Números 10 - Biblia en Guaraní - ?anderuete ?e’? Por? 2015

Turukuéra óro

morotĩguiguáva

1Ñanderuete oñe’ẽ Moiséspe ha he’i:

2Ejapouka mokõi turu (trompéta) óro morotĩguiguáva, martíllope oñe’ẽmbotava’erãva ha umía reiporúta rehenói hag̃ua ne retãyguakuérape atyguasúpe, ha remongu’e hag̃ua atyguasukuéra oipykúi jevy hag̃ua hapekuérare.

3Ha oñembopu ramo mokõivéva, opaite ne retãygua oñembyatyva’erã nde ypýpe, pe óga jojohuha rokẽme.

4Ha peteĩnte oñembopu ramo, ouva’erã nde ypýpe tríbu ruvichakuéra ha Israel 1000 aty arigua ruvichakuérante.

5Ha oñembopu hatã ha pya’e ramo oñemongu’e raẽva’erã umi aty oĩva kuarahyresẽ gotýo.

6Ha oñembopu hatã pya’eiteva’erã mokõiha oñemongu’e hag̃ua umi aty oĩva sur gotýo.

7Ha rehenoiuka ramo oñembyatypa hag̃ua atyguasúpe, oñembopuva’erã mbeguemive.

8Ha Aaron ra’ykuéra, umi pa’i, ombopuva’erã umi turu; ha péva opytáta tembiapoukapy ramo pene ñemoñarenguérape g̃uarã.

9Ha penderehe ija’e’ỹva ou ramo pene retãme oñemoĩ hag̃ua penderehe pembopuva’erã pya’e pya’e pende turu ha pende Ruete, pende Jára, imandu’áta penderehe, ha pendesalváta penderehe ija’e’ỹvagui.

10Pembopuva’erã turu pende vy’aha árape, pende arete aja, jasy pyahu árape, peikuave’ẽ ramo pene kuave’ẽmby ojehapypáva ha pene kuave’ẽmby py’aguapy reheguáva, ha oĩta penderehe mandu’a pende Jára renondépe, Che Jahve, pende Ruete, poipytyvõta.

Israelguakuéra osẽ Sinaígui

11Pe áño mokõiháme, jasy mokõiha, ára 20-hápe, pe arai opu’ã pe óga jojohuha árigui.

12Israel ñemoñarenguéra oipykúi Sinai desiértogui, aty atýpe osẽ hikuái, pende Ruete omohendauka haguéicha ichupekuéra; ha pe arai opyta jevy Paran desiértope.

13Ha’ekuéra oipykúi Ñanderuete he’i haguéicha ichupekuéra Moises rupi.

14Juda ejército oho tenonde ipoyvi rapykuéri, ha Naason, Aminadab ra’y, oiko huvicha ramo.

15Upéi osẽ Isacar division; Natanael, Suar ra’y, oiko huvicha ramo.

16Upéi osẽ Zabulon division; Eliab, Helon ra’y, oiko huvicha ramo.

17Uperire osẽ Leviguakuéra, Gerson ha Merari ñemoñarenguéra, oguerojávo pe óga jojohuha.

18Upéi oipykúi Ruben ejército ipoyvi rapykuéri; ha Elisur, Sedeur ra’y, oiko huvicha ramo.

19Upéi osẽ Simeon division, Selumiel, Zurisadai ra’y, oiko huvicha ramo.

20Hapykuéri osẽ Gad division, Eliasaf, Deuel ra’y, oiko huvicha ramo.

21Upéi oipykúi umi Levigua, Coat ñemoñarenguéra ogueraha hag̃ua umi óga jojohuha rembiporu; ha ha’ekuéra og̃uahẽ ramo g̃uarã, tojohu ambue Leviguakuéra omopu’ãmaha pe óga jojohuha henda pyahúpe.

22Upéi oipykúi Efrain ejército ipoyvi rapykuéri; ha Elisama, Amiud ra’y, oiko huvicha ramo.

23Efrain rapykuéri osẽ Manases division, Gamaliel, Pedasur ra’y, oiko huvicha ramo.

24Upéi osẽ Benjamin division, Abidan, Gideoni ra’y oiko huvicha ramo.

25Upéi oñepyrũ oipykúi Dan ejército ipoyvi rapykuéri. Ha Ahieser, Amisadai ra’y, opyta huvicha ramo.

26Dan rapykuéri osẽ Aser division, Pagiel, Ocran ra’y, oiko huvicha ramo.

27Upéi osẽ Neftali division; Ahira, Enan ra’y, oiko huvicha ramo.

28Péicha Israel ñemoñarenguéra oipykúi 4 ejército reheve.

29Upéramo Moises he’i hovaja Hobábpe, Raguel ra’y, peteĩ Madiangua: Ore ningo roipykúi rohóvo pe tetã Ñanderuete he’iva’ekuépe ome’ẽgui iñe’ẽ oréve. Ejúna orendive ha mba’e porã rojapóta nderehe, Ñanderuete ome’ẽma iñe’ẽ ojapotaha mba’eporã Israel rehe.

30Hobab katu ombohovái Moiséspe: Che ndahamo’ãi, aháta che retãme, che pehẽnguekuéra oĩháme.

31Ha Moises he’i ichupe: Ajerure ndéve ani orerejátei; nde ningo reikuaa porãve mamópa ikatu romopu’ã ore rekoha ko’ã desiérto ko’ãvape ha nde oremboguata porãta desiertokuéra rupi.

32Reju ramo orendive nde rehupitýta avei mba’eporã Ñanderuete ojapótava oréve g̃uarã.

33Upéicha Israelguakuéra oipykúi Ñanderuete cérrogui oguata hag̃ua mbohapy ára pukukue; ha Ñanderuete karameg̃ua oho henonderãme mbohapy ára pukukue, ohekávo ichupekuéra g̃uarã peteĩ tenda opytu’u hag̃ua.

34Ha arakuépe Ñanderuete arai oho hi’arikuéra, osẽ guive hekohágui.

35Pe karameg̃ua oñemongu’évo, Moises he’i: Epu’ãmína, ore Ruete, ha emosarambipa umi opu’ãva nderehe ha tokañy nde ypýgui umi nderehe ija’e’ỹva.

36Ha opytávo, he’i: Epytamína, Nde, ore Ruete, Israelguakuéra rekohápe.