2 Réyes 12 - Biblia en Guaraní - ?anderuete ?e’? Por? 2015

Joas oiko Judaygua retã ruvicha ramo

1Jehu, ombotývo 7 áño Israel retã ruvicha ramo, Joas oñepyrũ oisãmbyhy, ha 40 áño ha’e oisãmbyhy Jerusalénpe. Isy hérakuri Síbia, peteĩ Beersebaygua.

2Ha Joas ojapo iporãva Ñanderuete resa renondépe pa’i Joiada oikove ha ohekombo’e aja ichupe.

3Upeichavéramo jepe nombyaíri umi yvy yvate, tetãyguakuéra oikuave’ẽ ha ohapyhápe gueteri mba’e ryakuã porã.

4Ha Joas he’i pa’ikuérape: Pe pirapire oñeme’ẽva guive Ñanderuetépe imba’erã ramo, ha pe pirapire ojererúva jepi Ñanderuete rógape, pe pirapire tuvakuéra ome’ẽva ita’ýra tenondeguápe kuave’ẽmby ramo, ha pe pirapire tetãyguakuéra oguerúva Ñanderuete rógape ome’ẽséguinte,

5opaite ko’ã pirapire pa’ikuéra orecebiva’ekue ipokuéragui, omyatyrõuka hag̃ua Ñanderuete rogaguasu mamo oikotevẽháme.

6Pe tetã ruvicha Joas ombotývo 23 áño oisãmbyhy hague, pa’ikuéra ne’ĩra gueteri omyatyrõ Ñanderuete rogaguasu oñembyaihápe.

7Upémaramo tetã ruvicha Joas ohenói pa’iguasu Joiadápe ha ambue pa’ikuérape, ha he’i ichupekuéra: Mba’éguipa napemyatyrõi gueteri Ñanderuete rogaguasu oñembyaihápe. Ko’ág̃a anivéma peẽ pejapyhyve pene retãyguakuéra pirapire, peme’ẽmba uvei omyatyrõtavape Ñanderuete rogaguasu.

8Ha pa’ikuéra he’i joa: Ndorojapyhymo’ãvéi pirapire tetãyguakuéragui, ha ambuekuéra romyatyrõ’arã avei Ñanderuete róga oñembyaihápe.

9Upévare pa’iguasu Joiada omoĩ peteĩ karameg̃ua, ha ombokua ijape gotýo ha omohenda kuave’ẽmby renda yke rehe, ha umi pa’i oñangarekóva pe okẽ rehe omoĩmbaite pe pirapire ojeguerúva guive Ñanderuete rógape pe karameg̃ua pévape.

10Ha ohechávo hetamaha pirapire pe karameg̃uáme, ou jepi pe tetã ruvicha kuatiañe’ẽ haihára ha pe pa’iguasu, ha oipapa hikuái pe pirapire ojohúva guive Ñanderuete rógape.

11Upéi ome’ẽ hikuái pe pirapire umi oguerekóva ipoguýpe Ñanderuete rogaguasu rembiapo; ha ha’ekuéra ome’ẽ jevy pe pirapire umi yvyra rehe omba’apóvape omyatyrõ hag̃ua Ñanderuete rogaguasu,

12ha umi óga apohára ha ita kytĩhakuérape, ojogua hag̃ua ita oñemyatyrõ hag̃ua Ñanderuete rogaguasu oñembyaihápe, ha opaite mba’e oñekotevẽva oñemyatyrõ porã hag̃ua Ñanderuete rogaguasúpe.

13Ha umi pirapire ojeguerúva Ñanderuete rogaguasúpe ndojeporúi ojejapo hag̃ua ña’ẽ oroguiguáva, kysekuéra, tazaguasu, turu, mba’eveichagua tembiporu oroguigua térã plataguiguáva ndojejapói Ñanderuete rogaguasúpe g̃uarã,

14oñeme’ẽmbágui umi tembiapo apohárape, omyatyrõ raẽ hag̃ua Ñanderuete rogaguasu.

15Ha pe kuimba’e máva pópe oñemoĩva’ekue pe pirapire natekotevẽi omombe’u mba’éichapa oiporu, ha’ekuéra oiporupágui py’a potĩme.

16Ha umi pirapire kuave’ẽmby angaipa reheguáva noñeme’ẽi Ñanderuete rogaguasu rembiapópe, umía pa’ikuéra mba’e voi.

17Upéramo Hazael, Síria retã ruvicha, ojupi ha ojeity Gat ári, ha omoĩ ipoguýpe. Uperire Hazael ojeityse avei Jerusalengua ári;

18upévagui Joas, Juda retã ruvicha, ojapyhy opaite temime’ẽmby ituvakuéra Josafat, Joram ha Ocozías, Juda retã ruvichakuéra, ha avei umi ha’e voi ome’ẽmava’ekue, ha opaite óro oĩva guive Ñanderuete rogaguasúpe ha tetã ruvicha rógape, ha oguerahauka Síria retã ruvicha, Hazaélpe; upévagui ha’e oho jevy Jerusaléngui.

19Ambue Joas rembiapokue, ha opaite mba’e ojapova’ekue guive ojehaipa Juda retã ruvichakuéra rembiapokue kuatiañe’ẽme.

20Ha hembiguaikuéra opu’ã hese ha ojuka hikuái ichupe hóga Milo peguápe, ha’e oguejy jave Sílope.

21Josacar, Simeat ra’y, ha Josabad, Somer ra’y, ko’ãva Joas rembiguaikuéra voi oikutu ichupe ha omano. Ha oñeñotỹ ituvakuéra ndive, David távape, ha hendaguépe opyta ita’ýra Amasías, tetã ruvicha ramo.