1 Réyes 5 - Biblia en Guaraní - ?anderuete ?e’? Por? 2015

Salomón oñembopy’apeteĩ Hiram ndive

1Hiram, Tíro retã ruvicha, ohendúvo ojeporavo hague Salomónpe, Israel retã ruvicha ramo, itúva rendaguépe, ombou avei hembiguaikuérape hendápe, Hiram ohayhuva’ekuégui itúva Davídpe.

2Upéramo Salomón he’iuka Hirámpe:

3Nde reikuaa voi che ru David ndaikatúi hague omopu’ã Ijára rogarã, oikógui ñorãirõme opaite tetã ijerekuévo oĩva guive ndive, Ñanderuete omoĩ meve ipoguýpe umi hese ija’e’ỹvape.

4Ko’ág̃a ore Ruete, ore Jára, ome’ẽ chéve py’aguapy opa rupiete; ndaiporivéima cherehe ija’e’ỹva, ojekyhyje hag̃ua mba’evaígui.

5Che ha’éma amopu’ãseha peteĩ ogaguasu ore Ruete rérape g̃uarã, Ha’e oñe’ẽ haguéicha che ru Davídpe, he’ívo: Nde ra’y, Che amoĩta nde guapyhápe, omopu’ãta peteĩ óga che rérape g̃uarã.

6Ko’ág̃ana eikytĩuka chéve ygary (cédro) Líbanogui; ha che rembiguaikuéra oĩta ne rembiguaikuéra ndive, ha che apagáta ne rembiguaikuéra rembiapo rehe nde ere haichaite, nde reikuaa voi ore apytépe ndaiporiha avave omba’apo porãkuaáva yvyra rehe umi Sidon peguáicha.

7Hiram ohendúvo Salomón he’iukáva ovy’aiterei ha he’i: Taherakuãguasu ko árape Jahve, ome’ẽva’ekue peteĩ ta’ýra iñaranduetéva Davídpe ko tetã tuichaitévape g̃uarã.

8Ha Hiram he’iuka Salomónpe: Ahendu umi mba’e ereukava’ekue guive chéve, che ajapoukáta mayma nde reipotáva guive pe ygary ha cipres guiguáva (yvyra).

9Che rembiguaikuéra ogueraháta Líbano guive yguasu peve, ha upéi ajoapyukáta umi yvyra arahauka hag̃ua yguasu rupi nde reipotaha peve, ha upépe ojejoráta nde rejapyhy hag̃ua. Nde rejapóta katu avei pe che aipotáva: Emongaru porã che retãyguakuérape.

10Ha Hiram ome’ẽ Salomónpe ygary ha cipres oipota háicha.

11Ha Salomón ome’ẽ Hirámpe 4.400.000 lítro trígo hetãyguakuérape g̃uarã ha 4.400 lítro acéite iporãva; ko’ã mba’e Salomón ome’ẽ Hirámpe g̃uarã opaite áñope.

12Ñanderuete ome’ẽ Salomónpe arandu he’i haguéicha ichupe, ha oĩ jekupyty porã Hiram ha Salomón apytépe, oñembopy’apeteĩ porãgui oñondive.

13Ha tetã ruvicha Salomón omoĩ ko tembiapo kóva ári g̃uarã, 30.000 kuimba’e Israel retãgui, oiko hag̃ua hetã rembiguái ramo.

14Umíva apytégui omondónte Líbanope 10.000-pe, opyta hag̃ua peteĩ jasy javeve, ha mokõi jasy javeve ojevy hag̃ua hógape. Ha Adoniram oiko ko tembiapo ñangarekohára ruvicha ramo.

15Salomón oguereko avei 70.000 kuimba’e mba’e rerojaha, ha 80.000 ita kytĩha cérrope.

16Ojepapa’ỹ rehe umi 3.300 mburuvicha, Salomón omoakãukáva ko tembiapo kóvape, ha ipoguýpe hetãyguakuéra omba’apóva pe ogarã rehe.

17Ha Salomón ogueruka ita tuicháva, ita hepýva pe óga ñepyrũrãme g̃uarã, ha ita oñemba’apopyrémava.

18Upéicha Salomon ha Hiram oga’apoharakuéra ha umi Gebalgua kuimba’e oikytĩ ha omohenda yvyra ha itakuéra Ñanderuete rogaguasúpe g̃uarã.