Jeremías 1 - Biblia en Guaraní - ?anderuete ?e’? Por? 2015

Ñanderuete ohenói Jeremíaspe iproféta

ramo

1Jeremías omombe’uva’ekue ko’ã ñe’ẽ ko’ãva; itúva Hilcías, peteĩ pa’i, oikova’ekue Anatótpe, Benjamin tríbu yvýpe.

2Ñanderuete oñe’ẽ hendive, Josías, Amon ra’y, oisãmbyhy ramoguare 13 áñoma Juda retã ruvicha ramo,

3ha Ha’e oñe’ẽve ichupe Joacim, Josías ra’y, oisãmbyhy ramoguare Juda retã, ha Sedequías, Juda retã ruvicha oisãmbyhy peve 11 áño. Ha pe áño, pe jasy 5-hápe, ojegueraha Jerusalengua jepokuapýpe Babilónia retãme.

4Ha Ñanderuete ñe’ẽ ou Jeremíaspe, ha he’i:

5Reime mboyve nde sy ryépe roikuaamava’ekue, che roiporavóma ha romboykemava’ekue che proféta ramo tetãnguérape g̃uarã.

6Ha che ha’e ichupe: Che Ruete, che Jára. Ema’ẽ porã, che nañe’ẽkuaái, che ningo che mitãiterei gueteri.

7Ha Ñanderuete he’i chéve: Ani erétei, che mitãitereiha, rehóta mamo rojokuaihápe, ha eréta opaite mba’e Che ha’éva guive ndéve.

8Aníke rekyhyjétei henondepekuéra, aĩva’erã nendive rosalva hag̃ua, he’i nde Jára.

9Upérõ Ha’e oipyso ipo ha opoko che juru rehe, ha he’i chéve: Péina, Che amoĩ che ñe’ẽ nde jurúpe.

10Ha ema’ẽ porãke, ko ára kóvape Che romoĩmaha tetã ha tetãguasukuéra ári, ha remondo rembyai hag̃ua, rehundi ha reity hag̃ua, remopu’ã ha reñotỹ hag̃ua.

11Upéi ou chéve Ñanderuete ñe’ẽ, ha he’i: Mba’épa rehecha Jeremías. Ha che ha’e: Ahecha peteĩ alméndro yvyra rakã.

12Ha Ñanderuete he’i chéve: Rehecha porã, Che voi añangareko porãta che ñe’ẽ rehe ojejapopa peve.

13Upéi Ha’e oñe’ẽ jevy chéve ha he’i: Mba’épa nde rehecha. Ha che ha’e: Ahecha peteĩ japepo (ólla) opupuvahína; ha ijuru oma’ẽ nórteguio sur gotýo.

14Ha Ñanderuete he’ive chéve: Pe ñehundi ojepoíta opaite ko’ã tetãyguakuéra ári nórteguio.

15Ema’ẽ porãke, Che, pende Ruete, ahenoimba umi tetã yvateoyguápe ou hag̃ua, ha’ekuéra omoĩta isoldádo atykuéra Jerusalen rokẽguasu renondépe, itáva tápia yvate tuichakue ha mayma Juda pegua tavakuéra jerekuévo.

16Che ambojovakéta ichupekuéra, ha’ekuéra opoi haguére chehegui ha ohapy haguére mba’e hyakuã asýva ambue jarakuérape, ipo rembiapokuépe, ha upévare ahaviráta ichupekuéra iñaña haguére.

17Ndékena, ejeku’a jokua ha eñembosako’i, epu’ã ha ere ichupekuéra opaite mba’e Che ha’étava guive ndéve. Ani rekyhyje ichuguikuéra, ỹrõ Che roipy’apy asýta henondepekuéra.

18Ko ára kóvape Che voi romoĩ ndéve ku táva oñemombarete ramoguáicha, horcon hierroguigua ramoguáicha ha korapyjere yvate bronceguigua ramoguáicha ko tetãme g̃uarã, umi Juda retã ruvicha, imburuvichakuéra, ipa’ikuéra ha hetãyguakuérape g̃uarã.

19Ha’ekuéra oñemoĩta nderehe, ndaipu’akamo’ãi katu nderehe; Che voi aĩgui nendive roguenohẽ jevy hag̃ua ipoguykuéragui, he’i nde Jára.