Filemónpe 1 - Biblia en Guaraní - ?anderuete ?e’? Por? 2015

Páblo ohai Filemónpe

1Che, Páblo, aĩ cárcelpe Hesu Crísto rehehápe ha che hermáno Timotéo ndive, ore romomaiteiuka ndéve, nde, Filemon, ore rembiapo irũ rohayhuetéva,

2ha ore reindy Ápiape, ha ore ñorãirõ megua irũ Arquípope ha opaiteiglesiayguakuéra oñembyatývape nde rógape.

3Ñandejára Ñanderuete ha Ñandejára Hesu Crísto poriahuvereko ha ipy’aguapy toĩ penendive.

Filemon mborayhu ha jerovia

4Tapia che agradece che Ruetépe chemandu’ávo nderehe che ñembo’épe.

5Ahendúma nde rehayhu ha rejerovia porãha Hesu Crísto rehe, ha rehayhuha avei opaite ojeroviáva guivépe Hesu Crísto rehe.

6Pe jerovia, ñande jarekóva Hesu Crísto rehe, tokakuaave ndepype reikuaa porãve hag̃ua opaichagua mba’eporã ñande jarekóva Hesu Crísto rupi.

7Tuicha vy’a ha angapyhy oñeme’ẽ chéve ne mborayhu rupi, nde che hermáno ahayhúva remokyre’ỹ haguére ñane hermanokuérape.

Páblo ojerure Onésimo rehehápe

8Hesu Crísto rérape, ijárõ jepe chéve, che ha’e hag̃ua ndéve mba’épa nde rejapova’erã.

9Ndaiporuséi ko derécho arekóva, ajerurese uvei mborayhu rupi che ra’y (jerovia reheguáva) Onésimo rehe, amoñemoñava’ekue ko cárcelpe,

10che Páblo, chetujáma ha aĩ gueteri cárcelpe, ajerure hesehápe.

11Yma, Onésimo rembiapo nanembovy’aiete, ko’ág̃a katu hembiapo iporãite ndéve ha chéve g̃uarã.

12Péina amondo jevy ichupe ne rendápe, emog̃uahẽ porãke ichupe che ramoguáicha.

13Che aipotave ha’e opyta chendive, chepytyvõ hag̃ua ne rendaguépe, aĩgui cárcelpe Hesu Crísto rehehápe.

14Opáichavo ndajaposéi mba’eve nde reikuaa’ỹre, ani hag̃ua nde rejapo pe tembiapo porã che rojopy haguére, ndepy’aporã reheve uvei.

15Ikatu ningo kovarãnte ra’e ha’e okañyva’ekue sapy’ami ndehegui, oñeme’ẽ jevy hag̃ua ndéve tapia g̃uarã.

16Nanerembiguaivéima ramo, ñane hermáno jahayhúva ramo uvei. Che ningo ahayhuete ichupe, nde katuete rehayhuetevéta ichupe, ha’e ñande rapichaháre ha ko’ág̃a avei ñane hermanoháre Hesu Crísto rupi.

17Upéicharamo nde cheguerekómagui ne irũete ramo, emog̃uahẽ porãke ichupe chete ramoguáicha.

18Oime ramo ha’e ombyai peteĩ ne mba’éva térã odeve ramo ndéve, emoĩmba che cuéntape.

19Che, Páblo, amyengoviapáta ndéve ha’e odevéva guive ndéve, che potee rupi che ahai ko kuatiañe’ẽ nde rehecha hag̃ua hi’añeteha; ha’ekuaa ramojepe ndete voi redeve avei chéve, (che amyasãigui Hesu Crísto ñe’ẽ ne rendaguépe. 1 Timotéope 5,17-18).

20Néi, che hermáno, tavy’ami che ndérupi, Ñandejára Hesu Crísto rehehápe, embohory che py’apýpe Hesu Crísto rayhupápe.

21Arovia nde neñe’ẽrendutaha che ahaíva guive ndéve, aikuaa porã voi nde rejapovetaha che ajerureva’ekuégui.

22Embosako’imi avei che rendag̃ua; aha’ãrõ ningo ha’ekuéra opoitaha chehegui pene ñembo’e rupi, peteĩ jopói ramo peẽme g̃uarã.

Maitei paha

23Epáfras, che irũ cárcelpe, Hesu Crísto rehehápe, nemomaiteiuka, ha avei

24Márcos, Aristárco, Démas ha Lúcas che pytyvõharakuéra.

25Ñandejára Hesu Crísto poriahuvereko toĩ pende pytu porã ndive.