1Aikuaa porã ningo, Nde che Ruete, rembojovakeha hekópe; upeichavéramo jepe aporanduse mba’érehepa iñañáva rape ipoty porã ha opaite hembiapo osẽ porã, ha mba’érehepa Nde neremyengoviái hembiapo vai.
2Nde voi reñotỹmava’ekue ichupekuéra, ha’ekuéra oñembohapo porãgui, okakuaa ha hi’apa; ijurúpente oñemoag̃ui, ipy’apýpe katu oñemomombyry ndehegui.
3Nde katu, che Ruete, chekuaa ha cherecha porã, Ndete voi reha’ã che py’apýpe oĩva; emboykéna ichupekuéra ku ovechakuéra oñemboyke háicha ijatýgui ojejuka hag̃ua, emboyke ichupekuéra hi’ára pahápe g̃uarã.
4Araka’e pevépa temitỹnguéra ipiru ha umi kapi’i ñumegua havirúta. Yvyarigua reko ñaña rupi opamive ohóvo mymba ha guyrakuéra; ha he’i hikuái cherehe: Che, (Jeremías), ndahechamo’ãiha henonderã.
Ñanderuete ombohovái Jeremíaspe5Reñani rire umi kuimba’e ndive ha’ekuéra nemokane’õ. Mba’e piko ojehúne ndéve reñani ramo kavaju árigua ndive. Reiko ramo yvy potĩháme nereñeñandúi, mba’épa oikóta ndehegui reiko ramo Jordan ka’aguy mbytépe.
6Nde ryke’ykuéra ha nde ru rogayguakuéra jepeve opu’ã nderehe, ha’ekuéra osapukái joa nde rapykuéri. Aníke regueroviátei ichupekuéra oñe’ẽ porã ramojepe nde rovake.
Ñanderuete oñembyasy upe mba’e ojehútavape hetãme7Apoíma che retãgui, aheja rei che mba’etee, ha che ánga ohayhúvape, amoĩma umi hesekuéra ija’e’ỹva pópe.
8Che retã oikókuri chéve g̃uarã ku leõ ka’aguy rupiguáicha; ha okororõgui cherehe Che ndahayhuvéima ichupe.
9Che retã ojogua peteĩ guyra hague jeguapávape, pe ñapykani ojeity hag̃ua hi’ári. Peẽ mymba saite ñarõ ñu rupigua, pejupa, peñembyaty ha pemokõ mokõ ichupekuéra.
10Heta tetã ruvicha ombyaipava’ekue che parralty (che retã), opyrũmba che kokue rehe ha ojapo hikuái che yvy porãitégui yvy perõ ha tapere.
11Opyta itapere ha ityre’ỹ ha pe yvy ojahe’o; opyta itaperepaite che yvy, ndaiporivéigui ijapytégui ojepy’amongeta porãva.
12Umi cérro perõ meve ou umi mba’e mbyaihára; Ñanderuete kyse puku ohundíta pe yvy peteĩ apýra guive ambue apýra peve; ha avave ndopytu’umo’ãvéi py’aguapýpe.
13Oñotỹ hikuái trígo, omono’õ katu ñuãtĩ; omba’apo pohýi omono’õ’ỹre mba’eve, upéicha ohasa asyete hikuái Ñanderuete pochy rupi.
14Péicha he’i pende Ruete umi tetã iñañáva rehe oikóva Israel jerekuévo ha opokóva yvýre, Ha’e ome’ẽmava’ekue Israélpe: Peikuaa porãke, Che aipe’a jevýta ichupekuéra Israel yvýgui, ha ijapytégui aipe’áta avei Judayguakuérape.
15Ha aipe’apa rire, ajere jevýta ha aiporiahuverekóta Israélpe, ha amondo jevýta peteĩteĩvape imba’etee ha ijyvyteépe.
16Ha peẽ, tetã ambueygua peguata porã ramo che retã Israel rapekuéra rehe, ha pejerovia ramo cherehe, pejerovia haguéicha Baal rehe, Che voi pomohenda porãta avei che retãyguakuéra apytépe.
17Ha upe tetã nohenduseietévape, aipe’áta hapoite guive ha ahundietéta, he’i pende Ruete.
Who We AreWhat We EelieveWhat We Do
2025 by iamachristian.org,Inc All rights reserved.
