2 Crónicas 11 - Biblia en Guaraní - ?anderuete ?e’? Por? 2015

1Roboam og̃uahẽvo Jerusalénpe, ombyaty Judaygua ha Benjaminguágui 180.000 kuimba’e oñorãirõkuaáva ojeity hag̃ua Israel ári, opaite Israel tríbu opyta jevy hag̃ua Roboam poguýpe.

2Ha Ñanderuete oñe’ẽ Semaías, pe profétape, ha he’i:

3Eñe’ẽ Roboam, Salomon ra’y, Juda retã ruvichápe ha opaite Judaygua ha Benjaminguakuérape, ha ere ichupekuéra:

4Péicha he’iuka Ñanderuete: Ani pejupítei ha ani peñorãirõ pene pehẽnguekuéra ndive; tapeho jevy peteĩteĩva pende rógape, Che voi ajapógui ko’ã mba’e. Ha ha’ekuéra ohendu Ñanderuete ñe’ẽ ha ojevypa, ha nondyrýi Jeroboam rehe.

Roboam akã rapu’ã

5Ha Roboam oiko Jerusalénpe, ha omombarete Juda tavakuérape tápia yvate reheve.

6Ha’e omombarete Belen, Etam, Técoa,

7Betsur, Soco, Adulam,

8Gat, Maresa, Zif,

9Adoraim, Laquis, Azeca,

10Zora, Ajalon ha Hebron, ko’ã táva opytapáva Juda ha Benjamin retãme ha’e omongoraukava’ekue.

11Upéicha ha’e omombareteve ko’ã táva ha omoĩ ipype mburuvichakuéra, tembi’u, víno ha acéite;

12ha ko’ã távape omoĩ soldádo aty hetemo’ãha ha yvyra puku akua (lánza) reheve. Upéicha añetehápe omombarete umíape; ha Juda ha Benjamin opyta porã ipoguýpe.

13Ha pa’ikuéra ha Leviguakuéra oĩva guive Israel retãme oupa hendápe.

14Umi Levigua ohejapa ijyvykuéra ha opaite mba’e oguerekóva guive, ha ou hikuái Juda yvýpe ha Jerusalénpe; Jeroboam ha ita’yrakuéra oipe’águi ichuguikuéra Ñanderuete rembiapo.

15Ha Jeroboam omoĩ hendaguépe ipa’ikuéra umi yvy yvateha rupi g̃uarã, umi añáme g̃uarã, umi tóro ra’y ra’ãngápe g̃uarã, ha’e voi ojapoukava’ekue.

16Ha umi Levigua rapykuéri ou Israel tríbugui opaite umi oñeha’ãmbáva ojapove hag̃ua Ñanderuete, Israel Jára rembipota; ha ou hikuái Jerusalénpe oikuave’ẽ hag̃ua Ñanderuete, ituvakuéra Járape g̃uarã ikuave’ẽmbynguéra.

17Péicha ha’ekuéra omombarete Juda retãme, ha omoĩ hatãve Roboam, Salomon ra’ýpe mbohapy áño pukukue; mbohapy áño oiko porãgui hikuái David ha Salomon rapére.

18Ha Roboam ohembirekova’ekue Mahalat, Jerimot rajy rehe, péva David rajy ha Abihail memby, péva Eliad, Isai ra’yre rajy.

19Ha’e imemby ichupe g̃uarã: Jeus, Semarías ha Zaham.

20Upéi omenda avei Maaca, Absalon rajýre, péva imemby ichupe g̃uarã: Abías, Atai, Ziza ha Selomit.

21Roboam ohayhuve katu Maaca, Absalon rajýpe, opaite ambue hembireko ha ikuñakuéragui; ha’e oiko 18 tembireko ha 60 kuña ndive, ha’ekuéra imemby ichupe g̃uarã: 28 ta’ýra ha 60 tajýra.

22Ha Roboam omoĩ Abías, Maaca membýpe, mburuvicha ramo ipehẽnguekuéra ári, ojaposégui ichugui tetã ruvicharã.

23Ha Roboam arandu ha katupyrypópe omohendapa ita’yrakuérape Juda ha Benjamin retãme, ha umi táva oñemombareteva’ekue tápia ijyvatéva rehe, ha ome’ẽ ichupekuéra tembi’ueta ha heta kuña.