1 Corintoyguakuérape 12 - Biblia en Guaraní - ?anderuete ?e’? Por? 2015

Umi Pytu Porãmbáva me’ẽmbynguéra

1Che hermanokuéra, che aipota peẽ peikuaa avei umi Pytu Porãmbáva me’ẽmby.

2Peẽ ningo penemandu’a porã gueteri pejerovia mboyve Hesu Crístore, peẽ peñembotyryryukava’ekue umi jára gua’u ra’ãnga rapykuéri.

3Upévare che aikuaauka peẽme, avave oñe’ẽva guive Ñanderuete Pytu Porãite rupi, ani hag̃ua he’i Hesu Crístore: Maldíto (tojeharu), ha avave ndaikatúi he’i Hesu Crísto che Jaraha, ndaha’éi ramo Pytu Porãmbáva rupímante.

4Oĩ ningo opaichagua me’ẽmby, pe Pytu Porãmbáva katu peteĩ añónte.

5Oĩ opaichagua tembiapo, Ijára, Hesu Crísto peteĩ añónte.

6Oĩ opaichagua pu’aka, oĩ katu peteĩ Ñanderuete, ojapóva opaite mba’e.

7Peteĩteĩme oñeme’ẽ Pytu Porãmbáva me’ẽmby ojeporu hag̃ua hapichakuéra provéchope g̃uarã.

8Peteĩme oñeme’ẽ Pytu Porãmbáva rupi ñe’ẽ arandu; ambuépe katu oñeme’ẽ ñe’ẽ kuaapy, pe Pytu Porãmbáva rupi.

9Ambuépe jerovia pe Pytu Porãmbáva año rupi; ambuépe Pytu Porãmbáva me’ẽmby oporomonguera hag̃ua, pe Pytu Porãmbáva rupi.

10Ambuépe oñeme’ẽ pu’aka ojapo hag̃ua techapyrã (milágro), ambuépe oprofetiza hag̃ua, ambuépe ombojuavykuaa hag̃ua (odiferencia) pytu vaikuéra ha pytu porãnguéra apytépe, ambuépe oñe’ẽ hag̃ua peteĩ ñe’ẽ (idióma) ha’e oikuaa’ỹvape, ambuépe oñeme’ẽ pe me’ẽmby oikuaauka hag̃ua mba’épa he’ise pe ñe’ẽ hapicha oikuaa’ỹva.

11Opaite ko’ã mba’e pe Pytu Porãmbáva añónte ojapo, ha Ha’e ome’ẽ peteĩteĩme (ime’ẽmby) Ha’e voi oipota háicha.

12Ñande rete peteĩnte, heta hesegua oĩ ramo jepe ipype, péicha avei Hesu Crísto iglesiayguakuéra apytépe.

13Pe Pytu Porãmbáva añómente ningo ñande jajebautizava’ekue jaiko hag̃ua peteĩ tete ramo, taha’e Judaygua, térã tetã ambueygua; taha’e tembiguái térã patron; opavave ñande jajebautizava’ekue pe Pytu Porãmbáva rupínte.

14Ñande rete ndoikói peteĩ hesegua rupínte, heta hesegua rupi uvei.

15Ñande py he’i ramo: Che ndaha’éigui peteĩ po, che ndaha’éi tete rehegua, upévarehe piko ndaha’emo’ãi tete rehegua.

16Ha ñane nambi he’írõ: Ndaha’éigui tesa, che ndaha’éi tete rehegua, upévarehe piko ndaha’emo’ãi tete rehegua.

17Ñande rete tesapa rire piko, mba’éichapa ñahenduva’erãmo’ã; ha ñande rete apysapa rire, mba’éichapa ñahetũva’erãmo’ã.

18Ñanderuete omoĩma peteĩteĩ ñande rete rehegua hendaitépe, Ha’e oipota haguéicha.

19Ñande rete ojejapopa rire peteĩ tete reheguánte rupi ndoikoiva’erãmo’ã ñande rete.

20Ko’ág̃a jareko heta ñande rete reheguáva, ñande rete katu peteĩnte.

21Ñande resa ndaikatúi he’i ñande pópe: Che naikotevẽi nderehe; péicha avei ñane akã ndaikatúi he’i ñande pýpe: Che naikotevẽi nderehe.

22Ñande rete rehegua ikangyvéva, ñaikotevẽve katu hese.

23Ñande rete rehegua hi’ã ñandéve ñamomba’e’ỹva’erãva, umíva katu ñamonde oñemomba’eve hag̃ua, ha umi ñande rete rehegua ñarotĩvéva rehe ñambojeguave (ñambotuichave).

24Ñande rete rehegua mba’eguasuvéva natekotevẽi oñembotuicha. Ñanderuete arandu ojapo porãmba ñande rete; ñande rete rehegua ñande ñamomba’e’ỹvévape oñemomba’eguasuve,

25ani hag̃ua oiko ñorãirõ ñande rete rehegua apytépe; ñande rete rehegua oñopytyvõ joava’erã.

26Ha peteĩ ñande rete rehegua hasy ramo, opaite ambue ñande rete rehegua oñeñandu vai; ha peteĩ ñande rete rehegua oñemomba’eguasu ramo, opaite ambue tete rehegua ovy’a hendive.

27Peẽ ningo Hesu Crísto rete (iglésia) ha upévare peteĩteĩ Hesu Crísto rete reheguáva (miémbro).

28Ñanderuete voi omoĩma ijiglésiape: Tenonderãme apostolkuéra (temimondo), mokõiháme katu proféta, mbohapyhápe mbo’ehára, ambuépe ome’ẽ pu’aka ojapo hag̃ua milágro, upéi me’ẽmby oporomongueráva, me’ẽmby oporopytyvõva (diácono), me’ẽmby oporomoakãva (oporosambyhykuaáva), me’ẽmby oñe’ẽva hetaichagua ñe’ẽ ojekuaa’ỹva.

29Opavave piko apóstol. Opavave piko proféta. Opavave piko mbo’ehára. Opavavépe piko oñeme’ẽ pu’aka.

30Opavave piko oporomonguerakuaa, opavave piko oñe’ẽkuaa peteĩ ñe’ẽ (idióma) ojekuaa’ỹva. Opavave piko ikatu omyesakã mba’épa he’ise upe oñe’ẽva pe ñe’ẽ ojekuaa’ỹvape.

31Peñeha’ã pehupity hag̃ua umi Pytu Porãmbáva rehegua me’ẽmby ituichavéva, ha ko’ág̃a ahechaukase peẽme peteĩ tape iporãvéva gueteri.