Deuteronómio 18 - Biblia en Guaraní - ?anderuete ?e’? Por? 2015

Leviguakuéra mba’erã

1Umi pa’i ha Leviguakuéra tríbu, ndoguerekoiva’erã ilóte Israelguakuéra apytépe, ambuekuéra oguereko háicha; umi kuave’ẽmby ha diézmo oñeme’ẽvagui Ñanderuetépe, upévagui okaruva’erã.

2Ndoguerekomo’ãi katu ilóte ipehẽnguekuéra apytépe; Ñanderuete voi hína imba’erã, Ha’e he’i haguéicha Leviguakuérape.

3Ko’ãva hína pa’ikuéra rembiapoukapy hetãyguakuéra orekova’erã hendive: Umi oikuave’ẽva peteĩ tóro térã ovecha ra’yrusu ome’ẽva’erã pa’ípe ipaletakue, hañykãngue ha ipy’akue ruguare;

4pene mba’e ra’ỹi ypykue porãvagui, pene víno ha pende acéitegui, ha pende ovecha rague ypykuégui peme’ẽva’erã ichupekuéra.

5Ñanderuete oiporavógui Leviguakuérape ambue tribukuéra apytégui, omba’apo hag̃ua hóga jojohuha rembiapópe opaite árape.

6Ha peteĩ Levigua osẽ ramo peteĩ Israel távagui, ha’e oiko haguépe, ha ou ramo ha’e voi oipotágui pe yvy pehẽngue Ñanderuete oiporavotahápe (Jerusalénpe),

7omba’apo hag̃ua ambue Leviguakuéra ndive Ñanderuete róga jojohuhápe,

8upérõ ambue Leviguakuéra omboja’óta ichupe hembi’urã ha oñeme’ẽta ichupe avei pe pirapire ituvatee ohejámava ichupe g̃uarã.

Ñemomarandu ani hag̃ua ojeiko umi Canaangua oiko háicha

9Ág̃a peike vove pe yvy Ñanderuete, pende Jára, ome’ẽtava peẽme, ndapejepokuaaiva’erã mba’evai umi ambue tetã ojapo háicha.

10Ani oĩtei pende apytépe oikuaave’ẽva ita’ýra térã itajýrape ohapy hag̃ua kuave’ẽmby rendápe, ha ani oĩtei imba’ekuaáva, térã ta’yvõhára, ni oĩtei oporombopajéva térã pajesérova.

11Ha anítei oĩ pende apytépe: Upe ovencéva, térã ojapóva encánto, térã paje, térã omba’eporandúva omanomava’ekuépe.

12Ñanderuete ipy’aro oimeraẽva ko’ã mba’e apohára ndive ha ã mba’evaiete rehe Ñanderuete, Ñandejára, omosẽ ko’ã tetãnguérape pene renondégui.

13Pende reko iporãiteva’erã Ñanderuete, Ñandejára ndive.

14Ko’ã tetãyguakuéra, peẽ pembopoguýtava, oiko ta’yvõhára ha imba’ekuaáva rapykuéri; Ñanderuete, Ñandejára katu ndoipotái peẽ peiko avei umía rapykuéri.

Ñanderuete ome’ẽ iñe’ẽ omoĩtaha peteĩ proféta

Moiseichagua

15Israelguakuéra apytégui Ñanderuete omopu’ãta peẽme g̃uarã peteĩ proféta cheichagua, ha pehenduva’erã ichupe (Hesu Crísto).

16Peẽ voi pejerure Ñanderuetépe, pende Járape, Horeb cérrope pe atyguasuha árape, ha peje: Ore ndorohechasevéi ore Ruetépe, ni hataguasuete, ani hag̃ua romano.

17Ha Ñanderuete he’i chéve: He’i porã hikuái,

18upévare amopu’ãta ichupekuéra g̃uarã ipehẽnguekuéra apytégui peteĩ proféta ndeichagua; ha amoĩta che ñe’ẽ ijurúpe, ha Ha’e he’íta ichupekuéra opaite mba’e Che ha’éva guive ojejapo hag̃ua.

19Ha oimeraẽ ohenduse’ỹva che ñe’ẽ, Ha’e ombohasátava ichupekuéra, Che voi ahaviráta ichupe.

20Oimeraẽ proféta he’íva ijehe oñe’ẽha che rérape, ha ndaupeichaiha, térã oñe’ẽ ramo ambue jára rérape, upe proféta gua’u katuete omanova’erã.

21Ha peje ramo pende py’apýpe: Mba’éichapa roikuaáta umi rohendúva ndaha’eiha Ñanderuete ñe’ẽ.

22Pe proféta oñe’ẽ ramo Ñanderuete rérape, ha ndoikói ramo pe he’iva’ekue, pe ñe’ẽ péva Ñanderuete nde’iriva’ekue; upe proféta oñe’ẽ oñembotuichase reíguinte; ani pekyhyjétei ichugui.