Job 13 - Biblia en Guaraní - ?anderuete ?e’? Por? 2015

Job he’i ijehe heko iporãha

1Pema’ẽ porãke, opaite ko’ã mba’ére che resa ohecháma, ha che apysa ohendu ha oikuaa porã.

2Ha peẽ peikuaáva che aikuaa avei, nachemichẽvéi pendehegui.

3Añe’ẽsemínte Ipu’akapáva ndive, ha añemongeta porãsénte Ñanderuete ndive.

4Añetehápe peẽ ningo japu moheñoihára, peẽ ningo pejavypa voi ha peiko pohãnohára gua’u ramo.

5Mba’éichatamora’e pekirirĩete, upéicharamo pehechaukáta penearanduha.

6Pehendu porãke, che pomongavajuse, pejapysaka porã pe añetegua che juru he’íva rehe.

7Pemomba’eguasu piko Ñanderuetépe pende japu rupi ha peimo’ã pene ñe’ẽ rei rupi pejapoha hembipota.

8Peñemoĩse piko ijykére, térã peñorãirõtapa peẽ Ñanderuete rehehápe.

9Iporãnepa peẽme Ha’e oitypekárõ pende rekove rembiapokue apytepekuéra, térãpa pembotavyse ichupe yvyariguakuéra oñombotavy háicha.

10Katuete Ha’e pendehaviráta pembojovake ramo tova mokõime.

11Añetehápe imburuvicha reko penemondyiva’erãmo’ã, ha ikyhyjeguasu ho’ava’erãmo’ã pendeári.

12Peẽ pejéva guive ñe’ẽ arandu gua’u reínte ningo ha opa rei ku tanimbúicha ha noipytyvõi avavépe.

13Pekirirĩ tañe’ẽ che, ha uperire toiko oikóva.

14Mba’upéiko aisu’úta che kũ ha ambyaíta che rekove.

15Pema’ẽ porãke, Ñanderuete chejukase ramojepe, che voi naha’ãrõvéima iñepytyvõ, upeichavérõ amombe’use ichupe che reko ipotĩháre.

16Pevamínte chepytyvõ, aikuaa porãgui pe tekove ñaña nog̃uahẽmo’ãiha ijypýpe.

17Pejapysaka porãke che ñe’ẽ rehe, ha che ha’éva guive toike porã pende apysápe.

18Peikuaa porãke, che ha’ese henondépe che aiko porã hague.

19Mávapa oñorãirõse chendive, ko’ág̃a che akirirĩrõ, amanova’erãmante.

20Mokõi mba’emínte ani rejapove cherehe, upéicharamo nakañymo’ãi ne renondégui.

21Emboykéna chehegui nde po, ha ani chemondyivétei.

22Upéi cherenói ha che rombohováita, térã che añe’ẽta, ha Nde chembohováita.

23Mboy jejayvere ha tembiapo vai piko areko. Ehechaukamína chéve che rembiapo vai ha che jejayvere.

24Mba’érehe piko reñomi chehegui nde rova, ha cherereko nderehe ija’e’ỹva ramo.

25Remondyise piko yvyra rogue piru térãpa remuñase kapi’i rovirukuénte.

26Mba’érehepa reity cheári ñe’ẽ py’aro asýva ha mba’érehepa che mitãrusu rembiapo vaikue cherupity ko’ág̃a.

27Remoinge che pykuéra yvyrakuápe, ha rejesareko mayma che rapekuéra rehe, ha rema’ẽ che pypore rehe.

28Ha che rete opa ohóvo ku kupi’i ho’úva ramoguáicha térã ku polílla ao ombyaipávaicha.