Oséas 13 - Biblia en Guaraní - ?anderuete ?e’? Por? 2015

Ñanderuete ipochy Israel ndive oñemohembiapo vai haguére

1Efrain oñe’ẽ ramoguare ambue Israel retãyguakuéra oryrýi, ambuekuéra orespeta voi ichupe. Efrain oñepyrũvo omomba’eguasu ambue járape, oñepyrũma oñehundi ohóvo.

2Ha oñemohembiapo vaive ohóvo, ojapo ijára pyahu ra’ãngakuéra plátagui (óro morotĩgui), umi kuimba’e katupyrýva ojapokuaa háicha. Ha oipota hikuái oñekuave’ẽ umívape g̃uarã ha ohetũ joa hag̃ua ichupekuéra.

3Upévare Efrain ha’ete ku tatatĩna pyharevete peguáicha, ha ysapy ku ko’ẽ mboyve ohasávaicha; yvytu ratã oguerovevérõ guáicha trígo rogue piru ikogatýgui, ha tatatĩ osẽrõ guáicha tatakuágui.

4Che ningo nde Jára, Egípto retã guive, nde ndereikuaái ambue járape che ykére, ndaipóri ningo ambue salvador che ykére.

5Che añangareko nderehe reguata aja desiérto rupi, pe yvy hakuete rupi.

6Oñemohyg̃uatã porã rire hikuái katu oñembotuicha ipy’apýpe ha hesarái chehegui.

7Upévare leõicha Che aikóta ichupekuéra g̃uarã ha jaguarete hũváicha Che amangeáta hesekuéra ohohápe.

8Che ahug̃uaitĩta ichupekuéra ósoicha, oñemondapyréicha imembykuérape ha aipehe’ãmbáta ipy’a, ha leõicha amokõta ichupekuéra, ha umi hembýva gueteri ambue mymba hesaitéva rembi’urã.

9Ha nde Israel repoi haguére chehegui, ha nde ndereikuaasevéimagui mba’eve chehegui reñehundíta.

10Mamo piko oime ne retã ruvicha nepytyvõ hag̃ua nde tavakuéra ryepýpe ha mamo piko oime pene mburuvichakuéra ombojovake porã hag̃ua hetãyguakuéra oja’yverévape. Nde voi rejerure asyetereíma tetã ruvicha ha mburuvichakuéra rehe.

11Pochýpe ame’ẽva’ekue ndéve ne retã ruvicha, ha py’arópe aipe’a jevýta ichupe.

12Efrain mba’evai oñeñapytĩma vosápe ha hembiapo vai oñeñongatu porãma.

13Kuñakuéra imemby jave ohasa asy háicha péicha nde rehasa asýta avei nde ha’égui peteĩ mitã iñakã porã’ỹva ha oikuaa’ỹva araka’épa osẽta isy ryégui.

14Chépa asalváne ichupekuéra ani hag̃ua omano; aguenohẽnepa ñemano retãgui. Ñemano, moõpa oĩ ne mba’asy vai, ñemano moõpa oĩ ne akãnundu vaiete; Che katu ndaiporiahuverekosevéima.

15Ha Efrain hi’a porã ramojepe ku kapi’i y rembe’y peguáicha, katuete og̃uahẽta pe yvytu hakuetereíva ombohypa hag̃ua nde ykua ha nde yvukuéra. Ha hese ija’e’ỹva oguerahapáta ne mba’ejegua ha hepýva.

16Samária ohasa asýta opu’ã haguére pende Ruetére. Ita’yrakuéra oñepehe’ãmbáta kyse pukúpe, kuña hyeguasúva rye ojekutupáta avei.