peve.

12Che katu aikuaa, pe iporãvéva yvyariguakuérape g̃uarã ovy’a hag̃ua ha ojapo hag̃ua mba’e porã oikove aja.

13Ha Ñanderuete me’ẽmby ningo yvyariguakuérape g̃uarã: Umi mba’e ñande ja’uva, ñande jay’úva ha jahecháva guive ñane rembiapo (rekove) rupi, Ha’e ome’ẽ ñandéve javy’a hag̃ua.

14Ahechakuaa opaite mba’e Ñanderuete ojapóva guive ndopaiva’erãha; ha umía ári noñembojoajuveimava’erã, ni ndojepe’aveimava’erã ichugui mba’eve; ha upéva Ñanderuete ojapo yvyariguakuérape okyhyje hag̃ua ichugui.

15Umi mba’e ohasamava’ekue oikopáma; ha umi mba’e oikótava, oikóma avei; ha umi mba’e ohasamava’ekue oiko jevyva’erã.

Heko pegua’ỹ ojehúva ojeikove aja

16Ha ahecha avei ko yvy apére: Pe ñembojovake hekoite pegua rãngue oĩ ñaña reko; ha pe tembiapoukapy rãngue oĩ tembiapoukapy’ỹre.

17Ha che ha’e che py’apýpe: Pe heko potĩva ha pe heko ñañávape Ñanderuete ombojovakéta; Ha’e omoĩgui peteĩ ára opaite mba’e ojaposévape g̃uarã ha opaite mba’e ojapóvape g̃uarã.

18Upéi ha’éma che py’apýpe: Péva ojehu Ñanderuete oipotágui ha yvyariguakuéra oikuaa hag̃ua ojoguaha mymbakuérape.

19Upe ojehúva kuimba’e ha kuñakuérape ojehu avei mymbakuérape, peteĩ mba’énte ojehuhína mokõivévape g̃uarã; peteĩchaiténte omano mokõivéva, ha mokõivéva ipytuhẽ pe yvytu; pe kuimba’e ha pe kuña ojogua mymbakuérape, kuimba’e térã kuña haguére, naiporãvéi mymbakuéragui; opaite mba’e ningo opa rei.

20Mokõivéva oho peteĩ hendapeténte; ojejapo yvy timbógui, ha mokõivévagui oiko jevyva’erã yvy timbo.

21Mávapa oikuaa kuimba’e ha kuña ánga ojupiha yvate, ha umi mymbakuéra ánga oguejyha yvy guýpe.

22Ha péicharupi ahecha ndaipóri mba’e iporãvéva tetãyguakuérape g̃uarã, ha’ekuéra ovy’a omba’apo aja, péva ningo hembiapo repy ha máva piko ogueraháne ichupe ohechauka hag̃ua umi mba’e ojehútava henonderãme.