Números 35 - Biblia en Guaraní - ?anderuete ?e’? Por? 2015

Ko’ã táva oñeme’ẽ Leviguakuérape

1Ñanderuete oñe’ẽ Moiséspe Moab ñúme, Jordan rembe’ýpe, Jerico rovái, ha he’i:

2Ere Israelguakuérape tome’ẽ ijyvýgui Leviguakuérape g̃uarã, umi táva ha’ekuéra oiko hag̃ua ipype; ha peme’ẽta avei Leviguakuérape pe ñu oĩva umi táva jerekuévo.

3Umi táva oñeme’ẽta ichupekuéra oiko hag̃ua ipype, ha pe ñu itáva jerekuévo oĩva opytáta hymbakuérape g̃uarã.

4Ha umi táva jere rehegua ñu peme’ẽtava Leviguakuérape; pe táva korapy guive oka gotýore 437 métro pukukue ijerekuévo opytáta imba’erã ramo.

5Ha upéi peha’ãta pe ñu apýra táva ykére kuarahyresẽ gotyogua 874 métro pukukue, ha yvy gotyogua 874 métro pukukue ha kuarahyreike gotyogua 874 métro pukukue, ha yvate gotyogua 874 métro pukukue, pe táva opyta hag̃ua imbytetépe; ko yvy kóva opytáta itavakuéra ñu ramo.

6Peẽ peme’ẽta 6 táva Leviguakuérape, táva oñemokañyháme, ikatu hag̃uáicha pe oporojukáva ojohu pe tenda ha’e ikatuhápe okañy; ha ãva ndive peme’ẽvéta ambue 42 táva ichupekuéra.

7Upéicharamo peme’ẽta 48 táva ha umi ñu oĩva ijerekuévo Leviguakuéra mba’erã ramo.

8Israel tribukuéra yvýgui oñeme’ẽva’erã ko’ã táva, umi oguereko yvy tuichavéva ome’ẽvéta, ha pe oguerekóva yvy michĩvéva ome’ẽta mbovyve; peteĩteĩ tríbu ome’ẽva’erã itavakuéragui Leviguakuérape imba’e tee ramo.

Táva oñekañy hag̃ua

9Ñanderuete oñe’ẽ Moiséspe, ha he’i:

10Eñe’ẽ Israelguakuérape, ha ere ichupekuéra: Ág̃a pehasa vove Jordan mboypýri Canaan yvýpe,

11peiporavóta umi táva apytégui pende táva oñekañy hag̃ua upépe pe oporojukáva oporojukase’ỹre.

12Ha ko’ã távape okañykuaa umi ojukáva génte oñevengasévagui, ha upe oporojukava’ekuépe ndikatúi ojejuka oñembojovake mboyve mbojovakeha árape.

13Peme’ẽva’erã 6 táva, táva oñekañy hag̃uáme.

14Mbohapy táva oñekañyháme peme’ẽta Jordan yke asúpe ha mbohapy táva peme’ẽta Jordan yke akatúape, Canaan yvýpe.

15Ko’ã 6 táva oñekañyháme opytáta Israelguakuérape ha tetã ambueyguápe g̃uarã, okañy hag̃ua upépe umi oporojukáva oporojukase’ỹre.

16Peteĩ oinupã ramo hapichápe tembiporu hierroguiguápe ha ha’e omano ramo, upe jukahára ojejukava’erã avei.

17Ha ipópe oĩ ramo ita ha péva reheve oporojukára’e, pe oporojukava’ekue omanova’erã avei.

18Ha oime ramo yvyra ipópe ha péva reheve oporojukára’e, pe jukahára omanova’erã avei.

19Upe ovengáva ipehẽngue ruguy, upéva ojukava’erã pe oporojukava’ekuépe; ojohuha árape ha’e ojukava’erã ichupe.

20Oĩ ramo peteĩ ipy’aróva hapicha ndive ha upévare omyaña vai ichupe, térã oity ramo hi’ári oimeraẽ mba’e oitységuinte, ha hapicha omano ramo;

21térã oinupã ramo ipópe, ha omano ramo, ijukahare omanova’erã avei, ha’e oporojukágui; ha pe ovengáva ipehẽngue ruguy ojukava’erã ichupe ojohuha árape.

22Oĩ ramo peteĩ ndaipy’aróiva hapicha ndive ha omyaña hapichápe térã oity ramo hi’ári oimeraẽ mba’e oityse’ỹva,

23térã ohecha’ỹre oity hapicha ári peteĩ ita, ha ha’e omano ramo, ndojaposéi jepe hapicháre mba’eve ivaíva;

24upéicharamo pe aty oñembyatýva ombojovake hag̃ua ichupe, ombojovake porãva’erã hekoitépe, ha’e ndoporojukaséi haguére.

25Ha pe aty osalvava’erã pe oporojukava’ekuépe, umi omanóva génte oñevengasévagui, ha omondo jevyva’erã ichupe pe táva oñekañyháme, ha’e oñemo’ã hag̃ua; upépe ha’e oikóta omano meve pe pa’iguasu, oñemonava’ekue acéite óga jojohuha pegua rehe.

26Ha pe oporojukava’ekue osẽ ramo pe táva mo’ãha rembe’ýgui oka gotýo, ha’e oñemo’ãháme,

27ha upe ovengaséva ipehẽngue ruguýre ojohu ramo ichupe pe táva rembe’ýgui oka gotýo, ojukakuaa pe oporojukava’ekuépe, ha ndojererekomo’ãi ichupe heko vaíva ramo;

28pe oporojukava’ekue oikova’erã pe táva mo’ãháme pa’iguasu omano meve; ha pa’iguasu omano rire, pe oporojukava’ekue oho jevyva’erã ijyvyteépe.

29Kóva peteĩ tembiapoukapy peẽme ha pene ñemoñarenguérape g̃uarã, mamo peikoha rupi.

30Oimeraẽ oporojukáva ndikatúi ojejuka peteĩ techahare ñe’ẽ rupínte, oikotevẽ uvei mokõi techahare rehe.

31Ndapejapyhyiva’erã pirapire pe oporojukava’ekue rekove rehe, oĩgui ñemano poguýpe; katuete pejukava’erã avei ichupe.

32Ha ndapejapyhyiva’erã pirapire pe okañyva’ekue pógui, ha’e oho ha oiko jevy hag̃ua ijyvyteépe, pe pa’iguasu omano mboyve.

33Ani pemongy’a pe yvy peikotahápe, pe tuguy omongy’águi pe yvy, ha pe yvy naipotĩmo’ãvéima, oñehẽ jevy peve pe oporojukáva ruguy.

34Aníke pemongy’átei pe yvy peikotahápe, péva che rekoha avei, Che pende Ruete aiko’aína Israelguakuéra apytépe.