1Péicha he’i Ñanderuete: Peiko che rembiapoukapy he’i háicha, ha pejapopa hekoitépe, che salvacion og̃uahẽmbota ha ojehechaukáta che justícia.
2Ovy’aite pe kuimba’e ha opaite umi oñeha’ãmbáva oiko hag̃ua hekoitépe, ombyaretévo pe sábado, oñemongy’a’ỹ hag̃ua, ha ovy’aite umi ojejokóva ani hag̃ua ojapo mba’eve ivaíva.
3Ha pe tetã ambueygua ojeroviáva pende Ruete rehe aníke he’ítei: Ñanderuete chepe’áta hetãgui. Ha pe kuimba’e ndaikatúiva oñemoña ani he’ítei: Péina ápe che ningo peteĩ yvyra pirukuéma (hokyve’ỹtava).
4Upévare Ñanderuete he’i: Umi kuimba’e oñekytĩ’oiteva’ekuépe omboarete ramo che sabadokuéra ha ohayhu ramo che rembipota ha opia’ỹ ramo che ñe’ẽme’ẽgui,
5umíape Che ame’ẽta hendag̃ua che rógape, che korapy ryepýpe, ha ame’ẽta avei ichupekuéra peteĩ téra iporãvéva ta’ýra ha tajyrakuéragui; ame’ẽta ichupekuéra peteĩ téra opaite árape g̃uarã, ha araka’eve ndojepe’amo’ãvéi.
6Ha umi tetã ambueygua ojeroviáva pende Ruete rehe oiko hag̃ua hembiguái ramo ha ohayhúva ichupe omboaretévo pe sábado ani hag̃ua oñemongy’a, ha opia’ỹva che ñembopy’apeteĩgui,
7umíape Che agueraháta che cérro ojeporavopyrévape ambohory hag̃ua ichupekuéra che rogaguasu oñeñembo’ehápe; ikuave’ẽmby ojehapypáva che kuave’ẽmby renda ári chembovy’áta ha che róga oñehenóita ñembo’eha róga mayma tetãnguérape g̃uarã.
8Pende Ruete, pendejára ombyaty jevýta Israelguakuérape oñemosarambipava’ekuépe ha he’i: Che ambojo’avéta umi oñembyatyva’ekuépema.
9Mayma tymba ñu rupigua ha mayma mymba ñarõ saite ka’aguýpe oikóva guive, pejupa pekaru hag̃ua.
10Che retã rerekua hesatũmba, ndohechái ha ndoikuaái mba’eve; ha’ekuéra ojogua jagua okirirĩvape, jagua oñarõkuaa’ỹvape, keraihápente oñeno hikuái, okesevénte avei hikuái.
11Ha’ekuéra ojogua jagua hyg̃uatã’ỹvape okaru heta ramojepe; ha umi tetã rerekua ndohechakuaái mba’eve; maymáva ohosénte hapekuéra rehe, peteĩteĩva oheka imba’erãnte, ha’epasénte hikuái.
12Peju joa he’i hikuái, ja’u víno jaka’u peve; ko’ẽramo ha’e jevýta peteĩ ára ko ára kóva peguáicha, térã iporãvéta.
Who We AreWhat We EelieveWhat We Do
2025 by iamachristian.org,Inc All rights reserved.
